ភ្នំពេញ៖ តារាចម្រៀងស្រីល្បីឈ្មោះជ្រកក្រោមទ្រនំហង្សមាសកញ្ញា វី ឌីណែត ដែលត្រូវគេស្គាល់ថាជាកូនស្រីសំណព្វចិត្តរបស់តារាចម្រៀងជើងចាស់លោក ហួរ ឡាវី ដែលមិនធ្លាប់លេចឮដំណឹងមានគូស្នេហ៍ ស្រាប់តែថ្មីៗនេះបង្ហាញរូបកាន់ដៃគ្នាយ៉ាងផ្អែមល្ហែមនៅក្នុងទឹកដីអង្គរ ធ្វើឲ្យមានការចាប់អារម្មណ៍យ៉ាងខ្លាំងពីអ្នកប្រើប្រាស់បណ្តាញអ៊ីនស្តាក្រាម។
ជាមួយរូបភាពដ៏រ៉ូមេនទិកនេះ មតិខ្លះយល់ថា ស្រីស្រស់ វី ឌីណែត ទំនងជាចង់បង្ហើបពីពន្លកស្នេហ៍ប្រាប់មហាជន និងអ្នកគាំទ្រនាង។
យ៉ាងណាមិញ តារាចម្រៀងស្រី វ័យ ២៣ ឆ្នាំ ដែលតែងតែទទួលបានប្រជាប្រិយភាព និងលេចមុខក្នុងកម្មវិធីប្រគំតន្ត្រីស្ទើរតែគ្រប់កម្មវិធីរូបនេះបានថ្លែងមក ភ្នំពេញ ប៉ុស្តិ៍ថា៖ «តាមពិតរូបនោះ គឺជាដៃរបស់មិត្តភក្តិទេ ហើយក៏មិនបានទៅតែ ២ នាក់ដែរ គឺទៅលក្ខណៈក្រុមការងារ គ្រាន់តែថតផូស្តលេងប៉ុណ្ណោះ ខ្ញុំក៏មិនហ៊ានយកសង្សារដែរ ខ្លាចបែកគ្នា»។
ក្រោយពីបានបញ្ជាក់ឋានៈម្ចាស់ដៃត្រឹមតែជាមិត្តភក្តិ តារាចម្រៀងស្រីសំឡេងធ្ងន់រូបនេះបានបង្ហើបទៀតថា៖ «សម្រាប់បច្ចុប្បន្ននេះ ខ្ញុំមិនទាន់មានសង្សារ ឬអ្នកតាមស្រលាញ់ដែរ និយាយរួមទៅគឺអត់មានតែម្តង មិនថាមើលចិត្តគ្នាសិន ឬគម្រោងថ្ងៃអនាគតអីក៏អត់ដែរ ព្រោះគិតថា ខ្លួនឯងនៅក្មេងដែរ មិនទាន់ដល់អាយុដែលត្រូវគិតរឿងនេះទេ ក្រៅពីការងារ»។
ទោះបីជាតារាចម្រៀងស្រីរូបស្រស់កញ្ញា វី ឌីណែត មិនទាន់ក្ដាប់តំណែងជាគណៈកម្មការក្នុងកម្មវិធីលំដាប់ពិភពលោកដូចជាតារាស្រីរួមទ្រនំអ្នកនាង ឱក សុគន្ធកញ្ញា អ្នកនាង សុខ ស្រីនាង កញ្ញា សុខ សីឡាលីន កញ្ញា សួស វីហ្សា និងអ្នកនាង ពេជ្រ សោភា ក៏តារាស្រីរូបនេះទទួលបានតំណែងជាតួឯកស្រីក្នុងរឿងភាគថ្មីរបស់ផលិតកម្មរស្មីហង្សមាស «រាជបុត្រកង្កែប» ដែលត្រូវសម្តែងជាគូជាមួយម្ចាស់ជយលាភីក្នុងកម្មវិធីប្រលងចម្រៀង Cambodia Idol លោក នី រតនា ផងដែរ។
ក្រៅពីបានបញ្ចប់ការថតខ្សែភាពយន្តលើកដំបូងក្នុងអាជីពសម្តែងថែមទាំងគ្រងតំណែងជាតួឯកស្រីទៀតនោះ តារាចម្រៀងស្រីរូបនេះ ក៏បានត្រៀមចេញបទចម្រៀងថ្មីៗជាច្រើនបទផងដែរ ដោយនាងបានបញ្ជាក់ថា៖ «ភាគច្រើន គឺជាបទមនោសញ្ចេតនា»។
មិនត្រឹមតែមានភាពជោគជ័យក្នុងវិស័យសិល្បៈទាំងវ័យក្មេងកញ្ញា វី ឌីណែត ដែលមានឪពុកជាអ្នកសិល្បៈស្រាប់នោះ ក៏បានបង្ហើបពីការបង្កើតអាជីវកម្មក្រៅសិល្បៈដែលត្រៀមទុកថែមទៀតថា៖ «សម្រាប់ពេលនេះ ខ្ញុំកំពុងមានគម្រោងបើករបររកស៊ីមួយដែរ តែសុំលាក់សិន សុំបង្ហើបត្រឹមតែថាអាចជាអាជីវកម្មខាងថែរក្សាសម្រស់ច្រើនជាង»៕