.jpg)
លោក ថមមី ជូនកាដូចិញ្ចៀនពេជ្រ ឲ្យវីសា និងសុំរៀបការ។ រូប ហ្វេសប៊ុក
ភ្នំពេញៈ នាឱកាសប្រារព្ធពិធីបុណ្យចម្រើនព្រះជន្មម្តាយបង្កើតនាងនៅខេត្តស្វាយរៀងរបស់តារាចម្រៀងស្រីសមត្ថភាពអាចច្រៀងទាំងបុរាណ និងសម័យ កញ្ញា សួស វីសា ដែលក៏ជាថ្ងៃខួបកំណើតខ្លួនផងដែរនាថ្ងៃទី ២០ ខែមេសាកន្លងមកក៏ស្រាប់តែកំលោះរូបសង្ហាលោក ថមមី បានដកចិញ្ចៀនពេជ្រ ១ វង់ជូនជាកាដូ និងសុំនាងរៀបការទាំងក្នុងចំណោមមនុស្សច្រើនបង្កការភ្ញាក់ផ្អើលយ៉ាងខ្លាំងពីមហាជន។
ក្រោយពីចប់កិច្ចការនៃពិធីចម្រើនព្រះជន្មម្តាយនាង ខណៈពេលរាត្រីដែលមានការប្រគំតន្ត្រីកម្សាន្តដ៏សប្បាយនោះលោក ថមមី បានលុតជង្គង់និយាយក្នុងចំណោមមនុស្សម្នាយ៉ាងច្រើននោះថា៖ «តើអូនយល់ព្រមរៀបការជាមួយនឹងបុរសដែលមិនសូវល្បី និងគ្មានទ្រព្យធនច្រើនដូចជាសេដ្ឋី ដូចជាបង ដែលមានចិត្តស្មោះនេះដែរទេ?»។
មានសារដោយទទូចរកចម្លើយតាមបណ្តាញសង្គមផងដែរថា៖ « Will You Marry Me? Sous Visa បងប្អូនក៏ចង់ដឹងចម្លើយពីគាត់ដូចខ្ញុំដែរឬក៏អត់?»។
យ៉ាងណាទាំងមហាជនក្តី និងសាមីខ្លួនខាងប្រុសក្តីក៏មិនទាន់បានទទួលការតបភ្លាមៗពីកញ្ញា សួស វីសា ទៅនឹងសំណើសុំរៀបការនាថ្ងៃប្រារព្ធខួបកំណើតនៅខេត្តស្វាយរៀងនោះនៅឡើយទេ ខណៈភ្នំពេញប៉ុស្តិ៍ក៏មិនបានការបកស្រាយពីកញ្ញាផងដែរពេលទំនាក់ទំនងដោយប្រព័ន្ធទូរស័ព្ទបានបិទ។
ទោះបីជាតារាចម្រៀងសាច់សខ្ចីសម្ផស្សស្រស់សោភា កញ្ញា សួស វីសា ដែលឆក់បានឱកាសនៅក្នុងតំណែងជាគ្រូបង្វឹកម្នាក់នៃកម្មវិធីលំដាប់ពិភពលោក The Voice Kids Cambodia នារដូវកាលទី ២ នៅទ្រនំផលិតកម្មហង្សមាស និងកំពុងតែឡើងកូដរូបនេះមិនបានឆ្លើយតបភ្លាមៗ មែនក្តី តែក៏ឃើញនាងបានសារភាពទទួលយកចំណងស្នេហ៍ពីបុរសរូបនេះរួចទៅហើយ តែមិនទាន់ហ៊ានតបចំពោះសំណើសុំរៀបការនោះតែប៉ុណ្ណោះ។
មួយថ្ងៃក្រោយមកក៏ឃើញសាររបស់នាងតាមហ្វេសប៊ុកថា៖ «ចង់ស្អប់ម្នាក់ហ្នឹងណាស់ ព្រោះចូលចិត្តធ្វើឲ្យខឹង ហើយពូកែខាងលួង ចង់ស្អប់ដែរ តែនៅតែយកឈ្នះចិត្តខ្លួនមិនបាន! តែក៏អរគុណសម្រាប់ថ្ងៃនេះ thanks you honey love you too!» និងសារមួយទៀតបញ្ជាក់ថា៖ «នាងខ្ញុំរួមទាំងក្រុមគ្រួសារសូមគោរពថ្លែងអំណរគុណជ្រាលជ្រៅដល់លោកយាយ លោក-តា ពូមីង បងប្អូន ទាំងអស់ដែលបានមកចូលរួមក្នុងកម្មវិធីរបស់ខ្ញុំកាលពីម្សិលមិញ។
ជាពិសេសនោះអរគុណទៅដល់ពូម៉ៅ Tommy Real សម្រាប់កាដូចិញ្ចៀនពេជ្រទោះវាមិនមែនតម្លៃរាប់ម៉ឺន លាន សែនដូចគេ តែវាមានន័យណាស់សម្រាប់ខ្ញុំ អរគុណពូម៉ៅ និងប្អូនៗដែលខំស៊ូប្រាយខ្ញុំរាល់ថ្ងៃ ស៊ូប្រាយទាល់តែដល់ថ្ងៃពិតប្រាកដដែលមកដល់»៕
