ក្រុងហាណូយ៖ ម្ចាស់បារ៍ជាច្រើនកន្លែងបានឲ្យដឹងថា ការលក់ស្រាបៀរនៅប្រទេស វៀតណាម មានការធ្លាក់ចុះនៅមុនពេលចូលឆ្នាំរបស់ខ្លួន ខណៈច្បាប់រឹតបន្ដឹងចរាចរណ៍ថ្មីបានរំខានដល់ការអបអរឆ្នាំថ្មីក្នុងប្រទេសនិយមគ្រឿងស្រវឹងបំផុតមួយក្នុងលោក។
នៅតាមបារ៍ជាច្រើនក្នុងទីក្រុងហាណូយ មានកៅអីទទេ ហើយអ្នកគ្រប់គ្រងខ្លះត្អូញត្អែរថា ជំនួញរបស់ខ្លួនបានធ្លាក់ចុះតាំងពីគោលនយោបាយមិនអនុគ្រោះគ្រឿងស្រវឹងត្រូវបានអនុវត្ដកាលពីថ្ងៃទី ១ ខែមករា។
ង្វៀង ធីហាញ ជាអ្នកគ្រប់គ្រងបារ៍ បៃហូយ ក្នុងទីប្រជុំជនក្រុងហាណូយ បានត្អូញថា អ្នកស្រីពិបាករកលុយឲ្យប្រាក់ខែបុគ្គលិកណាស់នាខែនេះ។
អ្នកស្រីបន្តថា៖ «ចំនួនភ្ញៀវបានធ្លាក់ចុះខ្លាំង រហូតដល់ ៨០ ភាគរយ។ បើស្ថានភាពនេះនៅតែបន្ដ ១ ឬ ២ ខែទៀត យើងរត់លែងរួចហើយ»។
យោងតាមអង្គការសុខភាពពិភពលោក បានឲ្យដឹងថា គ្រោះថ្នាក់ចរាចរណ៍ជាង ៣០ ភាគរយ ចំណោមក្រុមបុរសក្នុងប្រទេស វៀតណាម កើតឡើងពីការបើកបរលើសល្បឿន។
ស្ថិតក្រោមច្បាប់ថ្មី អ្នកបើកបរម៉ូតូ ដែលទទួលទានគ្រឿងស្រវឹងនឹងត្រូវផាកពិន័យរហូតដល់ ៣៤៥ ដុល្លារ ខណៈអ្នកបើកបររថយន្ដក្រោមឥទ្ធិពលគ្រឿងស្រវឹង អាចនឹងប្រឈមការផាក ១ ៨០០ ដុល្លារ។ ទាំង ២ ករណី ក៏នឹងប្រឈមការព្យួរបណ្ណបើកបរផងដែរ។ សូម្បីតែអ្នកជិះកង់មានជាតិស្រវឹងក៏ត្រូវផាក ២៥ ដុល្លារដែរ។
ប៉ូលិសចរាចរណ៍បាននិយាយថា ពួកគេបានផាកពិន័យអ្នកបើកបរប្រមាណ ៦ ៣០០ នាក់ នៅទូទាំងប្រទេសត្រឹមរយៈពេល ២ សប្ដាហ៍ ក្រោយពីច្បាប់ចូលជាធរមាន។ គ្រោះថ្នាក់ចរាចរណ៍បានធ្លាក់ចុះប្រមាណ ១៣ ភាគរយ បើធៀបនឹងរយៈពេលដូចគ្នានាឆ្នាំមុន។
អ្នកគ្រប់គ្រងបារ៍ ត្រាន អាញមិញ បាននិយាយថា អតិថិជនបានធ្លាក់ចុះ ៥០ ភាគរយ នៅបារ៍ បៃហូយ របស់ខ្លួនហើយពួកគេព្យាយាមសម្រួលដល់ភ្ញៀវដោយការផ្ដល់កន្លែងផ្ញើយានយន្ដពេលរាត្រី ឬជូនភ្ញៀវដល់ផ្ទះ។
ម៉ូយប្រចាំម្នាក់របស់លោកឈ្មោះ ង្វៀង ធៀនឌុង បាននិយាយថា ខ្លួនកម្រចេញទៅបរិភោគគ្រឿងស្រវឹងក្រៅផ្ទះណាស់នាពេលថ្មីៗនេះ និងមកទីនេះជាមួយមិត្ដភក្ដិប៉ុន្មាននាក់ដោយសារវានៅជិតផ្ទះស្រាប់។
លោកនិយាយថា៖ «ខ្ញុំគាំទ្រច្បាប់ថ្មីនេះ តែវាឆាប់អនុវត្ដពេក។ ទម្លាប់មិនអាចផ្លាស់ប្ដូរភ្លាមៗនោះទេ»។
យោងតាមក្រុមហ៊ុនវាយតម្លៃសន្ដិសុខ SSI វៀតណាមដែលមានប្រជាជនសរុប ៩៣ លាននាក់ នេះស្ថិតក្នុងកំពូលតារាងជាអ្នកផឹកគ្រឿងស្រវឹងទាំង ១០។ ការទទួលទានស្រាបៀរទំនងជាហក់ដល់ ៤,២ ពាន់លានលីត្រ ក្នុងឆ្នាំ ២០២០ ហើយប្រទេសនេះជាទីផ្សារស្រាបៀរធំបំផុតនៅអាស៊ីអាគ្នេយ៍៕ AFP/HR