ក្រុងសាណា: ត្មាតរោមវែង ណេលសុន បានហើរឆ្លងកាត់ប្រទេសយេម៉ែនដែលញាំញីដោយសង្គ្រាមបង្ហូរឈាមបំណងស្វែងរកចំណី តែត្រូវបញ្ចប់វាសនាក្នុងកណ្ដាប់ដៃក្រុមអ្នកប្រយុទ្ធយេម៉ែន និងបានជាប់ឃុំបណ្ដោះអាសន្នពីបទចារកម្មសម្ងាត់។
បក្សីសម្បុរខ្សាច់បានចុះចតក្នុងទីក្រុងធំទី ៣ Taez របស់យេម៉ែនដែលជាសកម្មភាពខុសប្រក្រតីរបស់ត្មាតជំទង់ ដែលអាចឆ្លងកាត់ទ្វីប ដើម្បីស្វែងរកចំណី ខណៈអាកាសធាតុពុំមានការប្រែប្រួលខ្លាំងដូច្នេះ។
ណេលសុន ទំនងជាមានអាយុ ២ ឆ្នាំ បានធ្វើដំណើរដ៏វែងឆ្ងាយកាលពីខែកញ្ញា ឆ្នាំ ២០១៨ ពី ប៊ុលហ្គារី ជាទីដែលវាត្រូវបានបំពាក់ឧបករណ៍បញ្ជូនសញ្ញាផ្កាយរណបដោយអង្គការមូលនិធិ ការពារព្រៃ Fund for Wild Fauna and Flora (FWFF)។
ប៉ុន្ដែវាទំនងជាវង្វែងផ្លូវ និងចុះចតដោយចៃដន្យក្នុងទីក្រុង Taez នៃតំបន់ក្រុមឧទ្ទាម Huthi កាន់កាប់ តែត្រូវបានគ្រប់គ្រងដោយកងកម្លាំងរបស់រដ្ឋាភិបាល ដែលបានចាត់ទុកឧបករណ៍បញ្ជូនសញ្ញាទីតាំងភូមិសាស្ត្រថា ជាឧបករណ៍ចារកម្ម និងបានឃុំបក្សីនេះជាបណ្ដោះអាសន្ន។
លោក ស៊ីសាម អាល់ ហ៊ុត ដែលតំណាងឲ្យអង្គការ FWFF នៅប្រទេសយេម៉ែនបានធ្វើដំណើរពីទីក្រុងគ្រប់គ្រងដោយឧទ្ទាម សាណា មកកាន់ Taez ដើម្បីរំដោះត្មាតជំទង់នេះ។
លោក ហ៊ុត បាននិយាយថាបក្សីនេះនឹងត្រូវបានដោះលែងរយៈពេល ២ ខែ ទៀតពេលគេជឿថា ណេលសុន មានកម្លាំងថាមពល និងជាសះស្បើយពីរបួសពេលហោះហើរលើផ្លូវដ៏វែងឆ្ងាយកន្លងមក៕ HR