.jpg)
លោក ណា សៀត ហៅ ជីមមី ស្តាន់ និងកូនស្រី សាមេនតា ជាតារាសម្ដែង។ រូបថត សហការី
ភ្នំពេញ៖ តារាសម្តែងស្រីវ័យក្មេងទើបតែទទួលបានឱកាសចូលសម្តែងក្នុងភាពយន្តដុំខ្នាតធំលើកដំបូង យុវតី ហុល សាមេនតា បានទាក់ចិត្តអ្នកទស្សនាជាច្រើនតាមរយៈសមត្ថភាពសម្តែងអារម្មណ៍មនោសញ្ចេតនាជាតួកម្សត់ សម្រក់ទឹកភ្នែក។
ខ្សែភាពយន្តដំបូងដែលកុមារីរូបនេះបានសម្តែង គឺរឿងនាឡិកាដាស់វិញ្ញាណ របស់ផលិតកម្ម LD Picture បានធ្វើឲ្យអ្នកទស្សនាផ្ទុះការចាប់អារម្មណ៍ ដោយសារនាងបានសម្តែងជាតួអង្គសំខាន់ដែលត្រូវម្តាយចុងវាយធ្វើបាបពិតៗ នឹងមានដាក់មនោសញ្ចេតនាខ្ពស់ ដែលមានសមត្ថភាពមិនចាញ់តារារៀមច្បង។
កុមារី សាមេនតា វ័យ ១២ ឆ្នាំ ទើបតែរៀនថ្នាក់ទី ៧ ជាតារាសម្តែងពន្លកក្រោយ បានផ្តល់បទសម្ភាសមកកាន់ ភ្នំពេញ ប៉ុស្តិ៍ ថា៖ «រឿងនេះ(នាឡិកាដាស់វិញ្ញាណ) គឺជារឿងដំបូងដែលខ្ញុំបានសម្តែង។ នៅពេលដែលផលិតកម្ម LD Picture បានប្រកាសជ្រើសយកអ្នកសម្តែងវ័យក្មេង ប៉ារបស់ខ្ញុំ (លោក ណា សៀត ហៅ ជីមមី ស្តាន់) បាននាំខ្ញុំទៅធ្វើតេស្ត ហើយក៏បានជាប់»។
គួរបញ្ជាក់ដែរ តារាស្រីដែលមានវ័យទើបតែ ១២ ឆ្នាំ ពូកែខាងលេងទឹកមុខកម្សត់ ហុល សាមេនតា ជាកូនស្រីបង្កើតរបស់តារាសម្តែងប្រុសលោក ណា សៀត ហៅ ជីមមី ស្តាន់ ដែលទើបតែបោះជំហានចូលប្រឡូកក្នុងសិល្បៈបានរយៈពេល ៣ ឆ្នាំ ដោយសម្តែងបានប្រហែលជាង ៣០ រឿង ភាគច្រើនត្រូវបានអ្នកដឹកនាំជ្រើសយកធ្វើជាតួឃាតករផងដែរ។
យុវតី សាមេនតា បានបង្ហាញពីតិចនិកនៃការសម្តែងឈុតសម្រក់ទឹកភ្នែកដែរថា៖ «មុនពេលចូលថតខ្ញុំព្យាយាមប្រមូលអារម្មណ៍កម្សត់ៗ គិតរឿងអ្វីដែលធ្វើឲ្យយើងចេញទឹកភ្នែក អ៊ីចឹងនៅពេលដែលចូលថតមែនទែន យើងព្យាយាមដាក់អារម្មណ៍ឲ្យខ្លាំងជាងនេះ និងស្រែកយំឲ្យខ្លាំងៗ ទឹកភ្នែកក៏ហូរមកហើយ»។
ក្រៅពីការងារនៅក្នុងវិស័យសិល្បៈអាជីពជាអ្នកសម្តែង ហុល សាមេនតា ក៏មានបំណងចង់ក្លាយទៅជាអ្នករាំអាជីពមួយរូបដែរ ដែលសព្វថ្ងៃកុមារីរូបនេះ ឆ្លៀតក្នុងការហាត់សមជាមួយមិត្តភក្តិពេលម៉ោងសម្រាកពីការសិក្សា ដោយបញ្ជាក់ថា មិនទាន់មានពេលចូលសាលាបង្រៀនរាំនោះទេ។
ទន្ទឹមនឹងទទួលបានភាពជោគជ័យនៅក្នុងកុនដំបូង ដែលបានសម្តែងទទួលបានការគាំទ្រពីអ្នកទស្សនា និងមានការសរសើរមិនដាច់ពីមាត់ កុមារី ហុល សាមេនតា ក៏បានបង្ហើបពីអារម្មណ៍ស្តាយការសិក្សាដូច្នេះដែរថា៖ «ពេលជាប់ការធ្វើតេស្តហើយខ្ញុំត្រូវទៅសម្តែងរយៈពេល ១ ខែ អ៊ីចឹងខ្ញុំមិនបានទៅរៀនអស់ពេល ១ ខែពេញ ខ្ញុំក៏បានសម្រេចចិត្តថា ផ្អាកទទួលការថតសិន រហូតដល់ខ្ញុំរៀនចប់ទើបទទួលវិញ។ ពេលនេះខ្ញុំចង់ផ្តោតទៅលើការសិក្សាសិន ព្រោះថា ខ្ញុំក៏ត្រូវរៀនភាសាចិនផងដែរ»៕
