.jpg)
ការតាំងបង្ហាញនូវម្ហូបអាហារ និងភេសជ្ជៈជាច្រើនទៀត ដែលអ្នកខ្លះយល់ថា គួរឲ្យរអើម។ AFP ហេង ជីវ័ន
ក្រុងស្ដុកខូលម៍: ឈីសញាត់ដង្កូវ ទឹកកែវភ្នែកសត្វចៀម សត្វរពីងរោមខ្មៅ និងស្រាកណ្ដុរ «សារមន្ទីរម្ហូបដ៏គួរឲ្យខ្ពើមរអើម» បង្ហាញពីដំណើរទំនង ដែលមុខម្ហូបនេះមានឱជារសឆ្ងាញ់សម្រាប់បុគ្គលខ្លះ តែវាក៏គួរឲ្យរអើមចំពោះអ្នកខ្លះទៀតដែរ។
ជាមួយការតាំងបង្ហាញរយៈពេល ៣ ខែនៅទីសត្តឃាតចាស់មួយក្នុងទីក្រុងចំណាស់ម៉ាល់ម៉ូ របស់ប្រទេសស៊ុយអែត ពិព័រណ៍ដែលត្រូវបានបង្កើតឡើងដោយលោក សាមូអែល វេស (Samuel West) ជាអ្នកមានបទពិសោធរៀបចំ ពិព័រណ៍ប្លែកៗដូចជា «សារមន្ទីរនៃការបរាជ័យ» កាលពីពេលកន្លងមក។
តាមរយៈពិព័រណ៍ម្ហូបអាហារដ៏រអើមនេះ លោកបានសន្យាថានឹងផ្ដល់ភាពរំជើបរំជួលដល់អ្នកទស្សនា ដោយសារមន្ទីរក៏មានត្រៀមថង់សម្រាប់អ្នកទប់អាការក្អួតផងដែរ។
អ្នកខ្លះញ៉ាំរពីងឆ្ងាញ់ ឯខ្លះទៀតថា វាជាម្ហូបគួរឲ្យរអើម។ AFP
នាយកសារមន្ទីរ Andreas Ahrens បាននិយាយថា៖ «ការខ្ពើមរអើមរមែងជាប្រធានបទរសើប ពីព្រោះវាជាអ្វី ដែលយើងជួបប្រទះ។ វាជាការអប់រំមួយបែប។ បើយើងជួបបទពិសោធញឹកញយ ឬក៏យើងធ្លាប់ញ៉ាំរបស់នោះតាំងពីតូច នោះយើងលែងខ្ទើមវាទៀតហើយ តែសម្រាប់អ្នកដែលមិនធ្លាប់ គេច្បាស់ជាមិនអាចទ្រាំបានឡើយ»។
មុខម្ហូបជាច្រើនត្រូវបានរៀបចំឡើងថ្មីៗ ហើយភ្ញៀវត្រូវបានលើកទឹកចិត្ដឲ្យភ្លក្សលេង បុគ្គលិកសារមន្ទីរនឹងជួយជំរុញដោយធានាថា គ្មាននរណាម្នាក់ចាកចេញដោយមិនបានភ្លក្សនោះទេ។
លោក អាដាម អេលីសុន កម្មកររោងចក្រអាយុ ២៤ ឆ្នាំ បានសារភាពថា៖ «នោះជាអ្វីដែលខ្ញុំមើលឃើញថា ពិតជាគួរឲ្យភ្ញាក់ផ្អើលមែនទែន។ ជាទូទៅ ខ្ញុំរើសចំណីណាស់។ ខ្ញុំទទួលទានតិចបំផុត តែនៅទីនេះ ខ្ញុំត្រូវភ្លក្សគ្រប់មុខ ហើយខ្ញុំមិនខ្ជាក់ចោលឡើយ»។
ស្រាត្រាំកូនកណ្ដុរ ដែលធ្វើឲ្យអ្នកទស្សនាខ្លាចរអើម។ AFP
យ៉ាងណាមិញ មុខម្ហូបខ្លះ ដូចជា ស៊ុបអណ្ដើក និងស៊ុបប្រចៀវ ខក្បាលចៀម និងស្រាកូនកណ្ដុរ នៅតែមិនសូវមានអ្នកហ៊ានភ្លក្សឡើយ។
អាហារដែលនៅថ្មីស្រស់ៗ ដូចជា ឈីស ត្រូវបានរក្សាទុកក្នុងទូទឹកកកពី ៣ ទៅ ៤ ថ្ងៃមុនពេលបោះចោល រពីងរោមខ្មៅនៅលើចាន និងកំប៉ុងត្រាំឈាម និងគ្រាប់ភ្នែកសត្វបើកក្រឡោតគួរឲ្យខ្លាច។
ពេលពិព័រណ៍នេះចប់នៅថ្ងៃទី ២៧ ខែមករា នៅស៊ុយអែត ទាំង Ahrens និង West រំពឹងថា នឹងបន្ដទៅរៀបចំព្រឹត្ដិការណ៍នេះនៅតាមបណ្ដាទីក្រុងនានាក្នុងតំបន់អឺរ៉ុប និងជុំវិញពិភពលោក៕
