ភ្នំពេញៈ ក្នុងឯកសណ្ឋានពណ៌លឿង ដៃអាវម្ខាងមានទង់ជាតិកម្ពុជា និងម្ខាងទៀតរូបទង់ជាតិជប៉ុន កុមារាកុមារីបានបង្ហាញកាយវិការរវៀសរវៃចាប់កាន់ក្ដារក្បួនគិតលេខ និងស្ដាប់ការណែនាំពីអ្នកគ្រូនិយាយភាសាជប៉ុនយ៉ាងយកចិត្តទុកដាក់នៅសាលារៀនកម្រិតស្ដង់ដាដែលល្បីបង្រៀនសិស្សមិនគិតថ្លៃ។
នេះជាសកម្មភាពសិក្សានៅសាលា CIESF Leaders Academy ហៅកាត់ថា CLA ដែលបង្កើតឡើងតាំងពីឆ្នាំ ២០១៦ ដោយមូលនិធិគាំទ្រការអប់រំអន្តរជាតិកម្ពុជា ស៊ីសេហ្វ (CIESF) ជាអង្គការរបស់ជប៉ុនក្នុងគោលបំណងបណ្តុះបណ្តាលកុមារឲ្យមានភាពរឹងមាំ និងឆ្លាតវៃអាចក្លាយជាអ្នកដឹកនាំ ១ រូបនៅថ្ងៃអនាគត។
សាលាមានអគារ ២ ខ្នងមានបន្ទប់រៀនចំនួន ១៥ ចាប់ពីថ្នាក់មតេ្តយ្យសិក្សាដល់អនុវិទ្យាល័យដែលបច្ចុប្បន្នមានគ្រូជនជាតិជប៉ុន ២ នាក់ និងជំនួយការបង្រៀន និងមើលថែសិស្សចំនួន ៨៥ នាក់ដោយក្នុងនោះភាគច្រើនជាកុមារា។
លោក គីយ៉ូមី ដូអ៊ី (Kiyomi Doi) វ័យ ៥៩ ឆ្នាំជានាយកសាលាភាពជាអ្នកដឹកនាំ CLA បានរៀបរាប់មកភ្នំពេញ ប៉ុស្តិ៍ ជាភាសាជប៉ុនដោយមានលោក ស៊ុន រតនៈ ជាអ្នកបកប្រែថា៖ «កាលពី ១២ ឆ្នាំមុនអ្នកគ្រប់គ្រងធំនៃមូលនិធិ CIESF ដែលមានឈ្មោះថា អូគូបូ ហ៊ីដេអូ (OKUBO Hideo) គាត់បានមកលេងលើកដំបូងជាមួយមិត្តភក្តិធម្មតាដោយមិនបានដឹងពីស្ថានភាពរបស់ប្រទេសកម្ពុជាយ៉ាងណានោះទេ»។
នាយកសាលារូបនេះបានបន្តទៀតថា៖ «ប៉ុន្តែនៅពេលដែលគាត់បានឃើញថា កម្ពុជាមិនទាន់មានការអភិវឌ្ឍខ្លាំង និងការអប់រំនៅមានកម្រិតនៅឡើយ ហើយគាត់ក៏បានគិតថា តើខ្ញុំអាចជួយប្រទេសនេះយ៉ាងម៉េចកើត ដើម្បីឲ្យប្រទេសនេះរីកចម្រើនដូចប្រទេសដទៃដែរ។ អ៊ីចឹងហើយគាត់ក៏បានគិតទៀតថា មានតែវិស័យអប់រំតែប៉ុណ្ណោះ ដែលអាចជួយដល់ប្រជាជនកម្ពុជាបាន»។
ចំពោះការដាក់ពាក្យចូលរៀនជំហានទី ១ អាណាព្យាបាលសិស្សត្រូវមានរូបថតកុមារ រូបថតសមាជិកគ្រួសារទាំងមូល សៀវភៅគ្រួសារ សំបុត្រកំណើតកុមារ និងសៀវភៅចាក់ថ្នាំបង្ការជំងឺរបស់កុមារភ្ជាប់នឹងលិខិតដាក់ពាក្យដែលខាងសាលានឹងធ្វើការចែកជូននៅពេលធ្វើបទបង្ហាញអំពីការសិក្សានៅថ្ងៃទី ១៥-១៧ ខែកក្កដាខាងមុខនេះ។
ជំហានទី ២ អាណាព្យាបាលសិស្សត្រូវធ្វើការសំណេះសំណាលជាមួយក្រុមការងារនៅក្នុងសាលាផ្ទាល់អំពីគោលបំណងក្នុងការមានចំណាប់អារម្មណ៍ឲ្យកូនមកទទួលការអប់រំនៅសាលាបង្រៀនភាសាជប៉ុន។
ជំហានចុងក្រោយសាលានឹងពិនិត្យមើលទីតាំងផ្ទះរបស់សិស្ស និងការងារសមាជិកក្នុងគ្រួសារ ថាមានសមាជិកណាមួយដែលធ្លាប់ធ្វើការជាមួយអង្គការជប៉ុន ឬធ្លាប់បានរៀននៅសាលាជប៉ុនពីមុនមកដែលជាអាទិភាពក្នុងការដាក់ពាក្យចូលរៀន។
អាណាព្យាបាលសិស្សត្រូវបានស្នើសុំជាវិភាគទានចំនួន ៤០ ដុល្លារចំពោះសិស្សម្នាក់ក្នុង ១ ខែទុកសម្រាប់ចំណាយទៅលើអាហារសម្រន់ ផ្លែឈើ ទឹកដោះគោ និងអាហារសម្រន់។ ការចំណាយទៅលើឯកសណ្ឋានសិស្ស សាលាជាអ្នកផ្តល់ជូនរួមជាមួយសម្ភារសិក្សាទាំងអស់ និងមានដំណើរកម្សាន្តតាមសួនផ្សេងៗក្នុង ១ ឆ្នាំម្តង។
លោក កឹម វិសេស វ័យ ៤៧ ឆ្នាំជាអាណាព្យាបាលសិស្សមានលំនៅសង្កាត់ភ្នំពេញថ្មីបានថ្លែងមក ភ្នំពេញ ប៉ុស្តិ៍ ថា៖ «កូនខ្ញុំបានរៀននៅទីនេះបាន ៣ ឆ្នាំមកហើយតាំងពីសាលាចាស់នៅទួលគោក ព្រោះសាលាទើបតែប្តូរមកទីតាំងថ្មីនេះ។ ខ្ញុំយល់ថាសាលានេះមានការអប់រំល្អ កូនខ្ញុំរាងប្លែកច្រើនព្រោះថា ក្មេងនៅពេលបានទទួលការអប់រំតាំងពីអាយុ ២ ឆ្នាំអ៊ីចឹង ក្មេងចេះធ្វើអ្វីៗដោយខ្លួនឯងបានហើយគេចេះស្តាប់ប៉ាម៉ាក់ និងបងៗគេគឺគេស្តាប់ទាំងអស់»។
កម្មវិធីសិក្សានៅសាលា CLA មានភាសាខ្មែរ ប្រវត្តិសាស្ត្រ សិក្សា សង្គម វិទ្យាសាស្ត្រ គណិតវិទ្យា កីឡា តន្ត្រី ដោយស្របតាមកម្មវិធីសិក្សាប្រទេស ជប៉ុន។ សិស្សមត្តេយ្យសិក្សារហូតដល់ថ្នាក់ទី ២ ផ្តោតទៅលើតែភាសាខ្មែរ និងជប៉ុនតែប៉ុណ្ណោះដោយភាសាអង់គ្លេសនឹងបញ្ចូលនៅថ្នាក់ទី ៣។
លោកនាយកសាលា គីយ៉ូមី ដូអ៊ី បានបន្ថែមទៀតថា៖ «សិស្សដែលរៀនចប់ទី ៩ ហើយអាចបន្តការសិក្សាថ្នាក់វិទ្យាល័យនៅកម្ពុជាបាន ហើយបើសិនជាសិស្សនោះមានសមត្ថភាព រៀនពូកែក៏អាចទៅរៀនបន្តនៅប្រទេសជប៉ុនបាននៅថ្នាក់បរិញ្ញាបត្រ»។
បច្ចុប្បន្ននេះសាលា CLA មិនទាន់មានគម្រោងពង្រីកសាខាបន្ថែមទៀតទេនៅកម្ពុជា ប៉ុន្តែនឹងមានគម្រោងបង្កើតសាលានៅប្រទេសផ្សេងទៀតក្រោយពីពង្រឹងការអប់រំនៅសាលាសាខាដំបូងឲ្យមានលំនឹងសិន៕
វីដេអូ