ព្រះសីហនុ៖ «សាលារៀនជាឧបករណ៍ និងមធ្យោបាយក្នុងការធ្វើឲ្យជីវិតប្រសើរឡើង ហើយការអប់រំអាស្រ័យលើចិត្តបេះដូង»។ នេះជាសម្ដីលោកឪពុកសាសនាកាតូលិក ចន បូស្កូ ជាអ្នកផ្ដល់ការអប់រំ និងអ្នកនិពន្ធជនជាតិអ៊ីតាលីនាសតវត្សរ៍ទី ១៩។ ទស្សនៈរបស់លោកត្រូវបានបន្តប្រណិប័តន៍នៅតាមបណ្ដាសាលា ដុន បូស្កូ ជុំវិញពិភពលោក រួមទាំងសាលាបច្ចេកទេស ដុន បូស្កូ ខេត្តព្រះសីហនុផងដែរ។
ស្ថិតលើផ្ទៃដីទំហំ ៨ ហិកតា និងមាន ១៣ អគារ សាលា ដុន បូស្កូ នៅទឹកដីតំបន់ឆ្នេរសមុទ្រកម្ពុជា មានថ្នាក់រៀន រោងជាងអនុវត្តន៍ តារាងបាល់ទាត់ បាល់ទះ បាល់បោះសម្រាប់ការលេងកីឡាកម្សាន្ត និងមានការប្រកួតគ្នារវាងសិស្សរួមមានទាំងសណ្ឋាគារមួយជាទីផ្តល់ចំណេះដឹងដល់យុវជន យុវតីសិក្សាផ្នែកនោះផងដែរ។
នាយកនៃសាលាបច្ចេកទេស ដុន បូស្កូ ខេត្តព្រះសីហនុ ដែលជាអតីតសិស្សផ្នែកទំនាក់ទំនងសង្គម នៃសាលាបច្ចេកទេស ដុន បូស្កូ លោក អ៊ូច សំបូរ បានប្រាប់ ភ្នំពេញ ប៉ុស្តិ៍ ថា៖ «សាលាបច្ចេកទេស ដុន បូស្កូ ខេត្តកំពង់សោមបានដំណើរការអស់រយៈពេល ២០ ឆ្នាំហើយ។ សម្រាប់នៅកម្ពុជាសាលាបច្ចេកទេស ដុន បូស្កូ មាននៅទីក្រុងភ្នំពេញ ខេត្តកែប ខេត្តបាត់ដំបង ខេត្តបន្ទាយមានជ័យក្នុងក្រុងប៉ោយប៉ែត រួមទាំងមាន ១៣១ ប្រទេសនៅលើពិភពលោក»។
លោកបានបន្ថែមទៀតថា៖ «លោកពុក ដុន បូស្កូ ឬ ចន បូស្កូ ដែលជាជនជាតិអ៊ីតាលី បានបង្កើតសាលា ដុន បូស្កូ នេះឡើង ដោយសារគាត់ចង់ជួយយុវជនយុវនារីក្រីក្រឲ្យមានចំណេះដឹង និងជំនាញពិតប្រាកដមួយ ដើម្បីឲ្យពួកគេទទួលបានជំនាញទៅបម្រើការងារនៅក្នុងសង្គម ជាពិសេសជួយដល់គ្រួសារពួកគេផងដែរ»។
ការដាក់ពាក្យចូលសិក្សាបេក្ខជនត្រូវឆ្លងកាត់ការពិនិត្យពាក្យ និងសម្ភាសរវាងសិស្ស អាណាព្យាបាល ជាមួយគណៈគ្រប់គ្រងសាលា។ សិស្សក៏ត្រូវឆ្លងកាត់តេស្តលើវិញ្ញាសាមាន ៤ មុខ ដូចជា ភាសាអង់គ្លេស គណិតវិទ្យា វប្បធម៌ទូទៅ និងគំនូរល្បងប្រាជ្ញា។
សិស្សដែលត្រូវបានជ្រើសរើស អាចសម្រេចចិត្តស្នាក់នៅខាងក្នុងសាលា និងខាងក្រៅសាលា ជាមួយអត្ថប្រយោជន៍ដូចគ្នា។ សិស្សស្នាក់ខាងក្នុងសាលាទទួលបានអាហារ ៣ ពេល និងដំណើរកម្សាន្ត ១ ឆ្នាំម្ដង ឬ ២ ដង។ សិស្សមិនត្រូវចេញពីបរិវេណសាលាដោយមិនមានការអនុញ្ញាតពីគណៈគ្រប់គ្រងសាលា មិនត្រូវពាក់គ្រឿងអលង្ការ ឬយកទូរស័ព្ទចូលក្នុងបរិវេណសាលាឡើយ។ សិស្សក៏ត្រូវគោរពពេលវេលាក្នុងការចូលព្រះវិហារថ្វាយបង្គំព្រះ កាលវិភាគរៀនជុំគ្នា វេនសម្អាតជាក្រុម និងការទទួលខុសត្រូវការងារក្រុមផងដែរ។
សាលាបច្ចេកទេស ដុន បូស្កូ បានផ្តល់ការសិក្សាដល់សិស្សក្រីក្រជាប់ ឬធ្លាក់មធ្យមសិក្សាទុតិយភូមិ រយៈពេល ២ ឆ្នាំ ដែលបានផ្តល់ចំណេះដឹងទៅលើជំនាញអគ្គិសនី ផ្នែកយន្តសាស្រ្តរថយន្ត ផ្នែកយន្តសាស្ត្រទូទៅ ផ្នែកលេខាធិការ និងសណ្ឋាគារ។
បច្ចុប្បន្នសាលាមានសិស្សសរុបចំនួន ៣៣៧ នាក់ ទាំងនិស្សិតឆ្នាំទី ១ ក្នុងឯកសណ្ឋានពណ៌ផ្កាឈូក និងឆ្នាំទី ២ ស្លៀកពណ៌ផ្ទៃមេឃ ដោយសិក្សាចាប់ពីថ្ងៃច័ន្ទដល់ថ្ងៃសុក្រ ដែលម៉ោងសិក្សាចាប់ពី ៧:៣០ នាទីព្រឹក ដល់ ៤:៣០ នាទីល្ងាច។
តាមរយៈជំនួយពីបណ្តាប្រទេសផ្សេងៗលើពិភពលោកមាន សហរដ្ឋអាមេរិក អាល្លឺម៉ង់ ហូឡង់ អ៊ីតាលី អូស្ត្រាលី និងហុងកុង សាលាបច្ចេកទេស ដុន បូស្កូ បានដំណើរការរយៈពេល ២០ ឆ្នាំ ដោយបណ្តុះបណ្តាលសិស្សបាន ១៨ ជំនាន់ ចំនួន ៥ ៦៥១ នាក់មកហើយ។
នាយកសាលា ដែលធ្លាប់បានធ្វើជាគ្រូបង្រៀននៅក្នុងសាលាបច្ចេកទេស ដុន បូស្កូ រយៈពេល ៤ ឆ្នាំ និងជានាយករងសាលា ២ ឆ្នាំ ទើបឡើងតំណែងជានាយកសាលាបាន ៤ ឆ្នាំ នេះបានរៀបរាប់ដូច្នេះដែរថា៖ «សាលាយើង គឺជាសាលាអង្គការក្រៅរដ្ឋាភិបាល អ៊ីចឹងពីមុនមក គឺយើងផ្តល់ការសិក្សាដល់សិស្សានុសិស្សដោយឥតគិតថ្លៃ បន្ទាប់មកដោយសារយើងជួបវិបត្តិហិរញ្ញវត្ថុមានការផ្តាច់ជំនួយពីម្ចាស់ជំនួយខ្លះ អ៊ីចឹងយើងក៏សុំឲ្យសិស្សបង់ជាវិភាគទានក្នុង ១ ឆ្នាំ ២០០ ដុល្លារ ហើយយើងក៏បានផ្តល់ជាឯកសណ្ឋាន ខោអាវរោងជាង ស្រោមជើង និងស្បែកជើងផងដែរ»។
ក្នុងចំណោមសិស្សបញ្ចប់ការសិក្សា ពីសាលា ៩៥ ភាគរយ ទទួលបានការងារ ៣ ភាគរយ ជ្រើសរើសការសិក្សាបន្តទៀត និង ២ ភាគរយ បានបើកអាជីវកម្មផ្ទាល់ខ្លួន។
លោក អ៊ូច សំបូរ បានបញ្ជាក់ថា៖ «សិស្សដែលបានបញ្ចប់ការសិក្សា ខាងសាលាក៏បានស្វែងរកស្ថាប័នណាមួយ ដើម្បីឲ្យនិស្សិតបានចូលបម្រើការងារផងដែរ ហើយម្ចាស់ស្ថាប័ននីមួយៗតែងតែមានទំនុកចិត្តទៅលើសមត្ថភាពរបស់និស្សិតដែលបានចេញពីសាលាបច្ចេកទេស ដុន បូស្កូ យើងជានិច្ច»។
ទន្ទឹមនឹងភាពជោគជ័យនៃការបញ្ចប់សិក្សារបស់និស្សិតទទួលបានការងារជាច្រើនជំនាន់ក៏ពិតមែនក៏សាលាបច្ចេកទេស ដុន បូស្កូ បានជួបផលលំបាកជាច្រើន ដោយនាយកសាលាលោក អ៊ូច សំបូរ បានរៀបរាប់ឲ្យដឹងថា៖ «ក្នុងពេលបច្ចុប្បន្ននេះយើងមានការផ្តាច់ជំនួយខ្លះៗពីបណ្តាសប្បុរសជននៅលើពិភពលោក ហើយក្នុងពេលថ្មីៗនេះសាលាក៏ជួបបញ្ហាទឹកជំនន់លិច ២ ដង ដែលទទួលរងការខូចខាតឧបករណ៍សម្ភារសម្រាប់សិក្សាសរុបទាំងអស់ចូល ៥០ ម៉ឺនដុល្លារ»៕