.jpg)
គណៈកម្មការទាំង ៤ រូបនៃកម្មវិធីប្រឡងចម្រៀងថ្មីពិភពលោក X Factor Cambodia។ រូប ហ្វេសប៊ុក
ភ្នំពេញៈ កាលពីចុងឆ្នាំ ២០១៧ តារាចម្រៀងប្រុសដ៏ល្បីត្រកូលខេមរៈ គឺលោក ខេមរៈ សិរីមន្ត ធ្លាប់បានលេចចេញដំណឹងស្រពេចស្រពិលថា អាចនឹងក្លាយជាសមាជិកថ្មីម្នាក់នៃក្រុមគណៈកម្មការផ្តល់ពិន្ទុរបស់កម្មវិធីប្រឡងចម្រៀងលំដាប់ពិភពលោក Cambodian Idol រដូវកាលទី ៣ ម្តងហើយ តែលើកនេះចេញរឿងពិតក្នុងកម្មវិធី X Factor Cambodia រដូវកាលទី ១ វិញជាមួយនឹងក្រុមតារាចម្រៀងជើងចាស់ហង្សមាស ៣ រូបផ្សេងទៀត។
បើតាមសេចក្តីប្រកាសក្នុងគេហទំព័រផ្លូវការកម្មវិធីប្រឡងចម្រៀងលំដាប់កំពូលដែលល្បីទូទាំងពិភពលោក X Factor Cambodia បានបង្ហាញសមាជិកទាំង ៤ រូប គឺជាគណៈកម្មការរបស់ខ្លួនជាតារាចម្រៀងប្រុសស្រីជើងចាស់ហង្សមាស ៣ រូបរួមមានលោក ណុប បាយ៉ារិទ្ធ កញ្ញា ឱក សុគន្ធកញ្ញា និងកញ្ញា សុខ សីឡាលីន ខណៈលោក ខេមរៈ សិរីមន្ត គឺជាតារារបស់ហង្សមាសរលកក្រោយនោះ។
ទោះបីជាលោក ខេមរៈ សិរីមន្ត គឺជាតារាចម្រៀងរលកក្រោយរបស់ហង្សមាសពិតមែន តែបើនិយាយពីបទពិសោធដើរលើវិថីសិល្បៈវិញលោកមានការឆ្លងកាត់ច្រើនជាង ១០ ឆ្នាំមកហើយ ដូច្នេះការប្រគល់នូវតំណែងជាគណៈកម្មការនៃកម្មវិធី X Factor Cambodia រដូវកាលដំបូងនេះក៏ស័ក្តិសមនឹងកិត្តិសព្ទរបស់តារាប្រុសរូបនេះដែរ។
លោក ខេមរៈ សិរីមន្ត បានបង្ហើបប្រាប់ភ្នំពេញប៉ុស្តិ៍ឲ្យដឹងពីហេតុផលដែលផលិតកម្មហង្សមាសសម្រេចដាក់ជាសមាជិកនៃក្រុមគណៈកម្មការនេះដែរថា៖ «តាមពិតទៅរូបខ្ញុំបានដឹងពីការរៀបចំតាំងពីមុនពេលខ្ញុំចូលមកផលិតកម្មហង្សមាសមកម្ល៉េះ។ ដោយសារពេលនោះខាងផលិតកម្មក៏បង្ហើបប្រាប់ខ្ញុំដែរថា នឹងរៀបចំកន្លែងមួយជាគណៈកម្មការនៃកម្មវិធីលំដាប់ពិភពលោកដែលថ្មីសន្លាងរបស់ទូរទស្សន៍ហង្សមាស»។
តារាចម្រៀងប្រុសដ៏ល្បីលំដាប់កំពូលកាលនៅទ្រនំចាស់សាន់ដេ ប្រមាណ ១០ ឆ្នាំទើបសម្រេចមកជ្រកកោនទ្រនំថ្មីផលិតកម្មហង្សមាសដោយសារទឹកដមសំនៀងសំឡេងធ្ងន់មានឈ្មោះពិត ខេម ប៊ុនថៃ ឬឈ្មោះហៅក្នុងសិល្បៈ ខេមរៈ សិរីមន្ត បន្តឲ្យដឹងទៀតថា៖ «ចំពោះមូលហេតុអ្វី នាំឲ្យផលិតកម្មសម្រេចជ្រើសរូបខ្ញុំនោះ ក៏ខ្ញុំមិនបានដឹងច្បាស់ដែរ ដោយសារវាក៏ជាផ្នែកមួយនៃការរក្សានូវភាពសម្ងាត់សម្រាប់ទុកបង្ហាញ ឬបង្ហើបនាពេលក្រោយដើម្បីឲ្យមានភាពភ្ញាក់ផ្អើលដល់មហាជនផងដែរ។ សម្រាប់រូបខ្ញុំផ្ទាល់ គិតថា ខ្លួនឯងមានបទពិសោធផ្នែកនេះក៏ច្រើនគួរសមគឺមានជាង ១០ ឆ្នាំហើយមកដែរ។ ដូច្នេះសម្រាប់វិថីមួយនេះ ខ្ញុំជឿថាខ្លួនឯងពិតជាអាចមានអ្វីៗដើម្បីចែករំលែកដល់បេក្ខជនចូលរួមប្រកួតនៃកម្មវិធី X Factor Cambodia រដូវកាលដំបូងនេះបានទៅតាមភាពជាក់ស្តែងផងដែរ»។
គួរបញ្ជាក់ដែរថាកម្មវិធីប្រឡងចម្រៀងលំដាប់ពិភពលោក X Factor Cambodia ទំនងចាប់ផ្តើមផ្សាយយុទ្ធនាការរបស់ខ្លួននៅក្នុងខែឧសភាឆ្នាំ ២០១៩ ខាងមុខនេះហើយដោយមានការប្រកាសជាផ្លូវការតាមគេហទំព័ររបស់ខ្លួនក្រោយពីធ្លាប់បានលេចឮជាលើកដំបូងម្តងមកហើយកាលពីជិត ២ ឆ្នាំមុននោះ៕
