.jpg)
សិល្បការិនីថតរូបអាជីពកញ្ញា នាក់ សុផល។ រូបថត សហការី
ក្រុងសៀមរាបៈ បណ្តុំរូបថត និងសំឡេងរបស់សិល្បការិនីទម្រង់បុរាណខ្មែរចំនួន ១៨ រូបនឹងត្រូវយកដាក់តាំងបង្ហាញចែកជូនសាធារណជនបានទស្សនា ស្តាប់ និងស្វែងយល់ពីប្រវត្តិ និងលក្ខខណ្ឌបច្ចុប្បន្នរបស់ពួកគាត់ជាមួយនឹងអាជីពសិល្បៈ។
ពិព័រណ៍នេះត្រូវបានសិល្បការិនីទាំង ២ ដាក់ប្រធានបទរួមថា «សូរស្ត្រី» ដែលមានន័យចង់បង្ហាញពីស្ថានភាព និងបញ្ហានានារបស់សិល្បការិនីខ្មែរ ៣ ជំនាន់ដោយរៀបរាប់ទាំងចំណុចល្អ ផលលំបាក និងកត្តាប្រឈមរបស់ពួកគាត់ដែលមានវ័យចន្លោះពី ២០-២១ ឆ្នាំរហូតដល់វ័យ ជិត ៩០ ឆ្នាំ និងមានរបរជាអ្នកសិល្បៈនៅតាមបណ្តាខេត្តក្រុងនានានៃប្រទេសកម្ពុជា។
ស្ត្រីដែលបានប្រកបអាជីពជាសិល្បការិនីកូតទ្រ។ រូបថត នាក់ សុផល
កញ្ញា នាក់ សុផល ជាអ្នកថតរូបអាជីព មានស្រុកកំណើតនៅខេត្តតាកែវ បានប្រកបរបរជាអ្នកថតរូបតាំងពីឆ្នាំ ២០១០ និងជាអតីតនិស្សិតដែលបញ្ចប់ការសិក្សាពីសាកលវិទ្យាល័យភូមិន្ទវិចិត្រសិល្បៈបានប្រាប់ពីគោលបំណង រៀបចំពិព័រណ៍នេះថា៖ «ខ្ញុំគឺជាស្ត្រីម្នាក់បានចាប់របរជាអ្នកថតរូបតាំងពីឆ្នាំ ២០១០ មក ដូចជា មនុស្សប្រុស ហើយក៏មានពិសោធន៍សម្រាប់អាជីពខ្លួន។ តែខ្ញុំមិនដឹងពីស្ថានភាព អ្នកសិល្បៈបុរាណ និងសហសម័យនោះទេ ពិសេសគឺសិល្បការិនី»។
ស្ត្រីខ្មែរដែលចាប់អាជីពជាអ្នកថតរូបវ័យ ៣០ ឆ្នាំរូបនេះបន្តថា៖ «គំនិតស្រាវជ្រាវចង់ដឹងពីស្ថានភាពសិល្បការិនីខ្មែរទម្រង់សិល្បៈបុរាណនេះ កើតឡើងកាលពី ៥ ខែមុន ខណៈខ្ញុំបានប្រើពេលចុងសប្តាហ៍ចំនួន ២ ខែចុះទៅថត និងសម្ភាសផ្ទាល់ជាមួយសិល្បការិនីខ្មែរចំនួន ១៨ រូបដែលជាអ្នកសិល្បៈបុរាណ ។ ខ្ញុំបានកំណត់ស្រាវជ្រាវ ទិន្នន័យពួកគាត់ជាក្រុមអ្នកសិល្បៈចំនួន ៣ ជំនាន់ ។ ពួកគាត់មានវ័យចន្លោះពី ២០-២១ ឆ្នាំរហូតដល់ជិត ៩០ ឆ្នាំរស់នៅតាមបណ្តាខេត្ត-ក្រុង នានាដូចជា ក្រងភ្នំពេញ ខេត្តកណ្តាល សៀមរាប ខេត្តកោះកុង ខេត្តឧត្តរមានជ័យ កំពង់ធំ និងខេត្តស្វាយរៀងជាដើម ។
ក្រុមសិល្បការិនី របាំសហសម័យ New Cambodian Artists (NCA)។ រូបថត នាក់ សុផល
ដោយចង់ចូលរួមការផ្សព្វផ្សាយផ្នែកវប្បធម៌ និងលើកទឹកចិត្តដល់ក្រុមសិល្បការិនី បុរាណទាំង ៣ ជំនាន់ដែលមិនសូវត្រូវបានគេស្គាល់ និងចាប់អារម្មណ៍នោះ ទើបអ្នកថត នាក់ សុផល សហការបង្កើតគម្រោងតាំងពិព័រណ៍ «សូរស្ត្រី» ជាមួយនឹងស្ត្រីអាមេរិកកញ្ញា អេមីលី ហូវី និងអ្នកសម្របសម្រួលយ៉ាងល្អពីកញ្ញា តុលា ផងដែរ។ ពិព័រណ៍នេះនឹងចាប់ផ្តើមបើកសម្ពោធនៅថ្ងៃទី ២៣ ខែសីហា និងបន្តដល់ថ្ងៃទី ២១ ខែតុលា ឆ្នាំ ២០១៩ នៅវិចិត្រសាល Mirage Contemporary Art Space ក្នុងខេត្តសៀមរាប។
កញ្ញា នាក់ សុផល សង្ឃឹមថា៖ «ក្រោយពីបានចូលរួមទស្សនា និងស្តាប់នូវរឿងរ៉ាវរបស់សិល្បការិនីខ្មែរទាំង ១៨ រូបទៅ ខ្ញុំរំពឹងថាអ្នកទស្សនាគ្រប់ស្រទាប់នឹងបានយល់ពីស្ថានភាពពួកគាត់ ហើយរួមគ្នាគាំទ្រ។ ខ្ញុំសង្ឃឹមថាសិល្បៈខ្មែទាំងបុរាណ និង សម័យ នឹងមានការគាំទ្រកាន់តែច្រើនឡើងបើយើងមានឱកាសសិក្សាស្វែងយល់បន្ថែមតាមរយៈការផ្សព្វផ្សាយនានា» ៕
លោកស្រីព្រឹទ្ធាចារ្យ ឯម ធាយ ទេវនាដនិម្មិត ក្នុងអាយុ ៨៦ វស្សា។ រូប នាក់ សុផល
សិល្បការិនីជើងចាស់ យឹម ចន្ទី។ រូប នាក់ សុផល
