.jpg)
ផ្ទះ ២ ល្វែងកម្ពស់ ២ ជាន់ ដែលកញ្ញា សុន ស្រីពេជ្រ បង្ហោះលក់បន្ទាន់។ ហ្វេសប៊ុក
ភ្នំពេញៈ ទើបតែបានប្រកូកប្រកាសបើកហាងលក់អង្ករនោះសោះ ក៏ស្រាប់តែតារាចម្រៀងស្រីល្បី ម៉ៅដាច់ខាងបង្ហើរសំនៀងបំពេវិស័យទេសចរណ៍ កញ្ញា សុន ស្រីពេជ្រ បង្ហោះសារលក់ផ្ទះបន្ទាន់ដើម្បីយកប្រាក់ព្យាបាលជំងឺប្អូនប្រុស និងឪពុកបង្កការភ្ញាក់ផ្អើលមហាជនសាជាថ្មី។
កញ្ញា សុន ស្រីពេជ្រ បានសរសេរជូនដំណឹងលក់ផ្ទះថា៖ «នាងខ្ញុំ សុន ស្រីពេជ្រ ត្រូវការលក់ផ្ទះជាបន្ទាន់ដើម្បីជួយដល់ប្អូនប្រុសនាងខ្ញុំ កំពុងត្រៀមវះកាត់បញ្ចូលខួរឆ្អឹង ដែលមានទីតាំងស្ថិតនៅភូមិសុព័រ សង្កាត់គោករកា ខណ្ឌព្រែកព្នៅ រាជធានីភ្នំពេញ មានទំហំ ១០ ម៉ែត្រ គុណ ២២ ម៉ែត្រ» ភ្ជាប់ជាមួយរូបផ្ទះមួយជំហរនោះ ក៏មានការសុំដោយទទូចថា៖ «សូមមេត្តាជួយស៊ែរបន្តផង ឲ្យបានលក់ឆាប់ដាច់ ហើយប្អូននាងខ្ញុំនឹងឆាប់បានទៅវះកាត់ផងដែរ»។
តម្លៃផ្ទះដែលដាក់លក់មាន ២ ល្វែង និងកម្ពស់ ២ ជាន់នោះ ភ្នំពេញប៉ុស្តិ៍ មិនបានដឹងច្បាស់ផ្ទាល់ពីកញ្ញា សុន ស្រីពេជ្រ ឡើយដោយប្រព័ន្ធទូរស័ព្ទនាងតេចូលតែគ្មានអ្នកលើក។ តែ នាយ សង់ សេត ដែលត្រូវជាបងប្រុសបង្កើតរបស់តារាចម្រៀងស្រីល្បីខ្លាំងខាងបំពេអារម្មណ៍ប្រិយមិត្តរៀបរាប់ពីតំបន់ទេសចរណ៍ក្នុងប្រទេសកម្ពុជាសឹងតែផ្តាច់មុខលើវិស័យនេះ ប្រាប់ថា៖ «ផ្ទះនោះយើងដាក់លក់តម្លៃ ២០ ម៉ឺន ដុល្លារ ក្នុងតម្លៃអាចចរចាគ្នា។ មូលហេតុដែលត្រូវដាក់លក់ផ្ទះដែលកំពុងតែរស់នៅបន្ទាន់បែបនេះ ក៏ព្រោះតែយើងត្រូវការប្រាក់ដើម្បីចំណាយលើការព្យាបាលប្អូនប្រុសបង្កើតខ្ញុំ ដោយសារយើងបានទទួលព័ត៌មានពីខាងក្រុមគ្រូពេទ្យនៅឯប្រទេសថៃបានបញ្ជាក់ថា ជំងឺគាត់អាចនឹងព្យាបាលជា ប្រសិនបើត្រូវចំណាយប្រាក់ប្រមាណ ១៥ ម៉ឺនដុល្លារ នោះ»។
បើតាមស្តាប់មើលទៅ ស្ថានភាពជំងឺរបស់ឪពុកជាតារាកំប្លែងជើងចាស់ គឺនាយ សង់ ស៊ីស ហៅតាស៊ីស ដែលបច្ចុប្បន្នមានវ័យ ៧១ ឆ្នាំនោះក៏នៅមិនទាន់មានភាពធូរស្បើយនៅឡើយដែរទេ ខណៈក្រុមគ្រួសារមានសមាជិកជាអ្នកសិល្បៈភាគច្រើនមួយនេះ ក៏គ្រោងនាំលោកទៅព្យាបាលនៅប្រទេសថៃជាមួយនឹងប្អូនប្រុសផងដែរ តែរង់ចាំដំណឹងលក់ផ្ទះដាច់សិន ខណៈជំនួយពីក្រុមអ្នកសិល្បៈក៏លែងមានអ្នកជួយឧបត្ថម្ភទៀតដែរ ក្រោយពីនាយ សង់ស៊ីស ចេញពីមន្ទីរពេទ្យកាល់ម៉ែតមកនោះ។
នាយ សង់ សេត ក៏បានបន្តថា៖ «ចំពោះជំនួយដោះស្រាយទ័លពីក្រុមអ្នកសិល្បៈយើងមិនហ៊ានរំខានដល់ពួកគាត់ទេព្រោះថា ប្អូនប្រុសខ្ញុំ គាត់មិនមែនជាអ្នកសិល្បៈឡើយ ខណៈលោកឪពុកខ្ញុំវិញ ខាងក្រុមអ្នកសិល្បៈក៏ធ្លាប់បានជួយខ្លះមកហើយកាលពីជិត ២ឆ្នាំ មុននោះ។ ដូច្នេះយើងក៏មិនហ៊ានរំពឹង ឬរំខានដល់បងប្អូនទៀត គឺមានតែរំពឹងលើការលក់ផ្ទះដែលយើងកំពុងតែរស់នៅបច្ចុប្បន្ននេះ»។
គួររំឭកដែរថា តារាកំប្លែងជើងចាស់នាយ សង់ ស៊ីស ដែលបច្ចុប្បន្នមានវ័យ ៧១ ឆ្នាំទៅហើយនោះ បានបាត់មុខពីសង្វៀនសិល្បៈកំប្លែងមួយរយៈតាំងពីចុងឆ្នាំ ២០១៦ មក ដោយសារតែមានជំងឺធ្ងន់ បើតាមលទ្ធផលពិនិត្យរបស់ពេទ្យបានឲ្យដឹងជាបឋមកាលបញ្ជូនទៅពេទ្យកាល់ម៉ែតកន្លងមកនោះ។
ចំណែកឯកូនប្រុសពៅដែលកំពុងតែត្រូវការព្យាបាលជំងឺនេះ មានជំងឺរ៉ាំរ៉ៃ និងក្រុមគ្រួសារបានខ្នះខ្នែងមើលជំងឺអស់រយៈពេលជិត ១០ ឆ្នាំទៅហើយដែរ ដោយធ្លាប់បានទៅព្យាបាលនៅវៀតណាម និងនៅស្រុកខ្មែររហូតពេទ្យអស់សមត្ថភាព ទើបសម្រេចទៅរកពេទ្យនៅថៃវិញម្តង តែខ្វះខាតលុយកាក់។
នាយ សេត ក៏បង្ហើបថា៖ «ពេលណាលក់ផ្ទះនេះដាច់ភ្លាមនោះ នឹងនាំគាត់ និងឪពុកទៅព្យាបាលនៅថៃជាមួយគ្នា ព្រោះពេទ្យនៅខ្មែរថាអស់វិធីព្យាបាលប្អូនប្រុសខ្ញុំហើយ។ រៀងរាល់ ១០ ថ្ងៃម្តង គាត់ត្រូវទៅជួបពេទ្យនៅថៃ» ៕
