.jpg)
កញ្ញា សួស វីសា និងគូដណ្តឹងលោក ថមមី កំពុងតែថត Pre-wedding នៅសៀមរាប។ រូបថត ហ្វេសប៊ុក
ភ្នំពេញៈ ក្រោយពីបានបំពាក់ចិញ្ចៀនភ្ជាប់ពាក្យដើម្បីបន្សាបដំណឹងចចាមអារ៉ាមនៃភាពស្រពេចស្រពិលអំពីសម្ព័ន្ធស្នេហ៍ខ្លួនរំលងបានប្រមាណមួយខែមកនោះ ក៏ស្រាប់តែគេឃើញតារាចម្រៀងស្រីមានសំនៀងផ្អែមពីរោះ និងរូបសម្រស់ស្រស់សោភាកញ្ញា សួស វីសា និងគូដណ្តឹងលោក ប៊ុនថុល ប៊ុនថង ហៅ ថមមី បណ្តើរគ្នាទៅថត Pre-wedding នៅឯខេត្តសៀមរាប ជាការត្រៀមសម្រាប់ពិធីមង្គលការនាពេលឆាប់ៗនេះហើយមើលទៅ។
បណ្តុំរូបថតជាច្រើនសន្លឹកដែលបានផូស្ត ជាហូរហែចេញពីគណនីហ្វេសប៊ុកទាំង ២ នាក់តែម្តងដោយអមដោយសារបែបចង់ប្រាប់ដល់មហាជនឲ្យបានដឹងឮថា៖ «នេះជារូបថតដ៏សែនមានន័យដំបូងនៃជីវិតរបស់ពួកយើងខ្ញុំ រូបថត Pre-wedding នៅលើទឹកដីអង្គរនៃខេត្តសៀមរាប។ នៅមានរូបថតជាច្រើនទៀតដែលយើងនឹងបង្ហាញជូនជាបន្តបន្ទាប់ ព្រោះស្អែកយើងនៅថតនៅទីនេះពេញ ១ ថ្ងៃទៀត» កាលពីចុងសប្តាហ៍កន្លងមក។
តារាចម្រៀងស្រីដែលកំពុងតែស្រូបបានប្រជាប្រិយភាពពីមហាជននៅក្នុងវិស័យសិល្បៈចម្រៀង បន្ទាប់ពីបានគ្រងតំណែងជាគ្រូបង្វឹកក្នុងកម្មវិធីលំដាប់ពិភពលោក The Voice Kids Cambodia រដូវកាលទី ២ កញ្ញា សួស វីសា ទើបតែបានភ្ជាប់ពាក្យជាមួយនឹងគូស្នេហ៍ជាតារាសម្តែង និងតារាម៉ូដែលលោក ប៊ុនថុល ប៊ុនថង ហៅ ថមមី កាលពីថ្ងៃទី ៧ ខែមិថុនាកន្លងមក បន្ទាប់ពីបានកសាងស្នេហ៍ក្នុងនាមជាគូសង្សារអស់រយៈពេលច្រើនឆ្នាំមក។
នាពេលកន្លងមកថ្មីៗនេះក៏មានដំណឹងគួរឲ្យភ្ញាក់ផ្អើលដែលល្បីថានៅថ្ងៃខួបកំណើតលោក ថមមី ក្រៅពីបានរៀបចំនៅផ្ទះវីឡាទំនងជាទ្រនំរួមស្នេហ៍ ក្រោយពីរៀបការពួកគេនោះក៏លេចវត្តមានរថយន្តថ្មីសន្លាងម៉ាក Lexus NX 200t តម្លៃខ្ទង់ ៣-៤ ម៉ឺនដុល្លារ លេចឮថា កញ្ញា សួស វីសា មានចំណែកទិញជូនគូស្នេហ៍ផងដែរ។
យ៉ាងណាក្រោយពីថតរូប Pre-wedding នៅឯតំបន់ខេត្តសៀមរាបរួចទៅ តើនឹងមានទីកន្លែងណាខ្លះទៀតសម្រាប់គូស្នេហ៍នេះត្រូវថតទៀត និងគ្រោងកំណត់វេលាចូលរោងការនៅថ្ងៃខែណាច្បាស់នោះឡើយ ខណៈភ្នំពេញប៉ុស្តិ៍មិនទាន់ទទួលបានការបញ្ជាក់ប្រាប់បន្ថែមពីសំណាក់កញ្ញា សួស វីសា និងលោក ថមមី ឡើយ ដោយប្រព័ន្ធទូរស័ព្ទអ្នកទាំង ២ សុទ្ធតែមិនអាចទាក់ទងបាន។
តែតារាស្រីទ្រនំហង្សមាសរូបនេះធ្លាប់ប្រាប់ភ្នំពេញ-ប៉ុស្តិ៍ថា៖ «ដោយសារតែមួយរយៈក្រោយនេះ ខ្ញុំមានភាពជោគជ័យខ្លាំងក្នុងវិស័យសិល្បៈ និងមានការជំរុញអំពីចាស់ទុំបានលើកហេតុផលថា ពួកយើងជោគជ័យលើការងារហើយក៏ដល់ពេលគិតពីជីវិតគូដែរ អ៊ីចឹងខ្ញុំទាំង ២ នាក់ក៏សម្រេចចិត្តភ្ជាប់ពាក្យ និងមានគម្រោងចូលរោងការចុងឆ្នាំនេះឯង»៕
