ភ្នំពេញៈ តារាចម្រៀងស្រីមានសំនៀងផ្អែមពីរោះ និងរូបសម្រស់ស្រស់សោភាកញ្ញា សួស វីហ្សា កំពុងតែទទួលបានប្រជាប្រិយភាពពីមហាជនក្នុងវិស័យសិល្បៈបន្ទាប់ពីបានគ្រងតំណែងជាគ្រូបង្វឹកក្នុងកម្មវិធីលំដាប់ពិភពលោក The Voice Kids Cambodia រដូវកាលទី ២ ទើបតែភ្ជាប់ពាក្យជាមួយគូស្នេហ៍តារាសម្តែង និងជាតារាម៉ូដែលលោក ថមមី កាលពីថ្ងៃទី ៧ ខែមិថុនា កន្លងទៅនេះ។
បន្ទាប់ពីបានសាងស្នេហ៍ក្នុងនាមជាសង្សារអស់រយៈពេលជាច្រើនឆ្នាំ ដែលបានបណ្តើរគ្នាចេញចូលស្ទើរតែគ្រប់កម្មវិធីតូចធំ ព្រមទាំងជូនទៅធ្វើការគ្រប់ទីកន្លែង សូម្បីតែទៅក្រៅប្រទេសតារាស្រីមានសមត្ថភាពខ្ពស់ទាំងសំឡេង និងការសម្តែងកញ្ញា សួស វីហ្សា និងគូស្នេហ៍អាយុតិចជាង ៣ ឆ្នាំលោក ប៊ុនថុល ប៊ុនថង ហៅ ថមមី តារាបង្ហាញម៉ូដ និងជាតារាសម្តែងទើបតែសម្រេចចិត្តភ្ជាប់ពាក្យ និងកំណត់ថ្ងៃចូលរោងជ័យក្នុងពេលឆាប់ៗនេះ។
តារាស្រីទ្រនំហង្សមាសរូបនេះបានថ្លែងមកកាន់ ភ្នំពេញ ប៉ុស្តិ៍ថា៖ «ដោយតែមួយរយៈក្រោយនេះ ខ្ញុំមានភាពជោគជ័យខ្លាំងក្នុងវិស័យសិល្បៈ និងមានការជំរុញពីចាស់ទុំផង ដោយគាត់បានលើកហេតុផលថា ពួកយើងជោគជ័យលើការងារហើយ ហើយក៏ដល់ពេលគិតពីជីវិតគូដែរ អ៊ីចឹងខ្ញុំទាំង ២ នាក់ (ថមមី និងសួស វីហ្សា) ក៏សម្រេចចិត្តភ្ជាប់ពាក្យ និងមានគម្រោងចូលរោងការនៅចុងឆ្នាំនេះឯង»។
គួរបញ្ជាក់ដែរថាតារាស្រី សួស វីហ្សា មិនត្រឹមតែមានសមត្ថភាពផ្នែកចម្រៀងប៉ុណ្ណោះទេ ប៉ុន្តែក៏មានទេពកោសល្យក្នុងការសម្តែងដូចគ្នា ដោយនាងទើបតែបានបញ្ចប់កុនភាគថ្មីរបស់ផលិតកម្មរស្មីហង្សមាស «រាជបុត្រកង្កែប» និងគ្រោងចាក់បញ្ចាំងក្នុងពេលឆាប់ៗនេះ។ ក្រៅពីនេះក៏នៅចេញបទចម្រៀងថ្មីៗជាច្រើនបទផងដែរ។
តារាចម្រៀងស្រីសាច់សខ្ចីវ័យ ២៦ ឆ្នាំកញ្ញា សួស វីហ្សា ក៏បានបង្ហើបប្រាប់ពីគម្រោងថ្ងៃអនាគតផងដែរថា៖ «បន្ទាប់ពីរៀបការហើយក្រៅពីការងារសិល្បៈពួកយើងក៏មានគម្រោងធ្វើជំនួញដែរ ទី ១ គឺរកស៊ីខាងអចលនទ្រព្យ ទី ២ បើកហាងលក់ប្រភេទខូស្មិចទិក (គ្រឿងសម្អាង) និងទី ៣ បើកកន្លែងលក់អីញ៉ាំ ឬកន្លែងផឹកស៊ីអីហ្នឹង គ្រាន់តែថា ពួកខ្ញុំមានគម្រោងថា បើកជាលក្ខណៈធំៗដែរ»។
បន្ទាប់ពីកាក់កបក្នុងអាជីពជាអ្នកសិល្បៈដែលជាតារាចម្រៀងស្រីលេចធ្លោមួយរូបក្នុងផលិតកម្មរស្មីហង្សមាសតារាស្រីសម្តីផ្អែមរូបនេះក៏បានបង្ហើបពីតម្លៃក្នុងការចូលកម្មវិធីផ្សេងៗ និងចូលរួមក្នុងការប្រគំតន្ត្រីដែរថា នឹងត្រូវឡើងថ្លៃពាក់កណ្តាលនៃតម្លៃចាស់ដោយលើកហេតុផលថា រូបនាងមានភាពមមាញឹកខ្លាំង។
ស្រីស្រស់ សួស វីហ្សា បានបង្ហើបប្រាប់ភ្នំពេញ ប៉ុស្ដិ៍ ផងដែរថា៖ «ក្រោយពេលរៀបការរួច ពួកយើងក៏មានគម្រោងទៅក្រេបទឹកឃ្មុំនៅក្រៅប្រទេសដែរ តែមិនទាន់កំណត់ច្បាស់នៅឡើយថាទៅប្រទេសមួយណា ព្រោះថ្ងៃរៀបការនៅយូរដែរ អ៊ីចឹងនៅគិតមើលសិន»៕