.jpg)
កញ្ញា ស៊ីន យូប៊ីន ទទួលបានកុងត្រាកុន ២ ទៀតពីផលិតកម្មនៅថៃ ពេលថ្មីៗនេះ។ រូបថត ហ្វេសប៊ុក
ភ្នំពេញ៖ អតីតស្រីស្អាតលេខ ១ ប្រចាំឆ្នាំ ២០១៤ កញ្ញា ស៊ីន យូប៊ីន កំពុងតែកាក់កបខ្លាំងទីផ្សារថតកុននៅថៃ ខណៈនាងមិនត្រឹមតែស្រូបបានប្រជាប្រិយភាពក្នុងស្រុកប៉ុណ្ណោះទេ ក៏អាចមានសមត្ថភាពបញ្ចេញទេពកោសល្យសម្តែងធ្វើឲ្យផលិតករប្រទេស ថៃ ពេញចិត្តខ្លាំងបន្តកុងត្រាថ្មី ព្រមទាំងទាក់ចិត្តអ្នកគាំទ្រជាតិថៃទទួលស្គាល់ផងដែរ។
ថ្មីៗនេះលេចដំណឹងថា មានផលិតករថៃជ្រើសរើសតារាស្រីស្រស់ស្អាត ពោរពេញទៅដោយទេពកោសល្យកញ្ញា ស៊ីន យូប៊ីន គ្រងតំណែងជាតួឯក ក្នុងកុនផ្សេងទៀត បន្ទាប់ពីកុនរឿង «The Protect» ដែលនឹងត្រូវចាក់បញ្ចាំងគ្រប់រោងកុននៅទីក្រុងបាងកក នៅថ្ងៃទី ២៨ ខែ តុលា ខាងមុខនេះ ដែលជាខ្សែភាពយន្តបែបកំប្លែង និងចូលរួមសម្តែងដោយតារាកំប្លែងជើងចាស់ល្បីថៃ គឺលោក Mum Jokmok នោះ។
តារាសម្តែងស្រី ដែលសម្បូរទីផ្សារថតកុននៅថៃកញ្ញា ស៊ិន យូប៊ីន។ ហុង មិនា
ដោយសារតែតារាសម្តែងស្រីល្បីទាំងសមត្ថភាពសម្តែង និងមានទឹកដមបកស្រាយចម្រៀងពីរោះរណ្តំក្នុង លំនាំបទពីដើមកញ្ញា ស៊ីន យូប៊ីន មានភារកិច្ចចូលរួមក្នុងកម្មវិធីមហោស្រពភាពយន្តអន្តរជាតិ Silk Road International Film Festival នៅខេត្តហ្វូជៀន ប្រទេស ចិន ជាមួយតារាសម្តែងប្រុស ដែលល្បីថាជាគូស្នេហ៍ គឺលោក ខាត់ វ៉ៃហាំង កាលពីថ្ងៃទី ១៥ ខែតុលា កន្លងទៅនេះ នឹងត្រូវត្រឡប់មកកាន់ប្រទេស កម្ពុជា វិញនៅថ្ងៃទី ១៩ ខែតុលាខាងមុខ នេះទើបខាងភ្នំពេញប៉ុស្តិ៍ មិនអាចសុំធ្វើការបកស្រាយពីចំណាប់អារម្មណ៍បានគ្រងតំណែង តួឯករឿងថ្មីឡើយ។
តែបើតាមកញ្ញា លក្ខិណា ដែលជាជំនួយការផ្ទាល់របស់កញ្ញា ស៊ីន យូប៊ីន បានប្រាប់ភ្នំពេញប៉ុស្តិ៍ពីមូលហេតុនាំឲ្យផលិតករថៃ ជ្រើសយកតារាស្រី ដែលមានវត្តមាននៅក្នុងកុនខ្នាតធំ រឿង«The Protect» ថា ៖ «ដោយសារខាងផលិតករថៃ គាត់ឃើញថា យូប៊ីន អាចប្រើប្រាស់ភាសាថៃបានល្អ ហើយណាមួយគាត់ ក៏ពេញចិត្តទេពកោសល្យសម្តែងរបស់ យូប៊ីន ផងដែរ ហើយណាមួយគាត់ (យូប៊ីន) ក៏មានមិត្តភក្តិ ឬអាចថា Manager របស់ យូប៊ីន ម្នាក់ដែរនៅថៃ អ៊ីចឹងគេក៏ណែនាំឲ្យស្គាល់ផលិតករខាងថៃ គេក៏អញ្ជើញយើងទៅថតរឿងដុំតែម្តងទៅ»។
បន្ទាប់ពីកុនដំបូងរឿង «The Protect» ដែលត្រៀម ចាក់បញ្ចាំងនៅក្នុងពេលឆាប់ៗនេះ កញ្ញា ស៊ីន យូប៊ីន ក៏ ទទួលបានកុនដុំចំនួន ២ បន្តទៀតដែរ។ បើតាមជំនួយការផ្ទាល់ខ្លួនតារាស្រីរូបនេះបានបង្ហើបថា៖ «ក្នុងពេលនេះ ខាងយើងក៏បានទទួលកុងត្រាកុន ២ រឿងទៀត ដោយយើងក៏មិនអាចប្រាប់ពីចំណងជើង និងសាច់រឿងបានដែរ ប៉ុន្តែក្នុងរយៈពេលប៉ុន្មានខែនេះ យូប៊ីន ប្រហែលត្រូវទៅនៅប្រទេស ថៃ ច្រើនជាងស្រុកខ្មែរដោយសារគាត់ ត្រូវទៅសម្តែង កុន ២ រឿងថ្មីនោះឯង»៕
