.jpg)
តារាសម្តែងស្រីមានរាងស្រឡូនកញ្ញា ឌី សូនីតា ទទួលបានលុយកក់ពីការលក់ដីដែលខ្លួនទិញទុកពីយូរឆ្នាំមកហើយ។ រូបថត អ៊ីនស្តាក្រាម
ភ្នំពេញៈ ថ្មីៗស្រាប់តែតារាសម្តែងស្រីស្រស់មានរាងស្លីម កញ្ញា ឌី សូនីតា ដែលមហាជនរមែងឃើញបង្ហាញពីភាពស្និទ្ធស្នាល និងផ្អែមល្ហែមទៅតាមភាសាបរទេស ហៅគ្នានៅក្នុងសម័យទំនើបរាប់អានគ្នាដូចជាបងប្អូន «Sis និង Bro» ជាមួយតារាសម្តែងប្រុសលោក អាឡិច ហ្សូរ៉ា នោះក៏បានបង្ហើរវិក្កយបត្រលក់ដីមួយកន្លែងបង្កការភ្ញាក់ផ្អើលពីមិត្តអ្នកសិល្បៈ និងមហាជន។
អមដោយរូបវិក្កយបត្រដែលមានការបង់ប្រាក់កក់ថ្លៃទិញដីចំនួន ៥ ម៉ឺនដុល្លារនោះ តារាសម្តែងស្រីដែលបានហក់ប្រឡូកលើវិថីសិល្បៈតាំងពីឆ្នាំ ២០០៨ និងកំពុងតែស្រូបបានប្រជាប្រិយភាពច្រើនជាលំដាប់កញ្ញា ឌី សូនីតា ក៏បង្ហើរនូវសំណេរបង្ហាញអំពីអារម្មណ៍សប្បាយចិត្តជាមួយគ្រួសារខ្លួនថា៖ «ដីម្តុំហ្នឹងលក់បានហើយម៉ែ»។
មួយរំពេចក្រោយមកក៏មានការលើកឡើងដោយភាពភ្ញាក់ផ្អើលថា៖ «អ៊ីយ៉ា!ពិតជាមិនធម្មតាមែន! ស្ងាត់ៗ កញ្ញា ឌី សូនីតា ស្រាប់តែត្រូវប៉ាន់ដី! តើកញ្ញាកំពុងតែលក់ដីនៅទីណាហ្ន? តើបានប៉ុន្មានដែរទៅដោយគ្រាន់តែលុយកក់ ៥ ម៉ឺន ដុល្លារ ហើយនោះ?»។
តារាសម្តែងស្រីដែលត្រូវប៉ាន់នឹងការថតខ្សែភាពយន្តដុំខ្នាតធំរឿង «The Prey» ទើបតែចប់ និងមានភាពមមាញឹកនឹងការងារសិល្បៈផង និងប្រកបអាជីវកម្មផង ឌី សូនីតា បានបង្ហើបទាំងភ្ញាក់ផ្អើលនឹងការដឹងរឿងនាងទើបទទួលបានលុយកក់ពីការលក់ដីនោះថា៖ «អូ!ខាងបងបានដឹងរឿងនេះដែរឬ? តាមពិតទៅដីនោះគឺស្ថិតនៅតំបន់ផ្សារដីហុយ ហើយទីនោះដែរគឺជាតំបន់ដីកេរមរតករបស់គ្រួសារប៉ាម៉ាក់តាំងពីនាងខ្ញុំនៅក្មេងមកម្ល៉េះ ខណៈនៅទីនោះពីដើមឡើយគ្រាន់តែជាទីបឹង និងនៅជាប់បណ្តាញផ្លូវលូទឹកស្អុយតែប៉ុណ្ណោះ។ ហើយនាងខ្ញុំផ្ទាល់ក៏មានចំណែកទិញដីមួយឡូត៍នៅជាប់ដីកេរម៉ាក់ប៉ាដែរ ដូច្នេះបានជាដីទីនោះមានទំហំធំអាចជួយឲ្យតម្លៃដីមានទីផ្សារមួយកម្រិតទៀត ឆាប់លក់ចេញបានឆាប់។ តែប្រាក់កក់បានមកក៏ត្រូវចំណាយវិញអស់ហើយដែរ ព្រោះកាលពីពេលទិញដីនោះក៏គ្រួសារនាងខ្ញុំបានទៅយកប្រាក់បង់រំលស់ខ្លះផងដែរ»។
យ៉ាងណាក៏គេមិនអាចដឹងពីទំហំដីប៉ុន្មានម៉ែត្រការ៉េ និងលក់ដីបានតម្លៃប៉ុន្មានពីសំណាក់តារាសម្តែងស្រីដែលក៏ទើបតែបានទិញរថយន្តថ្មីសន្លាងកាលចុងឆ្នាំ ២០១៨ កញ្ញា ឌី សូនីតា ឡើយដោយនាងគ្រាន់តែប្រាប់ថា នាង និងគ្រួសារបានទិញដីច្រើនកន្លែងដែរទាំងនៅម្តុំផ្សារដីហុយនៃក្រុងភ្នំពេញ និងនៅតាមខេត្តខ្លះមួយចំនួនទៀត។
កញ្ញា ឌី សូនីតា ព្រលយថា៖ «អាចនិយាយបានថា ដីនៅម្តុំផ្សារដីហុយនោះ មានទំហំធំជាងគេបើប្រៀបទៅនឹងដី នាងខ្ញុំបានទិញនៅតាមបណ្តាខេត្តមួយចំនួនទំហំតូចៗ»៕
