.jpg)
ក្រុមវិចិត្រករខ្មែរនៅ Open Studio Cambodia នៅសៀមរាប។ រូបថត សហការី
ក្រុងសៀមរាប៖ ដោយសារមើលឃើញសក្តានុពលនៃវិចិត្រកម្មប្រមូលផ្តុំសិល្បករសហសម័យ ដែលកំពុងលេចធ្លោនៅកម្ពុជា ខណៈទើបតែប្តូរទីតាំងពីខេត្តកំពត មកខេត្តសៀមរាបនាពេលថ្មីៗនេះ ស្រ្តីជាវិចិត្រករកូនកាត់អាមេរិក-ជប៉ុន ជាស្ថាបនិកនៃមណ្ឌលវិចិត្រកម្ម Open Studio Cambodia បានរៀបចំកញ្ចប់ទេសចរណ៍សិល្បៈមួយជួយបង្កើនការងារសិល្បៈដល់វិចិត្រករខ្មែរ។
ស្ទូឌីយោវិចិត្រកម្មដ៏ថ្មីសន្លាងឈ្មោះ Open Studio Cambodia ដើរតួនាទីជាទីតាំងសហគមន៍សិល្បករ សហសម័យផង និងវិចិត្រសាល សម្រាប់ដាក់តាំងរាល់បណ្តុំស្នាដៃសហសម័យរបស់សិល្បករខ្មែរផង បង្កើតឡើងដោយកញ្ញា ឡូរ៉ែន អ៊ីអិដា (Lauren Iida) ជនជាតិអាមេរិក-ជប៉ុន មកពីទីក្រុង Seattle រដ្ឋវ៉ាស៊ីនតោន សហរដ្ឋអាមេរិក និងជាវិចិត្រករសហសម័យនៃសិល្បៈកាត់ក្រដាស។ កញ្ញា អ៊ីអិដា បាននិងកំពុងតែរស់នៅ ប្រទេស កម្ពុជា អស់រយៈពេល ១១ ឆ្នាំ មកហើយផងដែរ។
ចំពោះហេតុផលដែលជំរុញទឹកចិត្តឡូរ៉ែន បន្ថែមអាជីពជាអ្នករៀបចំនូវកញ្ចប់ទេសចរណ៍ផ្នែកសិល្បៈសហសម័យនៅកម្ពុជា គឺដោយសារកញ្ញាបានស្វែងយល់ឃើញថា សិល្បករ-សិល្បការិនីសហសម័យនៅកម្ពុជា ដែលបានចាប់ផ្តើមរីកដុះដាលឡើងវិញដោយមានគំនិតច្នៃប្រឌិតជឿនលឿនច្រើនជាងជំនាន់មុន។ សព្វថ្ងៃ នេះ កម្ពុជាកំពុងតែផ្តោតលើការយកចិត្តទុកដាក់វិស័យសិល្បៈវិចិត្រកម្ម ខណៈប្រជាជនក្នុងស្រុក ក្មេងៗក៏កំពុងចាប់ផ្តើមផ្តល់តម្លៃឲ្យសិល្បៈ បំពេញការងារលើផ្នែកសិល្បៈ និងជំរុញវិស័យសិល្បៈ នៅកម្ពុជាឲ្យមានសម្ទុះលឿនទៅមុខក្នុងបរិបទថ្មីមួយ ដែលគួរឲ្យរំភើបចិត្ត។
កញ្ញា ឡូរ៉ែន អុីអិដា ពេលនាំភ្ញៀវទស្សនាពិព័រណ៍ស្នាដៃគំនូរ។ រូបថត សហការី
ដោយសារចង់ចូលរួមសហការ-បង្កើតនូវគម្រោងសា្នដៃសិល្បៈគំនូរខ្លួន និងចង់ចែករំលែកបទពិសោធជំនាញសិល្បៈគំនូរដល់ក្រុមវិចិត្រករជំនាន់នោះ លោក ឈើន ចាន់នី ជាវិចិត្រករសហសម័យដ៏ចំណាន អតីតជានិស្សិតសិល្បៈរៀននៅសាលាហ្វារពន្លឺសិល្បៈនោះ ក៏បានចូលរួមជាមួយ Open Studio Cambodia ដោយមាន ឡូរ៉េន អ៊ីអិដា ជាស្ថាបនិក។
វិចិត្រករ ឈើន ចាន់នី ដែលរមែងរំលេចស្នាដៃពីទេសភាពធម្មជាតិព្រៃព្រឹក្សា ឬតំបន់ភ្នំនៃទីជនបទ និងបង្ហាញពីបញ្ហាសង្គមនានា បង្កប់ន័យអប់រំក្នុងផ្ទាំងគំនូរខ្លួនជារឿយៗនោះ បានបង្ហើបថា៖ «បងស្រី ឡូរ៉ែន គាត់បានបង្កើតកម្មវិធីថ្មីមួយឈ្មោះ Tour Arts ដែលអាចនាំក្រុមទេសចរបរទេសនានា មកទស្សនាស្នាដៃវិចិត្រកម្មរបស់វិចិត្រករខ្មែរនៅតាមវិចិត្រសាលនានា ដូចជា Open Studio Cambodia។ ខ្ញុំកំពុងតែមានគម្រោងបង្កើតនូវស្នាដៃសិល្បៈក្រៅម៉ោងមួយ ដែលនឹងយកត្រូវទៅដាក់បង្ហាញនៅក្រៅប្រទេសឆាប់ៗនេះ»។
សព្វថ្ងៃ Open Studio Cambodia កំពុងរៀបចំគម្រោងពិព័រណ៍ ជាច្រើនទាំងក្នុង និងក្រៅប្រទេស ដូចជាវិចិត្រសាល Artxchange (នៅអាមេរិក) រីសត Anantara Angkor Resort (សៀមរាប) វិចិត្រសាល Galerie Lee (បារាំង) បុប្ផាណា (ភ្នំពេញ) និងទីកន្លែងផ្សេងៗទៀត៕
