ភ្នំពេញ៖ អតីតបវរកញ្ញាតំណាងជាតិ Miss Global 2018 កញ្ញា ហង្ស សុរិយាន់ ក្រោយពីបញ្ចប់ការប្រកួតក្នុងកម្មវិធីលំដាប់ថ្នាក់អន្តរជាតិ Miss Global 2018 តារាម៉ូដែលរូបនេះនៅតែបន្តធ្វើសកម្មភាពមនុស្សធម៌ចុះជួយកុមារនៅតាមជនបទ និងតំបន់ដាច់ស្រយាល។
រំលេចស្នាមញញឹមស្រស់ពាក់មកុដបញ្ជាក់ពីអត្តសញ្ញាណជាបវរកញ្ញាជាប់ជយលាភីកញ្ញាឯកកម្ពុជា Miss Global 2018 បានបង្ហាញពីវីដេអូក្នុងបណ្តាញអ៊ីនស្តាក្រាម ងូតទឹកឲ្យកុមារនៅតាមភូមិដាច់ស្រយាល ធ្វើឲ្យអ្នកគាំទ្រក្នុងបណ្តាញសង្គមមានការស្ងើចសរសើរនាងកាន់តែខ្លាំង។
តារាម៉ូដែល និងជាអតីតបវរកញ្ញាទៅប្រកួត Miss Global 2018 កញ្ញា ហង្ស សុរិយាន់ បានប្រាប់ភ្នំពេញប៉ុស្តិ៍ តាមរយៈសារក្នុងបណ្តាញសង្គមហ្វេសប៊ុកថា៖ «ក្នុងកិច្ចការចុះតាមភូមិដាច់ស្រយាលនេះ គឺជាការរៀបចំរបស់ខាង Miss Global ដូចជាចុះតាមខេត្តចំនួន ៧ ទៅ ៨ ខេត្តឯណោះ បន្ទាប់ពីការប្រឡងបានបញ្ចប់»។
គួរបញ្ជាក់ដែរថា ចាប់ពីបញ្ចប់ការប្រកួត Miss Global 2018 នៅលើឆាកអន្តរជាតិកាលពីថ្ងៃទី ១១ ខែ កុម្ភៈ ឆ្នាំ ២០១៩ ស្ថិតនៅក្នុងទីក្រុងម៉ានីលនៃប្រទេស ហ្វីលីពីន ជាប់ក្នុងចំណាត់ថ្នាក់កំពូលទាំង ១០ បន្ទាប់ពីទទួលបានការស៊ែគាំទ្រច្រើននៅលើបណ្តាញសង្គមហ្វេសប៊ុក បវរកញ្ញារូបនេះនៅមិនទាន់មានវត្តមានក្នុងវិស័យសម្តែងនោះទេ ក្រៅពីការធ្វើកិច្ចការសង្គម និងថតផ្សាយពាណិជ្ជកម្មជាមួយនឹងការដើរបង្ហាញម៉ូដ។
កញ្ញា ហង្ស សុរិយាន់ បានថ្លែងបន្ថែមទៀតថា៖ «ដោយសារតែខ្ញុំ គឺជាតំណាងនៃនារីខ្មែរទៅប្រឡង អ៊ីចឹងនៅពេលដែលត្រឡប់មកវិញខ្ញុំត្រូវទៅជួយអប់រំផ្លូវចិត្តក្មេងៗដែលត្រូវគេរំលោភក្មេងៗដែលអត់មានឪពុកម្តាយ ក្មេងៗជក់គ្រឿងញៀន ឲ្យគាត់ចេះតស៊ូក្នុងជីវិត ប្រឹងប្រែងរៀនសូត្រ ដោយមិនបោះបង់ការសិក្សា»។
ក្នុងដំណើរចុះបេសកកម្មទៅជួយមើលថែកុមារនៅតាមតំបន់ដែលជាកាតព្វកិច្ចក្រោយពីបញ្ចប់ការប្រកួតប្រជែងសម្រស់នៅលើឆាកអន្តរជាតិ Miss Global 2018 តារាម៉ូដែលរូបនេះបានបរិយាយទៀតថា៖ «ពេលដែលខ្ញុំ ទៅជួបជាមួយពួកគាត់ (ក្មេងៗតាមតំបន់) គឺជួបនៅតាមតំបន់ ឬខេត្តផ្សេងៗ ដូចជាជិតប៉ោយប៉ែតជាដើមក្មេងៗនៅទីនោះសុទ្ធតែជាអ្នកប្រើប្រាស់គ្រឿងញៀន អ៊ីចឹងហើយយើងក៏ត្រូវការពេលវេលាសម្រាប់អប់រំពួកគាត់ឡើងវិញ»។
ក្នុងការសន្ទនាក្នុងនាទីដ៏ខ្លី ដោយសារកញ្ញាជាប់ថត អតីតបវរកញ្ញារូបនេះមិនបានបរិយាយលម្អិតពីសកម្មភាពនៃការចុះជួយកុមារនៅតាមភូមិ ឬរៀបរាប់ពីភាពលំបាកនៃបេសកកម្មពាក់មកុដចុះតាមជនបទនេះឡើយ៕