ក្រុងឡុងដ៍: លើដងវិថីដ៏ស្ងប់ស្ងាត់មួយក្នុងខណ្ឌ Brixton ភាគខាងត្បូងប្រទេសអង់គ្លេសយុវជន គ្រីស្ទៀន រ៉ូប៊ឺតសុន បានចតរថយន្ដហាងកាត់សក់ចល័តរបស់ខ្លួន។
រយៈពេលប្រមាណ ១ ឆ្នាំមកនេះលោកបានធ្វើការឲ្យ Trim-It ក្រុមហ៊ុនផ្ដល់សេវាកម្មកាត់សក់លើដងវិថីពលរដ្ឋជនជាតិស្បែកខ្មៅរស់នៅ។ គ្រាន់តែរុញទ្វាររថយន្ដវ៉ែនភ្លាម ឃើញកៅអីកាត់សក់ភ្លែត កញ្ចក់ធំ ឧបករណ៍សម្ងួតសក់ និងថតតុផ្ទុកកន្ដ្រៃ ត្រង់ដឺជាដើម។
ពេលលោករៀបចំឧបករណ៍កាត់កោរជូនអតិថិជន យុវជន រ៉ូប៊ឺតសុន ក្នុងសភាពស្អាតបាតបាននិយាយថា អតិថិជនរបស់លោកតែងតែមានការភ្ញាក់ផ្អើលពេលពួកគេឃើញទិដ្ឋភាពក្នុងរថយន្ដវ៉ែន។
មីកា ហេនរី អាយុ ២៤ ឆ្នាំជាអតិថិជនម៉ូយរបស់លោក រ៉ូប៊ឺតសុន ម្នាក់បាននិយាយថា៖ «រូបភាពខាងក្រៅពិតជាសំខាន់ ពេលណាយើងចង់ទៅកន្លែងណា ឬទោះបីជាយើងចង់មានអារម្មណ៍ជ្រះស្រឡះ យើងត្រូវកាត់សក់ឲ្យបានស្អាតបាត ហើយវាក៏បានផ្លាស់ប្ដូររាសីពេញមួយថ្ងៃ ឬមួយសប្ដាហ៍ឯណោះ»។
លោក ហេនរី ដែលកាត់សក់ជាមួយ Trim-It មួយខែម្ដងបានបន្ដថាវាជាហាងកាត់សក់ដ៏ងាយស្រួលបំផុតដែលលោកធ្លាប់បានជួប។ ការណាត់ជួបត្រូវបានធ្វើឡើងតាមរយៈការហៅលើកម្មវិធីទូរស័ព្ទ រួចជួបគ្នាកាត់កោរតែម្ដង។
ស្ថាបនិកក្រុមហ៊ុន ដារ៉េនធេន កូរ៉ាង អាយុ ២៤ ឆ្នាំបានឲ្យដឹងថាការដំឡើងហាងកាត់សក់លើរថយន្ដវ៉ែនបានជួយបង្កើនទំនាក់ទំនងស្អិតល្មួតរវាងជាង និងអតិថិជន។
លោកបានប្រាប់ទីភ្នាក់ងារ AFP ថា៖ «ទំនាក់ទំនងដែលអ្នកមានជាមួយជាងកាត់សក់គឺពិតជាវិសេស ហើយខ្ញុំមានអារម្មណ៍ថា ហាងកាត់សក់នេះអស្ចារ្យពីព្រោះទំនាក់ទំនងមួយទល់នឹងមួយនេះ អ្នកអាចចាត់ទុកជាងកាត់សក់ជាគ្រូពេទ្យម្នាក់ផងដែរ»៕ HR