ក្រុងប៉េកាំង៖ ហាងកាហ្វេសត្វចិញ្ចឹមក្នុងប្រទេស ចិន ជាទីដែលសត្វឆ្កែត្រូវបានជ្រលក់ពណ៌ខ្មៅ និងស ដើម្បីឲ្យភេនដា បង្កជាការជជែកឡើងកម្ដៅលើអនឡាញចំពោះការបីបាច់សត្វ។
ហាងកាហ្វេ Cute Pet Games បើកកាលពីខែមុន ក្នុងក្រុងឈិនឌូ ភាគនិរតីខេត្ដស៊ីឈួន ដែលជាជម្រកខ្លាឃ្មុំភេនដាយក្សល្បី និងរំលេចឆ្កែឆូឆូ លាបថ្នាំភេនដា ៦ ក្បាល។ នេះបើយោងតាមវីដេអូឃ្លីបបង្ហោះដោយ Hongxing News នៅថ្ងៃអង្គារ។
អតិថិជនត្រូវបានថតពេលកំពុងតែនែបនិត្យជាមួយឆ្កែភេនដា។ ម្ចាស់ហាងកាហ្វេ ដោយប្រាប់តែឈ្មោះត្រកូល ហ៊ួង បានប្រាប់ Hongxing News ថា លោកបានចាប់ផ្ដើមផ្ដល់សេវាកម្មលាបថ្នាំសត្វចិញ្ចឹមក្រោយពីឆ្កែភេនដា បានក្លាយជាទំនោរកំពុងពេញនិយម។
លោក ហ៊ួង បាននិយាយថា៖ «រៀងរាល់ពេលដែលយើងលាបពណ៌ វាចំណាយប្រាក់អស់ប្រមាណ ២១១ ដុល្លារ។ ការលាបថ្នាំពណ៌ពិតជាមានតម្លៃខ្ពស់»។
លោកបាននិយាយថា ឆ្កែទទួលការបង្វឹកមួយថ្ងៃ ដើម្បីប្រែក្លាយពីឆ្កែឆូឆូ ទៅជាឆ្កែភេនដា។ សេវាកម្មជ្រលក់ថ្នាំឆ្កែតម្លៃ ១ ៥០០ យន់ បានទទួលការចុចមើលជាង ១៧០ លានដង លើបណ្ដាញសង្គមចិន Weibo និងបង្កជាកំហឹងរិះគន់ពីម្ចាស់ឆ្កែនានាដោយបានសង្កត់ធ្ងន់ពីផលប៉ះពាល់លើរោមរបស់សត្វ។
អ្នកប្រើប្រាស់បណ្ដាញសង្គមម្នាក់បានសរសេរថា៖ «ខ្ញុំសុំស្នើឲ្យលាបពណ៌ថ្នាំខ្មៅសឲ្យម្ចាស់ហាងកាហ្វេនោះផង»។
ម្នាក់ទៀតបានបន្ថែមថា៖ «ឆ្កែ និងឆ្មាស្រឡាញ់មនុស្សជាសម្លាញ់ដ៏ប្ដូរផ្ដាច់ ដោយមិនគិតពីរូបសម្រស់ទេ។ ចុះហេតុអ្វីមនុស្សមិនចេះមានទឹកចិត្ដដូចសត្វសោះ?»។
ក្នុងវីដេអូឃ្លីប លោក ហ៊ួង បានឲ្យដឹងថា ថ្នាំពណ៌នោះនាំចូលពីជប៉ុន និងមិនប៉ះពាល់ដល់ឆ្កែឡើយ។
ប៉ុន្ដែពេទ្យសត្វ លីង ដៃប៊ីង បានប្រាប់ Hongxing News ថា ការលាបថ្នាំឆ្កែអាចប៉ះពាល់ដល់រោម និងស្បែកឆ្កែ»៕ AFP/HR