ក្រុងហុងកុង៖ សាច់ចម្រុះ និងបន្លែស្រស់ជ្រលក់ក្នុងស៊ុបឆ្នាំងភ្លើងក្ដៅៗ ជាអាហារដ៏ពេញនិយមបានថមថយប្រជាប្រិយភាពដោយសារករណីឆ្លងមេរោគ COVID-19 រវាងសមាជិកគ្រួសារដែលទទួលទានស៊ុបឆ្នាំងភ្លើងរួមគ្នាអំឡុងរដូវរងាកន្លងមកនេះ។
អាហារដែលអ្នកញ៉ាំជ្រលក់ចង្កឹះ រួមគ្នាចាប់សាច់ បន្លែ និងគ្រឿងសមុទ្រនេះ ស័ក្ដិសមសម្រាប់ការញ៉ាំជួបជុំគ្រួសារ មិត្តភក្ដិគ្នាច្រើន។
ទោះយ៉ាងណា អ្នកជំនាញសុខភាពបានព្រមានថា ការញ៉ាំស៊ុបឆ្នាំងភ្នើងជុំគ្នាក៏អាចប្រឈមហានិភ័យឆ្លងវីរុសដែរ ក្រោយពីសមាជិកគ្រួសារច្រើននាក់នៅក្រុងហុងកុង បានឆ្លងជំងឺពីអ្នករួមតុមកពីចិន នៅថ្ងៃចូលឆ្នាំ។
ករណីមនុស្សប្រមាណ ១០ នាក់ ដែលញ៉ាំស៊ុបឆ្នាំងភ្លើងជុំគ្នាបានឆ្លងវីរុស តម្លៃភាគហ៊ុនក្រុមហ៊ុនអាជីវកម្មស៊ុបឆ្នាំងភ្លើងជាច្រើននៅក្រុងហុងកុង និងប្រទេស ចិន បានធ្លាក់ចុះ។
ក្រុមហ៊ុនអាជីវកម្មស៊ុបឆ្នាំងភ្លើង Xiabuxiabu មានតម្លៃភាគហ៊ុនធ្លាក់ចុះ ៧,១ ភាគរយ Haidilao ធ្លាក់ចុះ ៤,៨ ភាគរយ និង Yihai International ធ្លាក់ចុះ ២,៧ ភាគរយ។
នៅទីក្រុងហុងកុង ភោជនីយដ្ឋានយីហោ Fairwood, Cafe de Coral, Yoshinoya និង Maxim''s បានផ្អាកការបម្រើឈុតស៊ុបឆ្នាំងភ្លើង។
ភោជនីយដ្ឋាន Maxim''s ក៏បានប្រកាសដែរថា ហាងទាំង ២ សាខារបស់ខ្លួនដែលមានបុគ្គលិកជាសមាជិកគ្រួសារឆ្លងវីរុស COVID-19 នោះ នឹងត្រូវបិទដើម្បីសម្អាតវីរុស។
រីឯភោជនីយដ្ឋានយីហោ Haidilao បានបិទសាខាស៊ុបឆ្នាំងភ្លើងរបស់ខ្លួនទាំងអស់នៅប្រទេស ចិន ជាទីដែលមានមនុស្សស្លាប់ដោយសារវីរុសនេះជាង ១ ០០០ នាក់មកហើយ។
នៅទីក្រុងហុងកុង ហាងស៊ុប Haidilao នៅបន្តដំណើរការបម្រើភ្ញៀវជាមួយវិធានការវាស់កម្ដៅរាងកាយអតិថិជននៅមាត់ច្រកទ្វារ។
លោក សេម វ៉ុង ដែលជាម្ចាស់ហាងស៊ុប 66 Hotpot បាននិយាយថា មានអតិថិជន ២០ នាក់ហើយ ដែលបានលុបចោលការកក់តុញ៉ាំស៊ុបនៅហាងរបស់លោក ព្រោះតែខ្លាចឆ្លងរោគ។
ម្ចាស់ហាងវ័យ ៣៩ ឆ្នាំរូបនេះបាននិយាយទៀតថា៖ «មិនសមណាមកបន្ទោសតែលើស៊ុបឆ្នាំងភ្លើងនោះទេ ព្រោះការញ៉ាំស៊ុបក្ដៅៗជាទម្លាប់ជួបជុំគ្នារបស់ជនជាតិយើង»។
កញ្ញា អេមីលី ម៉ុក បម្រើការជានារីអាកាសចរណ៍បានមកហាងស៊ុបរបស់លោក វ៉ុង ដើម្បីខ្ចប់អាហារយកទៅញ៉ាំនៅផ្ទះ។
នាងបាននិយាយថា៖ «សង្សារខ្ញុំ និងខ្ញុំ សុខចិត្តខ្ចប់ស៊ុបឆ្នាំងភ្លើងយកទៅញ៉ាំនៅផ្ទះ ពីព្រោះយើងមិនចង់ញ៉ាំវានៅកន្លែងមានមនុស្សច្រើននោះទេ ព្រោះនៅហាង យើងមិនដឹងថានរណាជានរណា ហើយមានផ្ទុកជំងឺអីខ្លះនោះទេ»៕ AFP