.jpg)
លោក ត្រាំ និងភរិយាទទួលដំឡូងប៊័រពីចុងភៅជប៉ុន។ រូបថត AFP
ក្រុងតូក្យូ: ក្រោយពីលេងកូនហ្គោលនាពេលព្រឹក និងទស្សនាការប្រកួតចំបាប់ស៊ូម៉ូនាពេលរសៀល ប្រធានាធិបតីអាមេរិក ដូណាល់ ត្រាំ និងនាយករដ្ឋមន្ដ្រីជប៉ុន ស៊ីនហ្សូ អាបេ បានទទួលទានអាហារពេលល្ងាចជុំគ្នាជាមួយភរិយាក្នុងភោជនីយដ្ឋានអាំងធ្យូងរបស់ជប៉ុនមួយនៅជាយក្រុងតូក្យូនាល្ងាចថ្ងៃអាទិត្យ។
លោក អាបេ បានរៀបចំទទួលទានអាហារដ៏ស្និទ្ធស្នាលនៅភោជនីយដ្ឋាន Inakaya ក្នុងខណ្ឌ Roppongi ដែលលក់ «robatayaki» សម្រាប់មនុស្ស ២ នាក់អង្គុយអាំងបន្លែ ត្រី និងសាច់ដែលជ្រើសរើសឲ្យគ្នាទៅវិញទៅមក។
មុខម្ហូបទាំងនេះដាក់លើថាសធំមួយសម្រាប់ឲ្យភ្ញៀវអង្គុយរង់ចាំក្នុងភោជនីយដ្ឋានសាមញ្ញដ៏តូចមួយនេះ។ ដំឡូងបារាំងជប៉ុនជាមួយប៊័រសាលាដ មាន់ចៀន សាច់គោស្ដេកវ៉ាកយូ ជាមួយខាត់ណាខៀវ និងការ៉ុតព្រមទាំងការ៉េមវ៉ានីឡា ក៏ស្ថិតក្នុងតារាងម្ហូបសម្រាប់លោក ត្រាំ និងអាបេ ផងដែរ។ នេះបើយោងតាមសេតវិមាន។
ភោជនីយដ្ឋានដ៏សាមញ្ញបានបើកសម្ពោធតាំងពីឆ្នាំ ១៩៧០។ រូបថត អ៊ីនស្តាក្រាម
ភោជនីយដ្ឋាន Inakaya បានបម្រើមុខម្ហូបជាច្រើនរួមមាន សាស៊ីមិ គុយទាវបែបប្រពៃណី ដូចជា ត្រីសាល់ម៉ុងផ្ទាប់មើមស្ពៃក្រហមសរសៃ និងឈ្លើងសមុទ្រប្រឡាក់គ្រឿង។
ទោះបីជាលោក ត្រាំ អត់ទទួលទានគ្រឿងស្រវឹង ភោជនីយដ្ឋាន Inakaya បានដាក់រាយមុខភេសជ្ជៈគ្រឿងស្រវឹងជប៉ុនមួយចំនួនដូចជា ស្រាសសាកេ និងស៊ូឈូ ថែមទៀត។
សម្ពោធតាំងពីឆ្នាំ ១៩៧០ ភោជនីយដ្ឋាន Inakaya មាន ២ ទីតាំងគឺនៅខណ្ឌ Roppongi ប្រទេសជប៉ុន និងក្រុងញូវយ៉ក សហរដ្ឋអាមេរិក។ កាលពីឆ្នាំ ២០១៧ លោក ស៊ីនហ្សូ អាបេ បាននាំលោក ត្រាំ ទៅទទួលទានពេលល្ងាច ស្ដេកអាំងលើបន្ទះដែក «teppanyaki»៕ HR
