.jpg)
អ្នកបម្រើការដឹកជញ្ជូន ទទួលកម្រៃតែ ៩ ដុល្លារ ក្នុងមួយម៉ោង។ រូបថត AFP
ក្រុងញូវយ៉ក៖ ខណៈដែលបណ្ដាភោជនីយដ្ឋាននៅក្រុងញូវយ៉កបានបិទទ្វារ ព្រោះតែការរីករាលដាលនៃវីរុសកូរ៉ូណាទូទាំងពិភពលោក ពលរដ្ឋដែលមិនទម្លាប់ចម្អិនអាហារញ៉ាំនៅផ្ទះ ត្រូវពឹងផ្អែកទាំងស្រុងលើកងកម្លាំងជិះកង់ដឹកជញ្ជូនចែកចាយម្ហូបអាហារ មកកាន់តុបាយពួកគេ។
មនុស្សប្រមាណ ៤ ម៉ឺននាក់ ដែលក្នុងនោះភាគច្រើនជាជនអន្តោប្រវេសន៍ពុំមានធានារ៉ាប់រងសុខភាព ឬក្រដាសស្នាមផ្លូវច្បាប់នោះបានកំពុងដើរតួនាទីយ៉ាងសំខាន់ ក្នុងពេលដែលបណ្ដាហាងអាហារ និងបារ៍ត្រូវបានបញ្ជាឲ្យបិទពីថ្ងៃចន្ទ រហូតដល់ថ្ងៃទី ១ ខែមេសា។
ក្រុមអ្នកជិះកង់ធាក់ឈ្នាន់ និងខ្លះទៀតប្រើកង់អគ្គិសនី មានប្រអប់ដាក់អាហារ និងថង់ច្រកម្ហូបរយីងរយោង ធ្វើដំណើរឆ្ពោះទៅកាន់ផ្ទះអតិថិជនកុម្ម៉ង់ ទាំងក្ដីបារម្ភខ្លាចឆ្លងវីរុស តែពួកគេមិនមានជម្រើសការងារអ្វីប្រសើរជាងនេះឡើយ។
អ្នកដឹកជញ្ជូនម្នាក់ឈ្មោះ Alberto Gonzalez ដែលសារភាពថា លោករស់នៅអាមេរិកដោយគ្មានការធានារ៉ាប់រងសុខភាពនោះ បានត្អូញថា៖ «អ្នកផ្សេងគេនៅផ្ទះ ប៉ុន្តែពួកយើងប្រឈមនឹងគ្រោះថ្នាក់ជំងឺកូវីដ ១៩។ វាពិតជាគួរឲ្យបារម្ភណាស់»។
ភាគច្រើននៃអ្នកបម្រើការដឹកជញ្ជូនចែកចាយម្ហូបអាហារគឺជាជនអន្តោប្រវេសន៍។ រូបថត AFP
លោកបន្តទៀតថា៖ «ខ្ញុំមានប្រពន្ធ និងកូន ៤ នាក់នៅផ្ទះ តែវាល្អអីបើខ្ញុំត្រូវនៅក្រៅធ្វើការគ្រប់ច្រកល្ហក ដែលធ្វើឲ្យពួកគេក៏ប្រឈមនឹងគ្រោះថ្នាក់ឆ្លងជំងឺពីខ្ញុំនោះ»។
សេវាដឹកជញ្ជូន និងចែកចាយម្ហូបអាហារបានសម្រួលដល់ការហូបចុករបស់ប្រជាជនរាប់លាននាក់ ដែលត្រូវសំងំក្នុងផ្ទះ មិនអាចដើរហើរទៅក្រៅ ព្រោះតែការរាត្បាតនៃជំងឺកូវីដ ១៩។
លោក Gonzalez ដែលរស់នៅតំបន់ប្រូកឃ្លីន និងធ្វើការក្រោមដំបូលអង្គការជនអន្តោប្រវេសន៍ Make The Road New York បានទទូចថា អ្នកជិះកង់បម្រើការដូចរូបលោក ត្រូវការការពារលើសពីនេះ។
លោកនិយាយថា៖ «ខ្ញុំក៏មិនច្បាស់ដែរថា នរណាមានអាទិភាពក្នុងការស្នើសុំធ្វើតេស្តរកវីរុសនេះ។ តើអ្នកគ្មានធានារ៉ាប់រងសុខភាព និងលិខិតរស់នៅស្របច្បាប់ ត្រូវបង់លុយហោប៉ៅខ្លួនឯងក្នុងការពិនិត្យជំងឺ និងព្យាបាលដែរ ឬទេ?»។
ក្រៅពីលាងដៃនឹងជែលសម្លាប់មេរោគ អ្នកខ្លះប្រើថង់ប្លាស្ទិកស្រោបដៃកង់ដើម្បីបង្ការវីរុសឆ្លង។ រូបថត AFP
ក្រុមអ្នកជិះកង់ដឹកជញ្ជូនអាហារព្យាយាមការពារខ្លួនដោយការពាក់ស្រោមដៃ និងម៉ាស់។ ពួកគេឧស្សាហ៍លាងដៃនឹងជែលសម្លាប់មេរោគ ពាក់ស្រោមដៃ ហើយអ្នកខ្លះទៀតប្រើថង់ប្លាស្ទិករុំដៃកង់។
បុរសម៉ិកស៊ិកវ័យ ៣០ ឆ្នាំ Luis Ventura ដែលធ្លាប់ជាមេចុងភៅនៅភោជនីយដ្ឋានក្រិក បានចូលខ្លួនមកបម្រើការដឹកជញ្ជូនម្ហូបអាហារក្នុងកម្រៃមួយម៉ោង ៩ ដុល្លារ ដែលថោកជាងប្រាក់កម្រៃទាបបំផុតនៅក្រុងញូវយ៉ក ១៥ ដុល្លារ ក្នុង ១ ម៉ោង។
រឹតតែយ៉ាប់ទៅទៀតនោះ លោកក៏បារម្ភទៀតថា៖ «និយាយឲ្យស្មោះទៅ សង្ស័យតែខែនេះមិនបានប្រាក់ខែដែលខំធ្វើការនេះផង»៕ AFP
