.jpg)
ទីតាំងដែលគ្រោងនឹងសាងសង់ OTK Royal One ក្នុងទឹកប្រាក់ ១៥០ លានដុល្លារអាមេរិកដែលជាការវិនិយោគរួមគ្នារវាងក្រុមហ៊ុន Royal ជាមួយក្រុមហ៊ុនមកពីប្រទេសចិន Huashi Group។ ហុង មិនា
បើតាមការគ្រោងទុកនៅចុងឆ្នាំ ២០២១ ខាងមុខនៅកម្ពុជានឹងមានអគារខ្ពស់កប់ពពកមួយដែលមានឈ្មោះថា OTK Royal One លេចឡើងនៅចំណុចប្រសព្វរវាងមហាវិថីសហព័ន្ធរុស្ស៊ីជាមួយនឹងមហាវិថីព្រះមុនីវង្ស។
ទីតាំងដែលជាអតីតទីស្នាក់ការរបស់នគរបាលចរាចរណ៍រាជធានីភ្នំពេញនេះ ត្រូវបានក្រុមហ៊ុន OTK Royal One ដែលជាបុត្រសម្ព័ន្ធរបស់ក្រុមហ៊ុន Royal Group បានចាប់ដៃគូជាមួយក្រុមហ៊ុនសាងសង់មកពីប្រទេសចិន Huashi Group ក្នុងទឹកប្រាក់ប្រមាណ ១៥០ លានដុល្លារដើម្បីសង់អគារពាណិជ្ជកម្មទំនើបមួយដែលមានកម្ពស់ ៦២ ជាន់។
លោកឧកញ៉ា គិត ធាង តំណាងឲ្យក្រុមហ៊ុន Royal Group ដែលអញ្ជើញចូលរួមក្នុងពិធីចុះហត្ថលេខាកាលពីថ្ងៃអាទិត្យនៅសណ្ឋាគារ កាំបូឌីយ៉ាណា បាននិយាយថាការសាងសង់អគារពាណិជ្ជកម្មកម្ពស់ ៦២ ជាន់នេះនឹងចាប់ផ្តើមនៅខែកញ្ញាខាងមុខដោយគ្រោងនឹងចំណាយពេលសាងសង់ចំនួន ៣ ឆ្នាំ។
លោកឧកញ៉ាបានថ្លែងថា៖ « OTK Royal One នឹងក្លាយជាអគារដ៏ខ្ពស់លំដាប់អន្តរជាតិដែលនឹងលើកកម្ពស់មុខមាត់កម្ពុជានាពេលខាងមុខ»។
បច្ចុប្បន្ននៅជិតទីតាំងនោះមានអគារធំៗមួយចំនួនដូចជា គឺអគារ វឌ្ឍនៈ អគារកាណាឌីយ៉ា និង Exchange Square។
អ្នកជំនាញវិស័យអចលនទ្រព្យ លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបាននិយាយថា ជារឿងដ៏ល្អដែលកម្ពុជានឹងមានអគារខ្ពស់បន្ថែមទៀតដែលនេះបញ្ជាក់ឲ្យឃើញពីភាពរីកចម្រើននៃវិស័យសំណង់នៅកម្ពុជា។ ទីតាំងដែលគេគ្រោងនឹងសាងសង់អគារនេះពិតជាល្អណាស់ តែទោះបីជាយ៉ាងណាភាពជោគជ័យរបស់គម្រោងមួយមិនមែនអាស្រ័យទៅលើទីតាំងទាំងស្រុងនោះទេ គឺវាអាស្រ័យខ្លាំងទៅលើការមានទុនគ្រប់គ្រាន់សម្រាប់ការសាងសង់ផងដែរ។ បច្ចុប្បន្ននិន្នាការនៃការលក់មុនសាងសង់ (Pre Sale) នៅកម្ពុជាមិនអាចធ្វើបានទៀតទេ។
រូបតំណាងអគារ OTK Royal One។ រូបថត សហការី
លោកបានបញ្ជាក់ថា៖ «គ្រប់គម្រោងដែលសាងសង់ត្រូវតែមានលុយគ្រប់គ្រាន់ ព្រោះការប្រមូលលុយពីការលក់មុន ដើម្បីយកទៅសាងសង់នៅពេលនេះមិនអាចធ្វើបានទៀតទេនៅកម្ពុជា»។
ថ្នាក់ដឹកនាំជាន់ខ្ពស់នៃក្រុមហ៊ុន Royal Group លោក Rami Sharaf កាលពីថ្ងៃអង្គារបានបដិសេធក្នុងការផ្តល់ព័ត៌មានលម្អិតពីគម្រោងនេះ។
អគារភ្លោះ OTK Royal One នឹងប្រើប្រាស់ចម្រុះសម្រាប់ជាសណ្ឋាគារ ខុនដូ ការិយាល័យ និងផ្សារទំនើបជាដើម៕
