ភ្នំពេញៈ ការសាងសង់អគារធំជាងគេចំនួន ២ ក្នុងគម្រោង Olympia City ដែលអគារ ១ នឹងត្រូវប្រើប្រាស់ជាអគារការិយាល័យ និងអគារ ១ ទៀតជាសណ្ឋាគារនោះ នៅពេលនេះសម្រេចបានប្រហែល ៣០ ភាគរយហើយ។ នេះបើយោងតាមប្រធានគ្រប់គ្រងគម្រោង Olympia City។
គម្រោង Olympia City គឺជាគម្រោងអភិវឌ្ឍន៍ដ៏ធំរបស់ក្រុមហ៊ុន OCIC ដែលស្ថិតនៅចំកណ្តាលរាជធានីភ្នំពេញស្ថិតនៅខាងជើងពហុកីឡដ្ឋានជាតិអូឡាំពិកកម្ពុជា។ តាមផែនការការសាងសង់សណ្ឋាគារកម្ពស់ ៣៨ ជាន់ និងអគារការិយាល័យ ដែលអាចមានកម្ពស់រហូតដល់ ៥៥ ជាន់នេះ នឹងត្រូវបញ្ចប់ក្នុងនៅចុងឆ្នាំ ២០២២ ខាងមុខ។
លោក ម៉េង ចំរើន ប្រធានគ្រប់គ្រងគម្រោង Olympia City កាលពីម្សិលមិញបានប្រាប់ភ្នំពេញប៉ុស្តិ៍ថា ការសាងសង់អគារធំៗទាំង ២ នេះកំពុងដំណើរការទៅមុខជារៀងរាល់ថ្ងៃដោយរហូតមកដល់ពេលនេះសម្រេចបានប្រហែល ៣០ ភាគរយហើយ ខណៈការសាងសង់អាចនឹងរួចរាល់នៅរយៈពេល ៣ ឆ្នាំខាងមុខ។
ទោះយ៉ាងណាលោកប្រាប់ថា៖ «រយៈពេលសាងសង់អាចនឹងមានការប្រែប្រួលខ្លះ ប្រសិនបើតម្រូវការទីផ្សារប្រែប្រួល»។ លោកបានបន្ថែមថា អគារការិយាល័យខ្ពស់ជាងគេនេះនឹងត្រូវរចនាជាការិយាល័យផង និងកន្លែងស្នាក់នៅផង (SOHO) ដើម្បីតម្រូវតាមតម្រូវការទីផ្សារ។
បើតាមលោក ចំរើន នៅក្នុងគម្រោង Olympia City ទាំងមូលមានអគារសរុបចំនួន ១២ ដែលរួមមាន ខុនដូ ផ្សារទំនើប អគារពាណិជ្ជកម្ម អគារការិយាល័យ និងសណ្ឋាគារជាដើម។ រហូតមកដល់ពេលនេះអគារខុនដូចំនួន ៤ អគារការិយាល័យចំនួន ២ និងផ្សារទំនើបចំនួន ១ បានបញ្ចប់ការសាងសង់ និងបើកដំណើរការហើយ។
កាលពីពេលកន្លងមកលោក ទូច សំណាង អគ្គនាយករងក្រុមហ៊ុន OCIC ធ្លាប់បានប្រាប់សារព័ត៌មានក្នុងស្រុកថា គម្រោង Olympia City គ្រោងចំណាយប្រាក់ប្រមាណ ៥០០ លានដុល្លារ លើផ្នែកសំណង់ដែលទំហំទឹកប្រាក់នេះមិនរាប់បញ្ចូលតម្លៃដីនៅតំបន់នេះនៅឡើយទេ។ គម្រោង Olympia City បានចាប់ផ្តើមសាងសង់កាលពីអំឡុងឆ្នាំ ២០១២ លើផ្ទៃដីជាង ៦ ហិកតា។
លោក ឡុង គឹមសួគ៌ នាយកប្រតិបត្តិក្រុមហ៊ុនអចលនទ្រព្យ Century 21 Advanced Property បានប្រាប់ថា តម្រូវការអគារការិយាល័យ និងសណ្ឋាគារកំពុងមានកំណើនខ្ពស់នៅរាជធានីភ្នំពេញតាមរយៈកំណើននៃការមកដល់នៃវិនិយោគិនថ្មីៗ និងការបើកអាជីវកម្មចម្រុះជាច្រើន។
លោកបន្តថា ខណៈចំនួនក្រុមហ៊ុនថ្មីៗកំពុងកើនឡើងច្រើនស្របពេលតម្លៃផ្ទះជួលសម្រាប់បើកការិយាល័យកើនឡើងកាន់តែខ្ពស់ និងមិនមានចំណតត្រឹមត្រូវនោះបានធ្វើឲ្យតម្រូវការអគារការិយាល័យកើនឡើងយ៉ាងច្រើននាពេលនេះ។ ចំណែកសណ្ឋាគារក៏មានការសាងសង់ច្រើនដែរ ដើម្បីបម្រើដល់កំណើនតម្រូវការរបស់អ្នកវិនិយោគ និងភ្ញៀវទេសចរ។
លោកមានប្រសាសន៍ថា៖ «សក្តានុពលនៃទីតាំងរបស់គម្រោង Olympia City នឹងធ្វើឲ្យគម្រោងនេះងាយស្រូបបានអតិថិជន»។
លោកបញ្ជាក់ថា កំណើនប្រជាជនក្នុងរាជធានីភ្នំពេញបានធ្វើឲ្យមានតម្រូវការបន្ថែមលើគ្រប់វិស័យ។
អ្នកគ្រប់គ្រងទូទៅនៃសមាគមអ្នកសាងសង់កម្ពុជាលោក ជីវ ស៊ីវផេង បាននិយាយថា ស្ថិរភាពនយោបាយ និងកំណើនសេដ្ឋកិច្ចបានធ្វើឲ្យសំណង់ធំៗ និងខ្ពស់ៗបានលេចឡើងនៅគ្រប់ទីកន្លែងនៅក្នុងរាជធានីភ្នំពេញ។ លោកបន្តថា នៅគ្រប់ការដ្ឋានសាងសង់សុទ្ធតែមានសកម្មភាពមមាញឹក និងមានការដ្ឋានខ្លះដំណើរការសាងសង់ទាំងយប់ទាំងថ្ងៃ។
លោកនិយាយថា៖ «ការសាងសង់មានសកម្មភាពនៅគ្រប់កន្លែងក្នុងរាជធានីភ្នំពេញដែលនេះមានន័យថា ទីផ្សារកំពុងមានសម្ទុះខ្លាំង»។
ទិន្នន័យពីក្រសួងរៀបចំដែនដី នគរូបនីយកម្ម និងសំណង់បង្ហាញថាគិតត្រឹមខែតុលាឆ្នាំនេះនៅកម្ពុជាមានអគារកម្ពស់ចាប់ពី ៣០ ជាន់ឡើងទៅចំនួន ១៣៣ អគារ៕ LA