ភ្នំពេញៈ គណៈកម្មការអន្តររដ្ឋាភិបាលអាស៊ានទទួលបន្ទុកសិទ្ធិមនុស្ស Asean Intergovernmental Commission on Human Rights (អាយឆា-AICHR) ប្រចាំកម្ពុជា បានរៀបចំកិច្ចសន្ទនាថ្នាក់តំបន់ស្ដីពី «ការបញ្ជ្រាបសិទ្ធិទទួលបានការអប់រំក្នុងសហគមន៍អាស៊ាន» លើកទី ២ រយៈពេល ៣ ថ្ងៃ (២០-២២) នៅភ្នំពេញ ដើម្បីប្រមូលធាតុចូលពីបណ្ដាប្រទេសក្នុងអាស៊ាន និងភាគីពាក់ព័ន្ធក្នុងការបញ្ជ្រាបសិទ្ធិទទួលបានការអប់រំស្របតាមសសរស្ដម្ភទាំង ៣ របស់អាស៊ាន និងលើកកម្ពស់កិច្ចសហប្រតិបត្ដិការថ្នាក់តំបន់ស្ដីពីសិទ្ធិទទួលបានការអប់រំ។
លោកស្រី ហ៊ាន ប៉ូលីណេ តំណាងកម្ពុជាប្រចាំអាយឆា (AICHR-Cambodia) នៃទីស្តីការគណៈរដ្ឋមន្ត្រី និងជាអនុប្រធានគណៈកម្មាធិការសិទ្ធិមនុស្សកម្ពុជាបានថ្លែងប្រាប់ភ្នំពេញប៉ុស្ដិ៍ក្នុងកិច្ចពិភាក្សានេះនៅសណ្ឋាគារភ្នំពេញកាលពីម្សិលមិញថា កិច្ចពិភាក្សានេះគឺជាកម្មវិធីលើកទី ២ ដែលកម្ពុជាបានធ្វើជាម្ចាស់ផ្ទះ ក្រោយពីបានរៀបចំលើកទី ១ កាលពីខែ វិច្ឆិកា ឆ្នាំ ២០១៧ នៅភ្នំពេញដែរ ដើម្បីប្រមូលធាតុចូលពីបណ្ដាប្រទេសក្នុងអាស៊ាន និងភាគីពាក់ព័ន្ធក្នុងការបញ្ជ្រាបសិទ្ធិទទួលបានការអប់រំ និងលើកកម្ពស់កិច្ចសហប្រតិបត្ដិការថ្នាក់តំបន់ពីសិទ្ធិទទួលបានការអប់រំ។
លោកស្រីថ្លែងថា៖ «គោលបំណងនៃកិច្ចពិភាក្សានេះ គឺដើម្បីបញ្ជ្រាបសិទ្ធិទទួលបានការអប់រំស្របតាមសសរស្ដម្ភទាំង ៣ របស់សមាគមប្រជាជាតិអាស៊ីអាគ្នេយ៍ (អាស៊ាន) រួមមាន សហគមន៍សន្តិសុខនយោបាយ សហគមន៍សេដ្ឋកិច្ច និងសហគមន៍វប្បធម៌សង្គម» ។
លោកស្រីបន្តថា ការរៀបចំកិច្ចពិភាក្សានេះក៏ជាវេទិកាមួយសម្រាប់លើកកម្ពស់ និងទាក់ទាញធាតុចូលពីអង្គភាព និងស្ថាប័នផ្សេងៗរបស់អាស៊ានដើម្បីទទួលបានអនុសាសន៍ផ្សេងៗពាក់ព័ន្ធនឹងសិទ្ធិទទួលបានការអប់រំស្របតាមសសរស្ដម្ភទាំង ៣ របស់អាស៊ានផងដែរ។
លោកស្រី ប៉ូលីណេ ថ្លែងថាតាមរយៈកិច្ចពិភាក្សានេះមានសិក្ខាកាមចូលរួមជាង ១០០ នាក់មកពីស្ថាប័ន និងអង្គភាពផ្សេងៗរបស់អាស៊ានទាំង ១០ រួមនឹងស្ថាប័នផ្សេងៗទៀតមួយចំនួនទៀតដែលធ្វើការងារទទួលបន្ទុកលើការងារសិទ្ធិមនុស្ស និងការអប់រំរបស់អង្គភាពអាស៊ានទាំងមូលបូករួមជាមួយនឹងអង្គការអន្តរជាតិ អង្គការសហប្រជាជាតិ និងអង្គការក្រៅរដ្ឋាភិបាលមួយចំនួនផងដែរ ។
លោកស្រី ប៉ូលីណេ បញ្ជាក់ថា៖ «បើប្រៀបធៀបការអប់រំរបស់កម្ពុជាទៅនឹងប្រទេសក្នុងតំបន់អាស៊ានអ្វីដែលកម្ពុជាបាន និងកំពុងធ្វើកន្លងមកនេះគឺមានភាពល្អប្រសើរ។ យើងបានលើកកម្ពស់ការអប់រំរបស់កម្ពុជាដល់កម្រិតមួយដ៏គួរឲ្យកត់សម្គាល់។ យើងអាចមើលឃើញថា បើប្រទេសកម្ពុជាយើងមិនមានការលើកកម្ពស់វិស័យអប់រំ និងសិទ្ធិមនុស្សបានល្អទេក៏យើងមិនអាចធ្វើជាម្ចាស់ផ្ទះក្នុងការរៀបចំកិច្ចពិភាក្សាក្រោមប្រធានបទនៃសិទ្ធិទទួលបានការអប់រំក្នុងពេលនេះដែរ»។
លោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជាបានថ្លែងក្នុងកិច្ចពិភាក្សានេះកាលពីម្សិលមិញដែរថា សមិទ្ធផលចុងក្រោយដែលកម្ពុជាទទួលបានគឺការចូលរួមលើកកម្ពស់ និងថែរក្សាសិទ្ធិមនុស្ស និងសិទ្ធិទទួលបានការអប់រំទាំងកម្រិតថ្នាក់ជាតិ និងអន្ដរជាតិ។
លោកបានថ្លែងថា៖ «ឆ្នាំនេះគឺជាខួបគម្រប់ ៤០ ឆ្នាំ របស់កម្ពុជានៃការរំដោះខ្លួនចេញពីរបបវាលពិឃាតប៉ុលពត។ របបវាលពិឃាតនេះ គឺជារបបមួយដែលបានបិទសិទ្ធិមនុស្សជាតិគ្រប់បែបយ៉ាងនៅកម្ពុជា រួមទាំងសិទ្ធិក្នុងការរស់រានមានជីវិតផងដែរ ។ ក្រោយការរំដោះខ្លួនចេញពីរបបវាលពិឃាតក្នុងឆ្នាំ ១៩៧៩ រាជរដ្ឋាភិបាលកម្ពុជាបានដោះស្រាយ និងប្ដេជ្ញាក្នុងការថែរក្សាប្រទេសកម្ពុជាមិនឲ្យធ្លាក់ទៅក្នុងរបបដ៏ខ្មៅងងឹតនេះម្ដងទៀតទេ»។
លោក កែវ រ៉េមី ថ្លែងថាក្នុងនាមជាប្រទេសសមាជិកអាស៊ាន កម្ពុជាបង្កើតសមិទ្ធផលជាច្រើនក្នុងនោះរួមមាន ទាំងសមត្ថភាពរបស់យុវជនក្នុងភាពជាអ្នកដឹកនាំទាំងក្នុងប្រទេស និងក្នុងតំបន់ផងដែរ។
លោកបន្ដថា៖ «ជាគំនិតផ្គួចផ្ដើម រាជរដ្ឋាភិបាលកម្ពុជាបានប្ដេជ្ញាក្នុងការធ្វើឲ្យវិស័យអប់រំនៅក្នុងប្រទេសកម្ពុជារឹតតែមានភាពទូលំទូលាយ និងអាចទទួលយកបានសម្រាប់យុវជនជំនាន់ក្រោយ»៕