.jpg)
កិច្ចពិភាក្សារវាងមន្ត្រីក្រសួងការងារ និងមន្ត្រី UN កាលពីថ្ងៃទី ៩ ខែធ្នូនៅខេត្តសៀមរាប។ រូបថត ក្រសួងការងារ
ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈបានឲ្យដឹងថា គណៈប្រឹក្សាភិបាលនៃកម្មវិធីរួមគ្នារបស់អង្គការសហប្រជាជាតិ «រួមគ្នាដើម្បីមុខរបរ និងការងាររបស់យុវជននៅកម្ពុជា» គ្រោងនឹងចាប់អនុវត្តជំហានទី ២ នៃ «គម្រោងការងារសមរម្យសម្រាប់យុវជនក្នុងប្រទេសកម្ពុជា» រយៈពេល ៤ ឆ្នាំដែលចំណាយទឹកប្រាក់ជាង ៨ លានដុល្លារបន្តទៀត ក្រោយពីទទួលបានជោគជ័យក្នុងគម្រោងទី ១។
ការបញ្ជាក់នេះធ្វើឡើងក្នុងកិច្ចប្រជុំលើកទី ៥ នៃការចូលរួមជាសហប្រធានដឹកនាំ និងសម្របសម្រួលដោយលោក ហេង សួរ រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ និងលោកស្រី Pauline Tamesis អ្នកសម្របសម្រួលរបស់អង្គការសហប្រជាជាតិប្រចាំនៅកម្ពុជា ចាប់ពីថ្ងៃទី ៩-១០ ខែធ្នូ នៅសណ្ឋាគារសោមាទេវីអង្គររីសត និងស្ប៉ា។ នេះបើតាមទំព័រហ្វេសប៊ុករបស់ក្រសួងការងារកាលពីថ្ងៃចន្ទ។
ក្រសួងបញ្ជាក់ថា៖ «កិច្ចប្រជុំបានអនុម័តទៅលើគោលការណ៍ប្រតិបត្តិនៃគណៈប្រឹក្សាភិបាល ក្រុមប្រឹក្សាយោបល់ គណៈកម្មការត្រួតពិនិត្យបច្ចេកទេស។ អនុម័ត និងដាក់ឱ្យដំណើរការកម្មវិធីរួមគ្នាជំហានទី ២ សម្រាប់រយៈពេល ៤ ឆ្នាំចាប់ពីខែមករា ឆ្នាំ ២០២០ ដល់ឆ្នាំ ២០២៣»។
គម្រោងការងារសមរម្យសម្រាប់យុវជនក្នុងប្រទេសកម្ពុជាដែលគ្រោងនឹងបន្តរយៈពេល ៤ ឆ្នាំទៀតនេះបានទទួលការគាំទ្រពីការរួមវិភាគទានពីរាជរដ្ឋាភិបាលកម្ពុជា ភ្នាក់ងារស្វ៊ីសដើម្បីការអភិវឌ្ឍ និងកិច្ចសហប្រតិបត្តិការ (SDC) ទីភ្នាក់ងារចូលរួមរបស់អង្គការសហប្រជាជាតិ និងដៃគូឯកជននានា។
បើតាមទំព័រហ្វេសប៊ុកក្រសួងការងារដដែលបានឲ្យដឹងថា ជំហានទី ១ នៃគម្រោងរួមគ្នានេះត្រូវបានអនុវត្តក្នុងខែកញ្ញា ឆ្នាំ ២០១៧ និងត្រូវបានបញ្ចប់ដោយជោគជ័យនៅក្នុងខែវិច្ឆិកា ឆ្នាំ ២០១៩ ដែលមានរយៈពេល ២ ឆ្នាំ ដោយចំណាយថវិកាសរុបចំនួន ៤ ៤៧៨ ០០០ ដុល្លារអាមេរិក ក្រោមជំនួយគាំទ្រសប្បុរសធម៌ និងការចូលរួមជាយុទ្ធសាស្ត្រពីទីភ្នាក់ងារស្វ៊ីសសម្រាប់ការអភិវឌ្ឍ និងកិច្ចសហប្រតិបត្តិការ (SDC) និងទីភ្នាក់ងាររបស់អង្គការសហប្រជាជាតិដោយមានការសហការជាដៃគូជាមួយនឹងរាជរដ្ឋាភិបាលកម្ពុជា។
ក្រសួងការងារបញ្ជាក់ថា៖ «ជំហានទី ១ បានរួមចំណែកក្នុងការសម្រួលដល់ការចូលក្នុងទីផ្សារការងាររបស់យុវជន និងបានកាត់បន្ថយបញ្ហាវិសមភាព ជាពិសេសសម្រាប់ក្រុមដែលបាត់បង់ឱកាស និងងាយរងគ្រោះ និងធានាថា យុវនារី និងយុវជនមានសមត្ថភាពកាន់តែខ្ពស់ឆ្លើយតបទៅនឹងតម្រូវការរបស់ទីផ្សារការងារបានកាន់តែល្អជាងមុន»។
លោក ហេង សួរ អ្នកនាំពាក្យក្រសួងការងារមិនអាចសុំការអត្ថាធិប្បាយបន្ថែមជុំវិញគម្រោងជំហានទី ២ នេះបានទេកាលពីម្សិលមិញ ព្រោះតែលោកមិនលើកទូរស័ព្ទ។
យ៉ាងណាក្តីក្រសួងការងារបានលើកឡើងនៅក្នុងទំព័រហ្វេសប៊ុករបស់ខ្លួនពីក្តីរំពឹងទុកថា ជំហានទី ២ នេះនឹងបន្តរួមចំណែកផ្តល់ឱកាសដល់យុវជនទាំងបុរស និងស្ត្រីកាន់តែច្រើនឲ្យទទួលបានការងារសមរម្យ និងប្រកបដោយផលិតភាព ដើម្បីសម្រេចបាននូវរបៀបវារៈអភិវឌ្ឍន៍ឆ្នាំ ២០៣០ ជាពិសេសគោលដៅទី ៨ «លើកកម្ពស់កំណើនសេដ្ឋកិច្ច ផលិតភាពការងារ និងការងារសមរម្យប្រកបដោយចីរភាព និងបរិយាប័ន្នសម្រាប់ជនគ្រប់រូប» ដែលស្របទៅនឹងចក្ខុវិស័យកម្ពុជា។
លោក អាត់ ធន់ ប្រធានសហភាពការងារកម្ពុជាបានសាទរចំពោះការបន្តគម្រោងជាលើកទី ២ របស់អង្គការសហប្រជាជាតិរវាងក្រសួងការងារនៅពេលនេះដើម្បីធ្វើឲ្យប្រសើរឡើងនៅក្នុងវិស័យការងារនៅកម្ពុជាជាពិសេសសម្រាប់យុវជនក្នុងការទទួលបានឱកាសការងារដែលមានជំនាញច្បាស់លាស់ ស្របពេលដែលកម្ពុជានៅខ្វះកម្មករជំនាញជាច្រើន។
លោកបន្តថា៖ «អនុវត្តធ្វើយ៉ាងម៉េចបង្កើតឲ្យមានឯកសារ និងធនធានមនុស្សឲ្យបានច្រើនបន្ទាប់មកគឺបណ្តុះបណ្តាលបង្កើតជំនាញទៅដល់យុវជនយើងឲ្យបានច្រើន ហើយការណែនាំដល់យុវជន និងនិស្សិតឲ្យរៀនជំនាញ ឬបំណិនជីវិតរបស់គាត់នេះគឺជារឿងសំខាន់ហើយពេលនេះគឺជាការល្អបំផុតសម្រាប់កម្ពុជា ព្រោះសេវាកម្មឌីជីថល ៤.០ ហ្នឹងគឺវាជ្រាបចូលហើយមកស្រុកខ្មែរ»។ បន្ថែមពីនេះលោក អាត់ ធន់ ក៏ចង់ឃើញកិច្ចសហប្រតិបត្តិការនេះត្រូវពង្រីកបន្ថែមទៀតទៅដល់ក្រុមកម្មករនៅតាមរោងចក្រកាត់ដេរ ជាពិសេសផ្តល់ឱកាសចូលរួមដល់ក្រុមសហជីព ដើម្បីជាការរួមចំណែកមួយក្នុងវិស័យការងារនៅកម្ពុជាផងដែរ៕
