.jpg)
លោក ស៊ុយ សែម និងអគ្គរដ្ឋទូតចិនក្នុងពិធីសម្ពោធមន្ទីរពិសោធន៍ម្សិលមិញ។ រូប FN
កំពង់ឆ្នាំងៈ មន្ទីរពិសោធន៍ភូគព្ភសាស្ដ្រជាតិនៃកម្ពុជានៃក្រសួងរ៉ែ និងថាមពលជាជំនួយរបស់ប្រទេសចិនក្រោយពីប្រើពេលសាងសង់អស់ជាង ២ ឆ្នាំ ចំណាយថវិកាប្រមាណ ៣ លានដុល្លារអាមេរិក បានសម្រេចសម្ពោធដាក់ឲ្យប្រើប្រាស់ជាផ្លូវការដោយរដ្ឋមន្ដ្រីក្រសួងរ៉ែ និងថាមពល និងឯកអគ្គរដ្ឋទូតចិនប្រចាំកម្ពុជាកាលពីថ្ងៃពុធម្សិលមិញនៅខេត្ដកំពង់ឆ្នាំង។
លោក យស មុនីរ៉ាត់ អគ្គនាយកនៃអគ្គនាយកដ្ឋានធនធានរ៉ែបានប្រាប់ភ្នំពេញប៉ុស្ដិ៍ពីម្សិលមិញថា មន្ទីរពិសោធន៍នេះជាជំនួយឥតសំណងរបស់ក្រសួងធនធានធម្មជាតិ និងរដ្ឋបាលស្វយ័តខេត្ដគ័ងស៊ីនៃសាធារណរដ្ឋប្រជាមានិតចិនស្ថិតនៅឃុំលង្វែក ស្រុកកំពង់ត្រឡាច ខេត្តកំពង់ឆ្នាំង។
លោកបញ្ជាក់ថា៖ «សារៈសំខាន់នៃមន្ទីរពិសោធន៍នេះ គឺដើម្បីឲ្យកម្ពុជាមានមន្ទីរពិសោធន៍ផ្នែកភូគព្ភសាស្ដ្រ និងធនធានរ៉ែដោយខ្លួនឯងនៅប្រទេស កម្ពុជា។ ព្រោះកន្លងមករហូតដល់បច្ចុប្បន្ននេះរាល់សំណាករ៉ែទាំងអស់ បើសិនជាចង់ដឹងថាសំណាកនោះជារ៉ែអ្វីមានគុណភាពបែបណានោះ គឺយើងត្រូវបញ្ជូនសំណាកនោះទៅសិក្សានៅក្រៅប្រទេសទាំងអស់»។
លោកបន្ដថា៖ «យើងមានមន្ទីរពិសោធន៍ដែរ នៅវិទ្យាស្ថានបច្ចេកវិទ្យាកម្ពុជា។ ប៉ុន្ដែវាមានទ្រង់ទ្រាយតូច យើងអាចត្រឹមពិនិត្យមើលបានតិចតួច។ បើសិនជាយើងចង់ពិនិត្យមើលសំណាកថ្ម ១ ដុំ ថា មានសារធាតុរ៉ែអ្វីខ្លះនៅមន្ទីរពិសោធន៍ចាស់យើងមិនអាចមើលបានទេ។ ប៉ុន្ដែមន្ទីរពិសោធន៍ថ្មីនេះ យើងមានលទ្ធភាពពិនិត្យសំណាករ៉ែបានច្រើនមុខ»។
លោក យស មុនីរ៉ាត់ បានឲ្យដឹងទៀតថា មន្ទីរពិសោធន៍ភូគព្ភសាស្ដ្រថ្មីនេះគឺជាស្ថាប័នថ្នាក់ជាតិរបស់រដ្ឋដែលអាចធ្វើការវិភាគសំណាកធនធានរ៉ែនៅកម្ពុជាបានច្រើនមុខ ដោយអ្នកជំនាញក្នុងស្រុកបានទៅសិក្សានៅក្រៅប្រទេសផ្ទាល់តែម្ដង។
សេចក្ដីប្រកាសព័ត៌មានរបស់ក្រសួងរ៉ែ និងថាមពលស្តីពីការប្រគល់ទទួល និងសម្ពោធដាក់ឲ្យប្រើប្រាស់ជាផ្លូវការមន្ទីរពិសោធន៍ភូគព្ភសាស្ដ្រជាតិនៃកម្ពុជាពីម្សិលមិញនេះបានឲ្យដឹងថា ក្នុងពិធីសម្ពោធនេះលោក ស៊ុយ សែម រដ្ឋមន្ដ្រីក្រសួងរ៉ែ និងថាមពល និងលោក Wang Wentian ឯកអគ្គរដ្ឋទូតវិសាមញ្ញ និងពេញសមត្ថភាពសាធារណរដ្ឋប្រជាមានិតចិនប្រចាំកម្ពុជាចូលរួមជាអធិបតី។ ពិធីនេះក៏មានការចូលរួមពីថ្នាក់ដឹកនាំក្រសួងរ៉ែ និងថាមពល គណៈប្រតិភូនៃក្រសួងធនធានធម្មជាតិ និងរដ្ឋបាលស្វយ័តខេត្ដគ័ងស៊ី គណៈអភិបាលខេត្ដកំពង់ឆ្នាំង អាជ្ញាធរមូលដ្ឋាន មន្ទីររ៉ែ និងថាមពលរាជធានី-ខេត្ដ ព្រមទាំងពលរដ្ឋសរុបប្រមាណ ៧០០ នាក់ផងដែរ។
សេចក្ដីប្រកាសបញ្ជាក់ថា៖ «គិតចាប់ពីថ្ងៃបើកការដ្ឋានសាងសង់មកត្រឹមថ្ងៃសម្ពោធដាក់ឲ្យប្រើប្រាស់ជាផ្លូវការមន្ទីរពិសោធន៍ភូគព្ភសាស្ដ្រជាតិនៃកម្ពុជានេះបានប្រើពេលវេលាសាងសង់សរុបអស់រយៈពេល ២ ឆ្នាំ និង ១ ខែ និងចំណាយថវិកាប្រមាណ ៣ ០០០ ០០០ ដុល្លារអាមេរិក លើទំហំផ្ទៃដី ១៤ ០០០ ម៉ែត្រក្រឡា»។
លោក យស មុនីរ៉ាត់ បានបន្ថែមថា ការងារទ្វេភាគីរវាងប្រទេសកម្ពុជា និងប្រទេសចិនគឺបានផ្ដោតសំខាន់ទៅលើការអភិវឌ្ឍវិស័យរ៉ែ។ ដូច្នេះក្រោយពីបើកដាក់ឲ្យប្រើប្រាស់មន្ទីរពិសោធន៍ធនធានរ៉ែនេះ ក្រសួងរ៉ែក៏ដូចជាប្រទេសកម្ពុជានៅតែមានកិច្ចសហប្រតិបត្ដិការបន្ថែមទៀតលើការបណ្ដុះបណ្ដាលធនធានមនុស្ស ការសិក្សាស្រាវជ្រាវលើវិស័យរ៉ែនៅកម្ពុជា។
លោកបន្ដថា បច្ចុប្បន្នប្រទេសកម្ពុជាមានការបើកចំហលើវិស័យរ៉ែចំពោះបណ្ដាប្រទេសនានាលើការវិនិយោគលើវិស័យរ៉ែ។ បច្ចុប្បន្នវិស័យរ៉ែរបស់កម្ពុជានៅមិនទាន់មានការរីកចម្រើនខ្លាំងនៅឡើយ ដូច្នេះកម្ពុជាបើកចំហគ្រប់ទាំងអស់ការសហប្រតិបត្ដិការទ្វេភាគី ពហុភាគី ក៏ដូចជាការវិនិយោគឯកជន ឲ្យតែមានប្រទេសណាមានចំណាប់អារម្មណ៍ធ្វើការសិក្សាស្រាវជ្រាវ ឬការវិនិយោគ៕
