.jpg)
ប្រទេសកម្ពុជា និងប្រទេស ម៉ូណាកូ បានបង្កើតទំនាក់ទំនងរវាងគ្នាដើម្បីជំរុញការយោគយល់គ្នាទៅវិញទៅមក និងពង្រឹងមិត្តភាព និងកិច្ចសហប្រតិបត្តិការរវាងប្រជាជននៃប្រទេសទាំង ២ កាលថ្ងៃទី ១១ ខែកក្កដា។ Ministry of Foreign Affairs
ភ្នំពេញៈ ប្រទេសកម្ពុជា និងប្រទេស ម៉ូណាកូ បានបង្កើតទំនាក់ទំនងរវាងគ្នាដើម្បីជំរុញការយោគយល់គ្នាទៅវិញទៅមក និងពង្រឹងមិត្តភាព និងកិច្ចសហប្រតិបត្តិការរវាងប្រជាជននៃប្រទេសទាំង ២។នេះបើតាមការផ្សព្វផ្សាយក្នុងសេចក្ដីថ្លែងការណ៍រួមចុះថ្ងៃទី ១១ ខែកក្កដា ដែលភ្នំពេញប៉ុស្ដិ៍ទើបទទួលបានកាលពីម្សិលមិញ។
សេចក្តីថ្លែងការណ៍រួមស្តីពីការបង្កើតទំនាក់ទំនងការទូតរវាងប្រទេសទាំង ២ ដែលចុះហត្ថលេខាដោយឯកអគ្គរាជទូតវិសាមញ្ញ និងពេញសមត្ថភាពរបស់កម្ពុជាប្រចាំប្រទេស បារាំង និងឯកអគ្គរាជទូតវិសាមញ្ញ និងពេញសមត្ថភាពម៉ូណាកូប្រចាំប្រទេស បារាំង បានឱ្យដឹងថា ទំនាក់ទំនងការទូតនេះគឺឈរលើគោលបំណង និងគោលការណ៍នៃធម្មនុញ្ញអង្គការសហប្រជាជាតិ និងច្បាប់អន្តរជាតិ។
សេចក្តីថ្លែងការណ៍ដដែលបន្តថា ទំនាក់ទំនងការទូតនេះក៏ត្រូវបានធ្វើឡើងក្នុងបំណងគោរព និងលើកកម្ពស់សន្តិភាព និងសន្តិសុខអន្តរជាតិ សមភាពរវាងរដ្ឋ និងរដ្ឋអធិបតេយ្យ ឯករាជភាព កិច្ចព្រមព្រៀងអន្តរជាតិ បូរណភាពទឹកដី និងការមិនជ្រៀតជ្រែកកិច្ចការផ្ទៃក្នុងគ្នា។
សេចក្តីថ្លែងការណ៍បញ្ជាក់ថា៖ «ជាសក្ខីភាព ឯកអគ្គរាជទូតវិសាមញ្ញ និងពេញសមត្ថភាពនៃប្រទេសទាំង ២ ដោយមានការអនុញ្ញាតពីរដ្ឋាភិបាលរៀងៗខ្លួនបានចុះហត្ថលេខាលើសេចក្តីថ្លែងការណ៍រួមជា ២ ច្បាប់ ជាភាសាខ្មែរ និងភាសាបារាំង ដែលអត្ថបទទាំង ២ មានតម្លៃស្មើគ្នា»។
លោក ផៃ ស៊ីផាន រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកលើកិច្ចការនាំពាក្យរាជរដ្ឋាភិបាលបានប្រាប់ភ្នំពេញប៉ុស្តិ៍ថា ទំនាក់ទំនងការទូតនេះ ឈរលើរដ្ឋធម្មនុញ្ញកម្ពុជា និងគោលនយោបាយបរទេសរបស់រាជរដ្ឋាភិបាលកម្ពុជាដឹកនាំដោយលោកនាយករដ្ឋមន្ត្រី ហ៊ុន សែន។
លោកបានបញ្ជាក់ថា៖ «នៅក្នុងកិច្ចសហប្រតិបត្តិការហ្នឹងមានរឿងច្រើនណាស់ដែលយើងអាចនិយាយរកគ្នា អាចជាផលរំពឹងទុករវាងកម្ពុជា ទៅខាងម៉ូណាកូ ឬក៏ម៉ូណាកូ មកកម្ពុជាគឺសហប្រតិបត្តិការទាំងវិស័យសេដ្ឋកិច្ច ទាំងវិស័យពាណិជ្ជកម្ម និងវិស័យការងារទូត។ ចំណុច៣ហ្នឹងដែលនឹងរួមគ្នាដើម្បីការពារគឺកិច្ចសហប្រតិបត្តិការរួមជាមួយគ្នាហ្នឹងឯង»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា និងជាអ្នកវិភាគនយោបាយ បានថ្លែងថា វាគឺជាការពង្រីកកិច្ចសហប្រតិបត្តិការ និងទំនាក់ទំនងជាមួយបណ្តាប្រទេសផ្សេងៗ។ ម៉ូណាកូ គឺជាប្រទេសតូចមួយ ដែលមិនមានសក្តានុពលទេ។
ប៉ុន្តែក្នុងក្របខ័ណ្ឌទំនាក់ទំនងអន្តរជាតិ កាលណាកម្ពុជាមានចំណងការទូតផ្លូវការជាមួយបណ្តាប្រទេសច្រើន គឺបង្ហាញពីអ្វីដែលហៅថា «សារៈសំខាន់នៃតួនាទីរបស់កម្ពុជានៅក្នុងតួនាទីឆាកអន្តរជាតិ»។
លោក គិន ភា បញ្ជាក់ថា៖ «ការភ្ជាប់ទំនាក់ទំនងការទូតហ្នឹង ផ្តល់ផលចំណេញផ្នែកវិស័យសេដ្ឋកិច្ចអីដុំកំភួនហ្នឹង ខ្ញុំយល់ថា វាមិនមានអីដុំកំភួនគួរឱ្យចាប់អារម្មណ៍ទេ»។
បើតាមលោក គិន ភា ម៉ូណាកូ គឺជារដ្ឋតូចមួយដែលមានភូមិសាស្រ្តស្ថិតនៅក្នុងប្រទេស បារាំង ដែលជាតំបន់ស្វយ័តឯករាជ្យ ដែលគេទទួលស្គាល់ដូចជា រដ្ឋបុរីតូចមួយ៕
