.jpg)
អ្នកចូលរួមនៅក្នុងពិធីកាលពីថ្ងៃម្សិលមិញ។ រូបថត សហការី
ភ្នំពេញៈ ក្រសួងអប់រំ យុវជន និងកីឡា សហការជាមួយវិទ្យាស្ថានជាតិអប់រំនៃប្រទេសសិង្ហបុរី និងមូលនិធិថេម៉ាសេកអន្តរជាតិរៀបចំការបណ្ដុះបណ្ដាល ស្ដីពី «ភាពជាអ្នកដឹកនាំសាលារៀន» រយៈពេល ៣ ឆ្នាំ ដើម្បីអភិវឌ្ឍសមត្ថភាពដឹកនាំសាលារៀនមាននាយក និងនាយករងសាលារៀនឲ្យមានសក្តានុពលកាន់តែខ្ពស់ក្នុងការដឹកនាំ និងគ្រប់គ្រងដំណើរការអប់រំ។
សេចក្ដីប្រកាសព័ត៌មានរបស់ក្រសួងអប់រំពីម្សិលមិញបង្ហាញថា វគ្គបណ្ដុះបណ្ដាលរយៈពេល ៣ ឆ្នាំ ដែលចាប់ពីឆ្នាំ ២០១៩-២០២១ នឹងប្រព្រឹត្តទៅចំនួន ៦ លើក។ ៥ លើកធ្វើនៅព្រះរាជាណាចក្រកម្ពុជា និង ១ លើក នៅប្រទេសសិង្ហបុរី។ វគ្គបណ្តុះបណ្តាលមានសិក្ខាកាមចូលរួមចំនួន ១២៨ នាក់ រួមមានមន្ដ្រីជំនាញដែលមានបទពិសោធក្នុងការងារគ្រប់គ្រងសាលារៀនចំនួន ២០ នាក់។ នាយក និងនាយករងចំនួន ១០៨ នាក់ ជាគណៈគ្រប់គ្រងនៃគ្រឹះស្ថានសិក្សាក្នុងរាជធានីភ្នំពេញ ខេត្ដសៀមរាប បាត់ដំបង កំពង់ចាម និងខេត្ដតាកែវ។
សេចក្ដីប្រកាសព័ត៌មានដដែលឱ្យដឹងថា៖ «ក្នុងអំឡុងពេលនៃកិច្ចសហប្រតិបត្ដិការក្នុងភាពជាដៃគូនេះ ភាគីកម្ពុជា និងភាគីសិង្ហបុរីនឹងមានឱកាសសិក្សាស្វែងយល់ពីស្ថានភាពអប់រំ និងផ្លាស់ប្ដូរបទពិសោធការងារអប់រំនៅក្នុងបរិបទនៃប្រទេសទាំង ២ ផងដែរ»។
លោក ហង់ជួន ណារ៉ុន រដ្ឋមន្ដ្រី ក្រសួង អប់រំ យុវជន និងកីឡាថ្លែងពេលសម្ពោធ កម្មវិធីបណ្ដុះបណ្ដាលនេះថា ដោយមើលឃើញភាពចាំបាច់នៃតួនាទីនាយកសាលា ក្រសួងអប់រំ បាននិងកំពុងខិតខំយកចិត្ដទុកដាក់ជំរុញឱ្យមានការផ្លាស់ប្ដូររីកចម្រើនក្នុងបរិបទសាលារៀន ដើម្បីឆ្លើយតបនឹងការផ្លាស់ប្ដូរយ៉ាងឆាប់រហ័សក្នុងបរិបទតំបន់ និងសកលលោកស្របពេលការប្រែប្រួលក្នុងសង្គមសតវត្សរ៍ទី ២១ បាននាំមកនូវបញ្ហាធំជាច្រើន។ ក្នុងនោះយុវជនកម្ពុជាទទួលបានជំនាញសតវត្សរ៍ទី ២១ នៅមានកម្រិតនៅឡើយ។
លោក ណារ៉ុន ថ្លែងថា៖ «ក្នុងការដោះស្រាយបញ្ហាទាំងនេះ វិស័យអប់រំមានតួនាទីធ្វើយ៉ាងណាជួយឱ្យយុវជនទទួលបានជំនាញសតវត្សរ៍ទី ២១ កាន់តែរឹងមាំ និងឈានទៅសម្រេចគោលដៅអភិវឌ្ឍន៍ប្រកបដោយចីរភាព»។
លោកថា៖ «កម្មវិធីបណ្ដុះបណ្ដាលនេះ គឺជាគន្លឹះសំខាន់មួយឈានទៅដល់ការរួមចំណែកជាមួយក្រសួងអប់រំក្នុងការធ្វើឱ្យមានការផ្លាស់ប្តូររីកចម្រើននៅកម្រិតសាលារៀនកម្ពុជា។ នាយកសាលាអាចអនុវត្ដចំណេះដឹង និងជំនាញស្ដីពីភាពជាអ្នកដឹកនាំសាលារៀនដែលទទួលបានពីកម្មវិធីបណ្ដុះបណ្ដាលនេះប្រកបដោយវិជ្ជាជីវៈក្នុងបេសកកម្មការផលិតធនធានយុវជនកម្ពុជាឱ្យមានជំនាញសតវត្សរ៍ទី ២១ ពិតប្រាកដ»។
លោកឱ្យដឹងទៀតថា ជំនាញដែលនាយកនាយករងសាលារៀននឹងទទួលបានពីកម្មវិធីបណ្ដុះបណ្ដាលនេះរួមមាន ជំនាញគិតបែបស៊ីជម្រៅជំនាញទំនាក់ទំនង ជំនាញដោះស្រាយបញ្ហានានាប្រកបដោយភាពច្នៃប្រឌិត និងជំនាញធ្វើការបែបសហការ។ លោកថាដូច្នេះក្នុងតួនាទីជានាយកសាលាចាំបាច់ត្រូវតែមានជំនាញនេះជាមុន។
នាយកកម្មវិធីមូលនិធិថេម៉ាសេកអន្តរជាតិលោក Stanley Lee ថ្លែងក្នុងឱកាសនោះថា លោករីករាយក្នុងការសហការជាមួយក្រសួងអប់រំរៀបចំការបណ្ដុះបណ្ដាលស្ដីពី «ភាពជាអ្នកដឹកនាំសាលារៀន» នេះឡើង។ លោកនឹងចូលរួមចែករំលែកបទពិសោធនានាមកដល់នាយកសាលារៀននៅកម្ពុជា។
លោកថ្លែងថា៖ «ក្នុងនាមជាប្រជាជនរស់នៅក្នុងប្រទេសតូចមួយក្នុងតំបន់ យើងចង់ចែករំលែកនូវអ្វីដែលយើងធ្លាប់ធ្វើ និងមានបទពិសោធល្អៗ។ យើងក៏ចង់យកឱកាសនេះ ចែករំលែកនូវបញ្ហាប្រឈមដែលយើងបានជួបប្រទះ និងឆ្លងកាត់ ដើម្បីផ្លាស់ប្ដូរនៅក្នុងប្រព័ន្ធអប់រំរបស់យើង»។
លោកបន្ដថាតាមរយៈការសហការគ្នាលើវគ្គបណ្ដុះបណ្ដាលនេះភាគីទាំង ២ នឹងបានធ្វើកិច្ចការងាររួមគ្នារៀនសូត្រពីគ្នាទៅវិញទៅមក និងបង្ហាញអ្វីដែលជាបញ្ហាប្រឈមធ្លាប់ជួបប្រទះនៅពេលមានការផ្លាស់ប្ដូរនៅក្នុងប្រព័ន្ធអប់រំ។
លោក Michael Tan ឯកអគ្គរដ្ឋទូតសិង្ហបុរីប្រចាំកម្ពុជាសាទរចំពោះកិច្ចសហប្រតិបត្ដិការក្នុងវិស័យអប់រំរវាងកម្ពុជា និងសិង្ហបុរី។ លោកថ្លែងថា ស្ថាប័ន អប់រំសិង្ហបុរីតែងតែពិភាក្សាជាមួយក្រសួងអប់រំលើការពង្រឹងភាពជាអ្នកដឹកនាំនៅតាមសាលារៀននេះ។
លោកថ្លែងថា៖ «ការជួបពិភាក្សាជាបន្តបន្ទាប់ពីការពង្រឹងសមត្ថភាព ភាពជាអ្នកដឹកនាំនៅតាមសាលារៀននេះ ដើម្បីលើកទឹកចិត្ដឱ្យអ្នកគ្រប់គ្រងសាលារៀនផ្លាស់ប្ដូរផ្នត់គំនិតនៅក្នុងសាលារៀនរបស់ខ្លួនស្របទៅតាមបរិបទអប់រំនៃសតវត្សរ៍ទី ២១ នេះ»៕
