សៀមរាបៈ រដ្ឋាភិបាលកម្ពុជាតាមរយៈក្រសួងអប់រំ យុវជន និងកីឡាសហការជាមួយកម្មវិធីស្បៀងអាហារពិភពលោកបានបង្ហាញពីការអនុវត្ដជោគជ័យនៃកម្មវិធីផ្ដល់អាហារតាមសាលារៀនក្នុងវេទិកាសកលស្ដីពីអាហារូបត្ថម្ភកុមារលើកទី ២១ កាលពីថ្ងៃចន្ទនៅខេត្ដសៀមរាប។
វេទិកាសកលស្ដីពីអាហារូបត្ថម្ភកុមារត្រូវបានធ្វើឡើងនៅក្នុងក្រុងសៀមរាបរយៈពេល ៥ ថ្ងៃចាប់ពីថ្ងៃទី ២ ដល់ថ្ងៃទី ៦ ខែ ធ្នូ ឆ្នាំ ២០១៩ ដែលរៀបចំឡើងដោយក្រសួងអប់រំសហការជាមួយ Global Child Nutrition Foundation (GCNF) និង World Food Programme Centre of Excellence against Hunger (WFPCoE)។
យោងតាមសេចក្តីប្រកាសព័ត៌មានរបស់ក្រសួងអប់រំដែលចេញនៅក្នុងវេទិកាកាលពីថ្ងៃទី ២ ខែធ្នូ បានឲ្យដឹងថា កម្មវិធីផ្តល់អាហារនៅតាមសាលារៀន គឺជាការផ្តល់លាភការជាអាហារដែលផ្តល់អត្ថប្រយោជន៍ផ្នែកអប់រំ អាហារូបត្ថម្ភ និងសុខភាពដល់កុមារនៅតាមសាលារៀន។
ក្រសួងអប់រំបន្តថា៖ «ក្នុងឆ្នាំសិក្សា ២០១៨-២០១៩ ដោយមានការគាំទ្រពីសំណាក់កម្មវិធីស្បៀងអាហារពិភពលោកនៃអង្គការសហប្រជាជាតិ និងដៃគូអភិវឌ្ឍមួយចំនួនកម្មវិធីផ្តល់អាហារនៅសាលារៀនត្រូវបានអនុវត្តនៅតាមសាលាបឋមសិក្សាចំនួន ១១៦៧ នៅក្នុងខេត្តចំនួន ៨ និងមានកុមារចំនួន ២៦ ម៉ឺននាក់បានទទួលរបបអាហារពេលព្រឹក កុមារប្រមាណ ៨ ពាន់នាក់ ទទួលរបបអាហារូបករណ៍ជាស្បៀង និងប្រមាណ ៥ ម៉ឺននាក់ទៀត ទទួលរបបអាហារពេលព្រឹកដែលប្រើប្រាស់កសិផលសហគមន៍»។
បើតាមក្រសួងអប់រំនៅឆ្នាំ ២០១៩ ដោយទទួលបានថវិកាបន្ថែមពីសំណាក់រាជរដ្ឋាភិបាលកម្ពុជា កម្មវិធីផ្តល់អាហារនៅសាលានឹងពង្រីកវិសាលភាពនៅតាមខេត្តចំនួន ៦ បន្ថែមទៀតដែលគ្របដណ្តប់បន្ថែមលើសាលាបឋមសិក្សាចំនួន ២០៥ និងមានកុមារប្រមាណ ៥ ម៉ឺននាក់បានទទួលផល។
ការបង្កើនវិសាលភាពកម្មវិធីផ្ដល់អាហារនៅសាលារៀននេះធ្វើឱ្យបរិមាណអង្ករដែលត្រូវប្រើប្រាស់ក្នុងកម្មវិធីផ្តល់អាហារនៅសាលារៀននឹងកើនដល់ជិត ៨ ពាន់តោន ដែលក្នុងនោះអង្ករជាង ២ ៥០០ តោន និងបន្លែជិត ៨០០ តោន នឹងត្រូវទិញដោយផ្ទាល់ពីសហគមន៍។
ក្រសួងបញ្ជាក់ថា កម្មវិធីផ្តល់អាហារនៅសាលារៀនជាអាទិភាពដ៏ចម្បងដូចមានចែងក្នុងផែនការយុទ្ធសាស្ត្រអប់រំ ២០១៩-២០២៣ និងក្នុងគោលនយោបាយជាតិស្តីពីកិច្ចគាំពារសង្គមព្រមទាំងជាមូលដ្ឋាននៃការកសាងមូលធនមនុស្សនៃព្រះរាជាណាចក្រកម្ពុជា ។
លោក ហង់ជួន ណារ៉ុន រដ្ឋមន្ត្រីក្រសួងអប់រំបានថ្លែងក្នុងវេទិកានេះថា ប្រទេសកម្ពុជាបានបង្កើតកម្មវិធីផ្ដល់អាហារតាមសាលារៀនមិនត្រឹមតែជាការកាត់បន្ថយភាពក្រីក្រដល់ប្រជាពលរដ្ឋប៉ុណ្ណោះទេ ប៉ុន្ដែគឺជាការលើកកម្ពស់ថែរក្សា និងការអភិវឌ្ឍសង្គមនៃធនធានមនុស្ស និងស្របតាមគោលការណ៍នៃការអភិវឌ្ឍសហស្សវត្ស៍។
លោកថ្លែងថា៖ «កម្មវិធីនេះបានលើកទឹកចិត្ដដល់មាតាបិតា អាណាព្យាបាលកុមារនៅក្នុងសហគមន៍ក្នុងការចូលរួមជាមួយសាលារៀនក្នុងសហគមន៍ពួកគេ»។
លោក អូន ព័ន្ធមុន្នីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានថ្លែងក្នុងវេទិកានេះដែរថា រាជរដ្ឋាភិបាលកម្ពុជាតែងតែចាត់ទុកអាហារូបត្ថម្ភជាកិច្ចការសំខាន់សម្រាប់ការលូតលាស់របស់មនុស្សជាពិសេសសម្រាប់កុមារអាយុ ១ ០០០ ថ្ងៃដំបូង (អាយុ ៣ ឆ្នាំ) ដើម្បីឱ្យពួកគេមានការរីកលូតលាស់ទាំងផ្នែករាងកាយ និងផ្នែកបញ្ញា។ រដ្ឋាភិបាលបានប្តេជ្ញាចិត្តលុបបំបាត់ អត្រាក្រិនរបស់កុមារអាយុក្រោម ៥ ឆ្នាំ នៅត្រឹមឆ្នាំ ២០២៥ និងកង្វះអាហារូបត្ថម្ភនៅត្រឹមឆ្នាំ ២០៣០។
លោក អូន ព័ន្ធមុន្នីរ័ត្ន ថ្លែងថា៖ «រាជរដ្ឋាភិបាលនឹងវិនិយោគបន្ថែមទៀត ដើម្បីពង្រីកការអប់រំជាមូលដ្ឋានកែលម្អវិស័យសុខាភិបាល កាត់បន្ថយអត្រាមរណភាពមាតា និងទារក បង្កើនអាហារូបត្ថម្ភ និងការគាំពារសង្គម និងការងារពាក់ព័ន្ធដទៃទៀត ដើម្បីអភិវឌ្ឍមូលធនមនុស្សឱ្យមានផលិតភាពខ្ពស់»។
លោកស្រី Francesca Erdelmann នាយិកាប្រចាំប្រទេសអង្គការកម្មវិធីស្បៀងអាហារពិភពលោកបានឲ្យដឹងថា កម្មវិធីស្បៀងអាហារពិភពលោកបានចាប់ផ្ដើមគម្រោង កម្មវិធីផ្ដល់អាហារតាមសាលារៀនតាមរយៈកម្មវិធីផ្ដល់អាហារតាមសាលា (School feeding program) តាំងពីឆ្នាំ ១៩៩៩ និងកម្មវិធីទិញកសិផលពីសហគមន៍ ដើម្បីធ្វើអាហារដល់កុមារនៅសាលាតាំងពីឆ្នាំ ២០១៤ រហូតដល់បច្ចុប្បន្នដែលបានផ្ដល់អាហារដល់សាលាមត្ដេយ្យ និងបឋមសិក្សាជាង ១ ពាន់សាលារៀន។
លោកស្រីថ្លែងថា៖ «តាមរយៈកម្មវិធីផ្ដល់អាហារដល់កុមារនៅតាមសាលារៀននេះគឺបានធ្វើឲ្យកុមារចូលសិក្សាបានច្រើនជាងមុន និងមានសុខភាពល្អ ហើយការសិក្សាក៏មានលទ្ធផលល្អប្រសើរជាងមុនផងដែរ។ ចំពោះកម្មវិធីទិញកសិផលពីសហគមន៍ដើម្បីយកមកធ្វើអាហារដល់កុមារ យើងបានផ្សារភ្ជាប់រវាងពលរដ្ឋដែលរស់នៅសហគមន៍ទៅនឹងកម្មវិធីផ្ដល់អាហារនៅសាលារៀនដែលអាចឲ្យប្រជាពលរដ្ឋក្នុងសហគមន៍មានមុខរបរដាំដុះបន្លែយកមកលក់ឲ្យសាលាដើម្បីចម្អិនឲ្យកុមារបរិភោគនៅពេលព្រឹក និងថ្ងៃត្រង់»។
លោកស្រី Valerie Guarnieri, ជំនួយការ កម្មវិធីស្បៀងអាហារពិភពលោកថ្លែងថា សុខភាព និងការបំបៅដោះកូនមានភាពល្អប្រសើរជាងមុន។ កុមារដែលខ្វះអាហារូបត្ថម្ភប្រមាណ ៧២ លាននាក់ ក្នុងពិភពលោកបានទៅសាលាក្នុងនោះមាន ១០ លាននាក់ គឺជាកុមារនៅតាមប្រទេសក្នុងតំបន់អាស៊ី។
លោកស្រីថ្លែងថា៖ «វេទិកានេះពិតជាបានដើរតួយ៉ាងសំខាន់ក្នុងការចូលរួមរបស់រាជរដ្ឋាភិបាល ដើម្បីជំរុញការផ្ដល់អាហារដល់កុមារតាមសាលារៀន ដល់ប្រទេសពួកគេ និងពិភពលោកផងដែរ»៕