ភ្នំពេញៈ រាជរដ្ឋាភិបាល និងប្រជារាស្ត្រខ្មែរនៅទូទាំងប្រទេសកាលពីថ្ងៃទី ១៥ ខែ តុលា ម្សិលមិញបាននាំគ្នាគោរពព្រះវិញ្ញាណក្ខន្ធព្រះបរមរតនកោដ្ឋព្រះបាទសម្តេចព្រះនរោត្តម សីហនុ គម្រប់ខួប ៧ ឆ្នាំ នៃការសោយទិវង្គតរបស់ព្រះអង្គ ខណៈសម្តេចព្រះមហាក្សត្រីនរោត្តម មុនិនាថ សីហនុ បានប្រទានព្រះរាជសារចុះថ្ងៃទី ១ ខែ វិច្ឆិកា ឆ្នាំ ២០១២ ដែលបានរៀបរាប់អំពីអាការរបស់ព្រះបាទសម្តេច ព្រះនរោត្តម សីហនុ មុនពេលដែលព្រះអង្គសោយទិវង្គត ដើម្បីឲ្យប្រជារាស្ត្របានជ្រាប។
នៅក្នុងព្រះរាជសារដែលត្រូវបានចុះផ្សាយលើគេហទំព័រហ្វេសប៊ុក Royal du Cambodge កាលពីថ្ងៃទី ១៣ តុលាឆ្នាំនេះ សម្តេចព្រះមហាក្សត្រីបានរៀបរាប់ថានៅយប់ថ្ងៃទី ១៤ ខែ តុលា ឆ្នាំ ២០១២ ព្រះករុណា ព្រះបាទសម្តេច នរោត្តម សីហនុ ព្រះបរមរតនកោដ្ឋ ព្រះអង្គ ចាប់ផ្តើមចាប់ចុកព្រះឱរាព្រះហទយៈ (បេះដូង)។ ភ្លាមៗជាបន្ទាន់នោះសម្តេចព្រះមហាក្សត្រីព្រមទាំងកូនចៅចាំគាល់បម្រើហ្លួងនៅក្រុងប៉េកាំងបានយាងសម្តេចឪចាកចេញពីព្រះរាជដំណាក់ទីក្រុងប៉េកាំងទៅកាន់មន្ទីរពេទ្យយ៉ាងប្រញាប់ប្រញាល់ ។
នៅក្នុងព្រះរាជសារនោះសម្តេចព្រះមហាក្សត្រី នរោត្តម មុនិនាថ សីហនុ បានរៀបរាប់អំពីព្រះរាជសកម្មភាព ចុងក្រោយបំផុតនៃព្រះជន្មព្រះបរមរតនកោដ្ឋថា នៅក្នុងមន្ទីរពេទ្យសម្តេចម៉ែ ទ្រង់បានទូរស័ព្ទមកកាន់ព្រះករុណា ព្រះបាទ សម្តេច ព្រះបរមនាថ នរោត្តម សីហមុនីព្រះមហាក្សត្រនៃព្រះរាជាណាចក្រកម្ពុជាដែលគង់ប្រថាប់នៅឯរាជធានីភ្នំពេញដើម្បីទូលថ្វាយព្រះករុណាជាអម្ចាស់ឲ្យទ្រង់បានជ្រាបពីអាការប្រឈួនព្រះវររាជបិតាទ្រង់ ហើយសម្តេចម៉ែក៏បានយកទូរស័ព្ទនោះទៅថ្វាយព្រះករុណាព្រះបរមរតនកោដ្ឋ ព្រះវររាជបិតាជាតិខ្មែរទ្រង់ព្រះសណ្តាប់។ ក្រោយពីព្រះសណ្តាប់ព្រះរាជបន្ទូលរបស់ព្រះរាជបុត្រហើយព្រះអង្គញញឹម និងមានព្រះរាជឱង្ការ ២-៣ ព្រះឱស្ឋ ដោយសារតែព្រះអង្គប្រឈួនខ្លាំង ។
ជាមួយគ្នានេះលោកនាយករដ្ឋមន្ត្រី ហ៊ុន សែន ខណៈកំពុងដឹកនាំគណៈប្រតិភូជាន់ខ្ពស់បំពេញបេសកកម្មនៅក្នុងប្រទេសអឺរ៉ុបកណ្ដាលដើម្បីចូលរួមក្នុងកិច្ចប្រជុំកំពូលស្តីពី «ទឹក» លើកទី ៣ នៅប្រទេស ហុងគ្រី ដែលត្រូវបានប្រារព្ធឡើងនៅថ្ងៃទី ១៥ ខែតុលា ម្សិលមិញដែរនោះ ក៏បានបង្ហោះសារចូលរួមគោរពព្រះវិញ្ញាណក្ខន្ធគម្រប់ខួប ៧ ឆ្នាំ នៃការសោយទិវង្គតរបស់ព្រះបរមរតនកោដ្ឋ ព្រះបាទសម្តេច នរោត្តម សីហនុ ផងដែរតាមរយៈបណ្ដាញទំនាក់ទំនងសង្គមផ្ទាល់ខ្លួនរបស់លោក។
ដោយបានបង្ហាញអំពីការគោរពដឹងគុណដ៏ខ្ពង់ខ្ពស់បំផុតថ្វាយចំពោះព្រះបរមរតនកោដ្ឋលោកនាយករដ្ឋមន្ត្រីបានគូសបញ្ជាក់ថា៖ «ទោះបីព្រះអង្គបានសោយទិវង្គតទៅហើយក្តី ក៏ប្រជារាស្ត្រទូទាំងប្រទេសនៅចងចាំចំពោះព្រះរាជបូជនីយកិច្ចដ៏ឧត្តុង្គឧត្តមបំផុតរបស់ព្រះអង្គ។ ប្រជារាស្ត្រទូទាំងប្រទេសចងចាំគ្មានថ្ងៃបំភ្លេចបានចំពោះស្នាព្រះហស្តព្រះអង្គក្នុងការទាមទារឯករាជ្យជាតិពីបារាំងនៅថ្ងៃទី ៩ ខែ វិច្ឆិកា ឆ្នាំ ១៩៥៣ ដែលបានធ្វើឲ្យកម្ពុជាងើបមុខមាត់រីកចម្រើនជាបន្តបន្ទាប់រហូតមកដល់សព្វថ្ងៃ»។
ជាមួយគ្នានេះលោកបានប្តេជ្ញាបន្តដង្ហែតាមព្រះរាជតម្រិះដ៏ខ្ពង់ខ្ពស់បំផុតរបស់ព្រះបរមរតនកោដ្ឋដើម្បីផ្តល់សុខសន្តិភាពជូនប្រជារាស្ត្រខ្មែរ និងថែរក្សាការពារព្រះមហាក្សត្រ និងសម្តេចម៉ែដើម្បីព្រះអង្គទាំងទ្វេគង់ជាម្លប់ដ៏ត្រជាក់សម្រាប់ប្រទេសជាតិទាំងមូល។
ព្រះករុណា ព្រះបាទសម្តេចនរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិបានប្រសូតនៅថ្ងៃទី ៣១ ខែ តុលា ឆ្នាំ ១៩២២ និងបានយាងចូលទិវង្គតកាលពីថ្ងៃទី ១៥ ខែតុលា ឆ្នាំ ២០១២ នៅទីក្រុងប៉េកាំង ប្រទេសចិនក្នុងព្រះជន្មាយុ ៩០ ព្រះវស្សា។
អតីតព្រះមហាក្សត្រ សម្តេចព្រះនរោត្តម សីហនុ គឺជាឥស្សរជនលេចធ្លោបំផុតក្នុងឆាកនយោបាយកម្ពុជាក្នុងរយៈពេលប្រមាណជា ៧ ទសវត្សរ៍កន្លងទៅ។ អតីតព្រះមហាក្សត្រ ព្រះបរមរតនកោដ្ឋ ទ្រង់គ្រងរាជបល្ល័ង្ករហូតដល់ទៅ ២ លើកហើយបានដាក់រាជ្យ ២ លើក។
ទ្រង់គឺ ជាតួអង្គ និងជាសាក្សីដ៏ចម្បងបំផុតនៃប្រវត្តិសាស្ត្រខ្មែរសម័យទំនើបរាប់ចាប់តាំងពីកម្ពុជាស្ថិតក្រោមអាណានិគមបារាំង សម័យរុងរឿងក្រោយឯករាជ្យ ទំព័រខ្មៅងងឹតនៃរបបខ្មែរក្រហម រហូតដល់យុគសម័យសន្តិភាព ការផ្សះផ្សាជាតិ និងការបង្កើតរបប រាជានិយមអាស្រ័យរដ្ឋធម្មនុញ្ញនៅក្នុងទសវត្សរ៍ទី ៩០។ ស្នាព្រះហស្តរបស់ព្រះបរមរតនកោដ្ឋ ដែលគេមិនអាចបំភ្លេចបានមួយទៀតគឺព្រះរាជបូជនីយកិច្ចទាមទារឯករាជ្យពីប្រទេសបារាំង។
កាលពីចុងខែតុលាឆ្នាំ ២០១១ ក្នុងឱកាសនៃព្រះរាជពិធីចម្រើនព្រះជន្មយាងចូល ៩០ ព្រះវស្សារបស់ព្រះបរមរតនកោដ្ឋ ព្រះបាទសម្ដេច នរោត្តម សីហនុ ព្រះអង្គបានមានព្រះរាជបន្ទូលទៅកាន់ជនរួមជាតិរបស់ព្រះអង្គថា៖ «យើងមិនចង់ធ្វើមហាអំណាចទេ តែចង់ឲ្យពិភពលោកដឹងថាយើងរួមគ្នា»។
សម្រាប់ព្រះបរមរតនកោដ្ឋ ព្រះអង្គចង់តែបង្ហាញឲ្យពិភពលោកបានដឹងអំពីការរួបរួមគ្នានៃប្រជាជាតិខ្មែរ ហើយព្រះអង្គមានព្រះរាជបន្ទូលបញ្ជាក់ថា៖ «សាមគ្គីជាកម្លាំង»៕