.jpg)
យុទ្ធនាការប្រយុទ្ធប្រឆាំងនឹងជំងឺគ្រុនចាញ់នៅកម្ពុជាកាលពីពេលកន្លងទៅ។ ហ្វេសប៊ុក
មណ្ឌលគិរីៈ ស្របពេលដែលទិវាពិភពលោកជំងឺគ្រុនចាញ់ត្រូវធ្វើឡើងថ្ងៃទី ២៥ ខែ មេសា ខាងមុខ ប្រទេសកម្ពុជាបានប្រារព្ធទិវានេះនៅស្រុកកោះញែកខេត្តមណ្ឌលគិរីនៅថ្ងៃចន្ទនេះដើម្បីលើកកម្ពស់ការយល់ដឹងពីជំងឺគ្រុនចាញ់នៅដំណាក់កាលចុងក្រោយដល់ពលរដ្ឋ ក្នុងបំណងចូលរួមលុបបំបាត់ជំងឺនេះឲ្យអស់ក្នុងឆ្នាំ ២០២៥។
លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលបានប្រាប់ភ្នំពេញបុស្តិ៍កាលពីម្សិលមិញថា ការប្រារព្ធពិធីនេះធ្វើឡើងដោយផ្តោតលើប្រធានបទ “គ្មានជំងឺគ្រុនចាញ់ផ្តើមចេញពីខ្ញុំ” ដើម្បីបញ្ជ្រាបនូវចំណេះដឹងបន្ថែមទៀតជូនដល់ពលរដ្ឋលើកិច្ចការពារ ការរួមគ្នាលុបបំបាត់ជំងឺគ្រុនចាញ់។
លោកស្រី បានបញ្ជាក់ថា៖ «ជំរុញធ្វើម៉េចឱ្យបុគ្គលគ្រប់រូបជាពិសេសគឺប្រជាជនចល័ត ដែលគាត់បំផ្លាស់ទីពីកន្លែងមួយទៅកន្លែងមួយ ហើយប្រកបរបរផ្សេងៗឱ្យគាត់កាន់តែយល់ដឹង ឱ្យគាត់ចូលរួមក្នុងនាមបុគ្គល ផ្តើមចេញពីបុគ្គលក្នុងកិច្ចការពារកុំឱ្យឆ្លងជំងឺគ្រុនចាញ់ហើយឱ្យបុគ្គលនីមួយៗហ្នឹងចេះជួយគ្នាទៅវិញទៅមក។ ប្រសិនបើគាត់ធ្វើដំណើរទៅណាមកណាហ្នឹង ឱ្យប្រើប្រាស់មុងជ្រលក់ថ្នាំ សម្រាន្តក្នុងមុងជ្រលក់ថ្នាំដើម្បីការពារកុំឱ្យឆ្លងនូវជំងឺគ្រុនចាញ់»។
លោកស្រី លើកឡើងថា ការប្រយុទ្ធប្រឆាំងជំងឺគ្រុនចាញ់នៅដំណាក់កាលចុងក្រោយនេះគឺត្រូវផ្តើមចេញពីបុគ្គល ហើយប្រសិនបើពួកគាត់ធ្វើតេស្តទៅឃើញមេរោគគឺត្រូវទទួលបានការព្យាបាលត្រឹមត្រូវជាបន្ទាន់ដើម្បីកុំឱ្យស្លាប់ និងកុំឱ្យមេរោគបន្តនៅក្នុងខ្លួន។
បើតាមសេចក្ដីប្រកាសរួមគ្នារបស់ក្រសួងសុខាភិបាល និង WHO កាលពីថ្ងៃទី ១៩ ខែមេសាបានបញ្ជាក់ថា ការប្រារព្ធពិធីនេះមានការចូលរួមពីលោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងលោក Takeshi Kasai នាយកអង្គការសុខភាពពិភពលោក (WHO) ដើម្បីគាំទ្រ និងតាំងចិត្តផ្នែកនយោបាយក្នុងការប្រយុទ្ធប្រឆាំងនឹងជំងឺគ្រុនចាញ់ឱ្យបានជោគជ័យ ខណៈនៅស្រុកកោះញែកកំពុងមានជំងឺគ្រុនចាញ់ខ្ពស់នៅឡើយ។
តាមសេចក្តីប្រកាសដដែលបានបញ្ជាក់ថា៖ «យើងគាំទ្រយ៉ាងពេញទំហឹងដល់សហគមន៍ដើម្បីចូលរួមជំរុញការលុបបំបាត់ជំងឺគ្រុនចាញ់។យើងធ្វើការជួបជុំគ្នានៅស្រុកកោះញែកនាពេលនេះជាការត្រឹមត្រូវ។ ការលុបបំបាត់ជំងឺគ្រុនចាញ់ឱ្យអស់ពីតំបន់ចុងក្រោយនេះគឺជាជំហានដ៏សំខាន់មិនមែនសម្រាប់តែមហាអនុតំបន់ទន្លេមេគង្គទេ តែសម្រាប់ពិភពលោកទាំងមូល»។
លោកស្រី ឱ វណ្ណឌីន បានឲ្យដឹងដែរថា ពិធីនេះក៏ជំរុញឱ្យខេត្តសេសសល់ដទៃទៀតដែលមានជំងឺគ្រុនចាញ់ត្រូវអនុវត្តវិធានការបន្ថែមលើចំណុច ៤ ផងដែរដើម្បីលុបបំបាត់ជំងឺគ្រុនចាញ់ ក្នុងនោះ ទី១- ចុះជួបប្រជាជនគោលដៅផ្ទាល់ ទី២- ផ្តល់ការអប់រំសុខភាពទៅដល់ប្រជាពលរដ្ឋ ទី៣- ធ្វើតេស្តដើម្បីរកមេរោគគ្រុនចាញ់ និងទី៤-ផ្តល់ថ្នាំព្យាបាលទៅដល់ប្រជាពលរដ្ឋ (ប្រសិនរកឃើញមេរោគគ្រុនចាញ់)។
បើតាមលោកស្រី ឱ វណ្ណឌីន តំបន់សេសសល់ចុងក្រោយដែលនៅមានជំងឺគ្រុនចាញ់នេះរួមមាន ខេត្តពោធិ៍សាត់ កំពង់ស្ពឺ កំពង់ឆ្នាំង ព្រះវិហារ ឧត្តរមានជ័យ មណ្ឌលគិរី រតនគិរី ក្រចេះ និងស្ទឹងត្រែង ខណៈដែលកម្ពុជាមានគោលដៅខ្ពស់ក្នុងការលុបបំបាត់ជំងឺគ្រុនចាញ់ឱ្យអស់នៅត្រឹមឆ្នាំ ២០២៥។
លោកស្រី ឱ វណ្ណឌីន បានថ្លែងថា ក្រសួងមានសុទិដ្ឋិនិយមចំពោះគោលដៅនេះ ពីព្រោះបានអនុវត្តដោយជោគជ័យមុនផែនការដែលមិនឲ្យមានអ្នកស្លាប់ដោយសារជំងឺគ្រុនចាញ់ក្នុងឆ្នាំ ២០២០ តែអត្រាមិនមានអ្នកស្លាប់សម្រេចបានតាំងពីឆ្នាំ ២០១៨ មកម្ល៉េះ។
លោកស្រី ឱ វណ្ណឌីន ថា៖ «យើងមានសុទិដ្ឋិនិយមហើយការដែលយើងធ្វើមិនឱ្យមានអ្នកស្លាប់គឺពិបាកណាស់។ ក្រោយយើងដាក់ចេញយុទ្ធសាស្ត្រចេញមកយើងធ្វើបានជោគជ័យហើយ មុនការកំណត់ ២-៣ ឆ្នាំទៀត។ អត្រាស្លាប់ដោយសារជំងឺគ្រុនចាញ់នៅឆ្នាំ ២០១៨ គឺអត់មានអ្នកស្លាប់ទេ ហើយយើងបានកំណត់ថាសូន្យ (មិនមានអ្នកស្លាប់) នៅឆ្នាំ ២០២០។អ៊ីចឹងអ្វីដែលយើងត្រូវធ្វើបន្តគឺត្រូវតែខិតខំធ្វើម៉េចកាត់បន្ថយនិងលុបបំបាត់នូវការឆ្លងជំងឺគ្រុនចាញ់»។
ខណៈកាលពីឆ្នាំមុន កម្ពុជាមិនមានអ្នកស្លាប់ដោយសារជំងឺគ្រុនចាញ់នោះ អត្រាឈឺជំងឺគ្រុនចាញ់ប្រភេទ Plasmodium falciparum ដែលគំរាមកំហែងដល់អាយុជីវិតត្រូវបានកាត់បន្ថយបានប្រមាណ ៣០% បើប្រៀបធៀបទៅនឹងឆ្នាំ ២០១៧។ នេះបើយោងតាមសេចក្តីប្រកាសរួម។
លោក Tedros Adhanom Ghebreyesus អគ្គលេខាធិការអង្គការសុខភាពពិភពលោកបានលើកឡើងតាមរយៈសេចក្តីប្រកាសនោះថា៖ «នៅទីបំផុតការវិនិយោគទៅលើការផ្តល់សេវាសុខភាពគឺជាវិធីសាស្ត្រដ៏ល្អបំផុតដើម្បីធានាថាសហគមន៍ទាំងអស់អាចទទួលបានសេវាសុខភាពដែលពួកគេត្រូវការដើម្បីប្រយុទ្ធប្រឆាំងនឹងជំងឺគ្រុនចាញ់។
លោកថា៖ «ការផ្តល់សិទ្ធិអំណាចដល់បុគ្គលនិងសហគមន៍តាមរយៈគំនិតផ្តួចផ្តើមនៅសហគមន៍ដូចជា “គ្មានជំងឺគ្រុនចាញ់ផ្តើមចេញពីខ្ញុំ” អាចដើរតួសំខាន់ក្នុងការលុបបំបាត់ជំងឺគ្រុនចាញ់»៕
