.jpg)
យន្តហោះចុះចតនៅព្រលានយន្តហោះអន្តរជាតិភ្នំពេញកន្លងមក។ ហុង មិនា
ភ្នំពេញៈ កម្ពុជាលែងមានជើងហោះហើរត្រង់ពីទីក្រុងវូហានដែលជាកន្លែងផ្ទុះជំងឺរលាកសួត បង្កដោយវីរុសកូរ៉ូណាប្រភេទថ្មី (nCoV2019) នោះទៀតហើយ គឺចាប់តាំងពីថ្ងៃទី ២៦ ខែមករាមកជាថ្ងៃដែលរដ្ឋាភិបាលប្រជាមានិតចិនបានប្រកាសផ្អាកជើងហោះហើរទាំងអស់ក្នុងប្រទេស ចិន ទៅទីក្រុងនេះ ប៉ុន្តែជើងហោះហើរពីកម្ពុជាទៅបណ្តាខេត្តដទៃទៀតនៅក្នុងប្រទេសចិនគឺនៅបន្តសកម្មភាពជាធម្មតា។ នេះបើតាមមន្ត្រីអាកាសចរស៊ីវិល។
បន្ទាប់ពីការចម្លងវីរុសប្រភេទថ្មីមានការរីករាលដាលកាន់តែអាក្រក់ដែលនាំឲ្យប្រជាជនចិនជាង ១០០ នាក់ បានបាត់បង់អាយុជីវិត និងជាង ៤ ពាន់នាក់បានឆ្លងជំងឺនេះ រដ្ឋាភិបាលប្រជាមានិតចិនបានប្រកាសផ្អាកការហោះហើរទាំងអស់នៅក្នុងប្រទេស ចិន មិនថាជើងហោះហើរក្នុងស្រុក និងជើងហោះហើរអន្តរជាតិនោះទេ គឺត្រូវផ្អាកជាបន្ទាន់ទៅកាន់ទីក្រុងវូហាន។ ការសម្រេចផ្អាករបស់រដ្ឋាភិបាលចិននេះគឺធ្វើឡើងដើម្បីបង្កលក្ខណៈងាយស្រួលក្នុងការទប់ស្កាត់ និងគ្រប់គ្រងវីរុសដ៏សាហាវនេះ កុំឲ្យមានការរីករាលដាលបន្ថែមទៀត។
លោក ជា អូន រដ្ឋលេខាធិការប្រចាំការ និងជាអ្នកនាំពាក្យអាកាសចរស៊ីវិល បានប្រាប់ភ្នំពេញប៉ុស្តិ៍ពីថ្ងៃចន្ទថា៖ «ការហោះហើរទៅទីក្រុងវូហានក្នុងពេលនេះគឺមិនមានទៀតនោះទេ ព្រោះតែក្រុមហ៊ុនហោះហើរទាំងនោះបានឈប់ បន្ទាប់ពីរដ្ឋាភិបាលប្រទេសចិនបានប្រកាសផ្អាកហោះហើរទៅក្រៅប្រទេស ជាពិសេសគឺពីទីក្រុងវូហានតែម្តង»។
លោក ស៊ីន ចាន់សិរីវុត្ថា អគ្គនាយករង និងជាអ្នកនាំពាក្យអាកាសចរស៊ីវិលដែរនោះក៏បានប្រាប់ភ្នំពេញប៉ុស្តិ៍ពីថ្ងៃចន្ទដែរថា មានក្រុមហ៊ុនអាកាសចរណ៍ចំនួន ២ គឺ Lan Mei Airline និង JC Airline ដែលមានទីតាំងក្នុងប្រទេសកម្ពុជា និងមានជើងហោះហើរត្រង់ទៅទីក្រុងវូហានបានបញ្ឈប់ជើងហោះហើរ។
លោកឲ្យដឹងថា កម្ពុជាគឺមិនមានច្បាប់ក្នុងការហាមឃាត់មិនឲ្យមានការហោះហើរនោះទេ គឺមានតែវិធានការការពារ និងព្យាបាល ប៉ុន្តែដោយសារតែប្រទេសចិនខ្លួនឯងផ្ទាល់បានប្រកាសហាមចេញចូលទីក្រុងនេះ និងដើម្បីការពារការរីករាលដាលនៃជំងឺមកកាន់ប្រទេស កម្ពុជា ទើបក្រុមហ៊ុនទាំង ២ នេះសម្រេចផ្អាកជើងហោះហើរតែម្តង។
លោកបញ្ជាក់ថា៖ «តាមពិតប្រទេសចិនជាអ្នកបិទមិនឲ្យមនុស្សក្នុងទីក្រុងហ្នឹង ចេញ-ចូលធ្វើដំណើរនោះទេ។ ម្យ៉ាងទៀតនោះ គឺក្រុមហ៊ុន Airline ខ្លួនឯង គឺមិនចង់ហោះទៅទេ ហើយទីក្រុងនោះក៏ឈប់ទទួលអ្នកដំណើរដែរ។ ដូចនេះមិនមែនអាជ្ញាធរយើងជាអ្នកចេញបញ្ជា និងហាមឃាត់នោះទេ»។
លោក ចាន់សិរីវុត្ថា បានឲ្យដឹងទៀតថា ក្រៅពីផ្អាកជើងហោះហើរទៅទីក្រុងវូហាន ចំពោះជើងហោះហើរពីកម្ពុជាទៅបណ្តាខេត្តដទៃទៀតនៅក្នុងប្រទេស ចិន និងជើងហោះហើរទៅបណ្តាប្រទេសផ្សេងទៀតនៅលើពិភពលោក គឺនៅបន្តសកម្មភាពជាធម្មតា។
លោកបន្ថែមថា៖ «ប្រទេសផ្សេងទៀតមិនមានការផ្អាកអីទេ ហើយបើមានការផ្អាក គឺអាស្រ័យទៅលើក្រុមហ៊ុនអាកាសចរណ៍ខ្លួនឯង ព្រោះយើងមិនមានបម្រាមផ្អាកគាត់ទេ។ ការផ្អាកជើងហោះហើរទាំងនេះគឺទទួលស្គាល់ ពិតជាមានផលប៉ះពាល់ជាអវិជ្ជមាន ក៏ប៉ុន្តែយើងត្រូវតែចូលរួមទាំងអស់គ្នា ហើយក្រុមហ៊ុននេះគេមិនបារម្ភនឹងការខាតបង់ទេ គឺគេធ្វើម៉េចកុំឲ្យមានផលប៉ះពាល់ពីជំងឺនេះ»។
បើតាមលោក ចាន់សិរីវុត្ថា ក្នុង ១ សប្តាហ៍កម្ពុជាមានជើងហោះហើរទៅកាន់ប្រទេសចិនជាង ២០០ ជើងក្នុងនោះក្រុមហ៊ុនហោះហើររបស់កម្ពុជាទៅទីក្រុងវូហានមានចំនួន ២ ជើងត្រូវបានផ្អាក ចំណែកក្រុមហ៊ុនរបស់ចិនដែលហោះហើរពីវូហានមកកម្ពុជាជាច្រើនទៀត ក៏ត្រូវបានផ្អាកតាមការបញ្ជារបស់រដ្ឋាភិបាលចិនផងដែរ។
ជាមួយនឹងការជាប់គាំងមិនមានការចេញចូលក្នុងទីក្រុងវូហាននេះដែរ រហូតមកពេលនេះ ក្រសួងការបរទេសកម្ពុជាបានបញ្ជាក់ថា និស្សិតកម្ពុជាចំនួន ២៣ រូបកំពុងស្នាក់នៅក្នុងទីក្រុងវូហានដោយពួកគេកំពុងស្នាក់នៅសាលា Wuhan University Huazhongkeji University Hubei University Wuhan Ligong University Huazhong Normal University Naval University of Engineering។
លោក កុយ គួង អ្នកនាំពាក្យក្រសួងការបរទេសកម្ពុជាបានប្រាប់ភ្នំពេញប៉ុស្តិ៍ ថា ស្ថានភាពនិស្សិតខ្មែរចំនួន ២៣ នាក់ ដែលកំពុងស្នាក់នៅក្រុងវូហាន ខេត្តហ៊ូប៉េ ដែលក្នុងនោះមាន ៣ រូប ជានិស្សិតផ្នែកយោធា គឺកំពុងស្ថិតក្នុងសុខភាពល្អធម្មតា។
លោកបន្តថា ស្ថានទូត និងស្ថានអគ្គកុងស៊ុលខ្មែរប្រចាំប្រទេសចិនបានទាក់ទង និងសួរសុខទុក្ខពលរដ្ឋកម្ពុជាជាប្រចាំ និងត្រៀមផ្តល់ជំនួយគ្រប់ពេល។ លោកបញ្ជាក់ថា៖ «Wuhan University បានផ្តល់អាហារ ៣ ពេលដល់និស្សិតបរទេសទាំងអស់ដោយមិនគិតថ្លៃ ដោយឡែកចំពោះសាលាដទៃទៀតបានបើកដំណើរការកង់ទីនជាធម្មតា ចំណែកម៉ាតនៅជិតសាលាក៏បើកដំណើរការធម្មតា»។
លោកបញ្ជាក់បន្ថែមថា៖ «ស្ថានអគ្គកុងស៊ុលបានទំនាក់ទំនងជាប្រចាំជាមួយមន្ទីរការបរទេស ខេត្តហ៊ូប៉េ និងសាលាស្នើសុំជួយសហការថែទាំ និងផ្គត់ផ្គង់ចំណីអាហារដល់និស្សិតកម្ពុជា។ អាជ្ញាធរខេត្តហ៊ូប៉េបានឆ្លើយតប និងបន្តជួយឲ្យអស់ពីលទ្ធភាពដែលអាចធ្វើបាន»។
វីរុសរលាកសួតប្រភេទថ្មីដែលមានឈ្មោះថា novel coronaviruses មិនទាន់ត្រូវបានបញ្ជាក់ថា មានប្រភពមកពីណាឲ្យប្រាកដនោះទេ ហើយជំងឺនេះក៏មិនទាន់មានព័ត៌មានគ្រប់គ្រាន់ ជុំវិញរបៀបនៃការចម្លង និងការព្យាបាលនៅឡើយនោះដែរ ដោយអង្គការសុខភាពពិភពលោក រួមជាមួយនឹងរដ្ឋាភិបាលចិន គ្រាន់តែបញ្ជាក់ថា ជំងឺនេះស្រដៀងទៅនឹងជំងឺ SARS ឬជំងឺ MERS ដែលបានសម្លាប់មនុស្សរាប់រយនាក់៕
