.jpg)
នគរបាលពិនិត្យរថយន្តបុកគ្នាក្នុងខេត្តកំពង់ស្ពឺ។ រូបថត នគរបាល
កំពង់ស្ពឺៈ កម្មកររោងចក្រ ៣ នាក់ស្លាប់ និង ៦ នាក់រងរបួសរួមទាំងអ្នកបើកបរម្នាក់ ក្រោយពីរថយន្ត ២ គ្រឿងបុកគ្នានៅលើផ្លូវជាតិ ៤១ កាលពីយប់ថ្ងៃទី ១៨ ខែកញ្ញានៅក្នុងស្រុកសំរោងទង ខេត្តកំពង់ស្ពឺ ។ នេះបើយោងតាមសេចក្ដីប្រកាសព័ត៌មានរបស់ក្រសួងការងារ និងបណ្ដុះបណ្ដាលវិជ្ជាជីវៈ។
សេចក្ដីប្រកាសព័ត៌មានដដែលនេះបានឲ្យដឹងថា ជនរងគ្រោះទាំងអស់បានទទួលការជួយសង្គ្រោះពីសំណាក់អាជ្ញាធរមានសមត្ថកិច្ច និងមន្ត្រីបេឡាជាតិរបបសន្ដិសុខសង្គមនៃក្រសួងការងារ និងបណ្ដុះបណ្ដាលវិជ្ជាជីវៈដោយយកចិត្តទុកដាក់។
លោក ចឹក បូរិន ប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តកំពង់ស្ពឺបានប្រាប់ភ្នំពេញប៉ុស្ដិ៍ម្សិលមិញថា ក្នុងចំណោមអ្នករងរបួសទាំង ៧ នាក់គឺមានតែអ្នកបើកបររថយន្តដឹកកម្មករទេដែលរបួសធ្ងន់ជាងគេរហូតបាក់ជើង ហើយត្រូវបានបញ្ជូនមកសង្គ្រោះនៅមន្ទីរពេទ្យព្រះកុសុមៈក្នុងរាជធានី-ភ្នំពេញ ខណៈកម្មកររោងចក្រទាំង ៦ នាក់គឺត្រូវបានបញ្ជូនទៅព្យាបាលនៅតាមមន្ទីរពេទ្យឯកជន និងរដ្ឋនៅក្នុងខេត្ត ។
លោក បូរិន ថ្លែងថា៖ «តៃកុងឡានហ្នឹងបាក់ជើង ដោយសារគាបជាប់នឹងឡាន ប៉ុន្តែស្ថានភាពរបួសកម្មករទាំង ៦ នាក់ពួកគាត់ដួលបោកទៅលើគ្នា និងទៅប៉ះនឹងដែកខ្លះៗ តែវាអត់ធ្ងន់ធ្ងរខ្លាំងទេ»។
លោក វ៉ី សំណាង អភិបាលខេត្តកំពង់ស្ពឺថ្លែងថា ឧបទ្ទវហេតុនេះបង្កឡើងដោយអ្នកបើកបរម្នាក់មិនទាន់ស្គាល់អត្តសញ្ញាណដែលបើករថយន្តម៉ាក Ford ប្រភេទមួយបាំងកន្លះ បើកវ៉ាជែងហើយទៅបុកម៉ូតូ ២ គ្រឿងរួចបន្តទៅបុករថយន្តដឹកកម្មករ ១ គ្រឿងទៀតដែលស្ថិតនៅលើផ្លូវអាទិភាពរបស់ក្រុមជនរងគ្រោះ។ អាជ្ញាធរកំពុងតាមចាប់ខ្លួនជនបង្កដែលបានរត់គេចខ្លួន និងទុករថយន្តចោល៕
