.jpg)
ជនសង្ស័យដែលកាប់សម្លាប់ឪពុកខ្លួនឯង នៅខេត្តព្រៃវែង។ នគរបាល
ព្រៃវែងៈ បុរសជាកូនបង្កើតដែលបានកាប់សម្លាប់ឪពុកជាច្រើនពូថៅនៅភូមិព្រៃរូង ឃុំដំរីពួន ស្រុកស្វាយអន្ទរនោះត្រូវបានអយ្យការអមសាលាដំបូងខេត្តព្រៃវែងចោទប្រកាន់ពីបទឃាតកម្ម និងឃុំខ្លួនបណ្តោះអាសន្នក្នុងពន្ធនាគារខេត្តហើយ កាលពីថ្ងៃទី ២០ មេសា បន្ទាប់ពីបង្កហេតុកាលពីថ្ងៃទី ១៨ មេសា។
ភ្នំពេញប៉ុស្តិ៍មិនអាចទាក់ទងអ្នកនាំពាក្យសាលាដំបូងខេត្តព្រៃវែងបានទេពីម្សិលមិញ ប៉ុន្តែ លោក ពៅ ជីវី ស្នងការរងទទួលផែនព្រហ្មទណ្ឌកម្រិតធ្ងន់ខេត្តព្រៃវែង ប្រាប់ពីម្សិលមិញថាករណីជនសង្ស័យឈ្មោះឡេង ហន អាយុ ២៣ ឆ្នាំដែលកាប់ឪពុកឈ្មោះឡេង សៅ ហៅឡេង ម៉ៅ អាយុ ៥០ ឆ្នាំស្លាប់នោះត្រូវបានសាលាដំបូងខេត្តព្រៃវែងចោទប្រកាន់ និងឃុំខ្លួនបណ្តោះអាសន្នហើយ។
លោកបញ្ជាក់ថា៖ «ជនសង្ស័យត្រូវឃុំខ្លួនតាមដីកាសម្រេចឲ្យឃុំខ្លួនបណ្តោះអាសន្នរបស់តុលាការខេត្តព្រៃវែង។ ចំពោះចៅក្រមដែលចេញដីកាបង្គាប់ឲ្យឃុំខ្លួននោះខ្ញុំមិនបានចាំឈ្មោះទេតែខ្ញុំបានឃើញក្នុងដីកាចោទបទឃាតកម្ម»។
លោក ផឹង វ៉ន នាយនគរបាលប៉ុស្តិ៍ឃុំដំរីពួនឲ្យដឹងដែរថាអំពើហិង្សាក្នុងគ្រួសារ ដែលមានការកាប់សម្លាប់គ្នានេះគ្មានអ្វីជារឿងធំទេប៉ុន្តែគ្រួសារនោះក៏តែងតែឈ្លោះទាស់ទែងគ្នារាល់ថ្ងៃដែរ ដោយសារតែជនរងគ្រោះជាឪពុក និងជាប្តីជាអ្នកបង្កបញ្ហា។
លោកថា៖ «ជនរងគ្រោះកាលពីនៅរស់បង្កជម្លោះក្នុងគ្រួសារហើយវាយប្រពន្ធនឹងខ្នងពូថៅក៏មាន។ ជនរងគ្រោះជាមនុស្សកាចខ្លាំងដែរ បើខឹងកូនប្រពន្ធម្តងៗធ្វើអីប្រពន្ធកូនមិនកើតគាត់យកពូថៅកាប់ក្របីក៏មាន»។
លោករំឭកថាគ្រួសារមួយនេះមានកូនប្រុស ២ នាក់ហើយជនសង្ស័យជាកូនប្រុសច្បង។ មុនពេលកើតហេតុថ្ងៃទី ១៨ មេសាមានការជួបជុំគ្នាផឹកស៊ីនៅផ្ទះកើតហេតុដែលមានមនុស្សប្រមាណជា ៤ ទៅ ៥ នាក់ បន្ទាប់មកអ្នកភូមិបានត្រឡប់ទៅផ្ទះរៀងៗខ្លួននៅសល់តែជនសង្ស័យ និងជនរងគ្រោះផឹកតទល់គ្នា។ ពេលនោះ ២ នាក់ឪពុក និងកូនបានឈ្លោះ គ្នាហើយជនរងគ្រោះបានឡើងទៅលើផ្ទះជាន់ទូរស័ព្ទរបស់កូន (ជនសង្ស័យ) បែកដែលធ្វើឲ្យជនសង្ស័យខឹង។
នាយប៉ុស្តិ៍បន្តថា ក្រោយពីខឹងឪពុកជាន់ទូរស័ព្ទរបស់ខ្លួន ជនសង្ស័យបានស្ទុះយកពូថៅទៅកាប់ក្របីហើយជនរងគ្រោះក៏ស្រែកជេរ និងបានចុះពីលើផ្ទះ។ ប៉ុន្តែជនរងគ្រោះជាន់កាំជណ្តើរបានប៉ុន្មានកាំក៏ត្រូវជនសង្ស័យយកពូថៅកាប់ត្រូវជើងឆ្វេងរបស់ជនរងគ្រោះហើយជនរងគ្រោះក៏លោតចុះមកដី។ តែជនសង្ស័យតាមកាប់មួយពូថៅត្រូវចំខាងក្រោមក្លៀកដួលទៅនឹងដី។
លោកបន្តថា គ្រានោះម្តាយជនសង្ស័យ និងជាប្រពន្ធរបស់ជនរងគ្រោះស្រែកឲ្យអ្នកភូមិមកជួយ ហើយអ្នកភូមិក៏មកចោមរោមបម្រុងចូលចាប់ជនសង្ស័យតែជនសង្ស័យបានស្ទុះទាំងកំហឹងទៅកាប់ជនរងគ្រោះជាឪពុកចំបំពង់កត្រូវ ២ ទៅ ៣ ពូថៅថែមទៀតបណ្តាលឲ្យដាច់ខ្យល់ស្លាប់នៅនឹងកន្លែងតែម្តង។
លោកថា ក្រោយបង្កហេតុជនសង្ស័យឡើងទៅសម្ងំនៅលើផ្ទះ និងកាន់ពូថៅជាប់ ដូច្នេះកម្លាំងសមត្ថកិច្ចមិនហ៊ានចូលទៅចាប់ព្រោះអាចត្រូវជនសង្ស័យកាប់។
ពេលនោះសមត្ថកិច្ចឲ្យសាច់ញាតិជនសង្ស័យនិយាយអង្វររហូតដល់ម៉ោង ៤ ទៀបភ្លឺឈានចូលថ្ងៃទី ១៩ មេសា ទើបជនសង្ស័យព្រមចុះពីលើផ្ទះហើយសមត្ថកិច្ចក៏ចាប់ខ្លួនតែម្តង៕
