ភ្នំពេញៈ តុលាការកំពូលកាលពីថ្ងៃចន្ទម្សិលមិញបានបើកសវនាការលើបណ្ដឹងសុំនៅក្រៅឃុំបណ្ដោះអាសន្នរបស់លោក គង់ រ៉ៃយ៉ា ដែលជាប់ចោទពីបទ «ញុះញង់ឲ្យប្រព្រឹត្តបទល្មើសជាអាទិ៍» ពាក់ព័ន្ធនឹងការអំពាវនាវលក់អាវយឺតមានរូប និងទ្រឹស្តីរបស់លោក កែម ឡី ប៉ុន្តែមិនទាន់ចេញសេចក្តីសម្រេចនៅឡើយទេ ដោយលើកពេលទៅប្រកាសនៅថ្ងៃចន្ទសប្ដាហ៍ក្រោយ។
សវនាការពីម្សិលមិញដឹកនាំដោយលោកចៅក្រម ឃឹម ប៉ុណ្ណ និងមានលោក ឌុច គឹមសន ជាតំណាងអយ្យការ។ ថ្លែងនៅចំពោះមុខសវនាការលោក គង់ រ៉ៃយ៉ា បានលើកឡើងនូវមូលហេតុ ៣ យ៉ាងដែលលោកសម្រេចដាក់ពាក្យស្នើសុំទៅតុលាការដើម្បីសុំនៅក្រៅឃុំ។ មូលហេតុទាំង ៣ នោះគឺទី១ លោកមានម្ដាយចាស់ជរាដែលត្រូវការអ្នកមើលថែ។ ទី២ លោកមានកូនតូចដែលត្រូវមើលថែ ហើយមូលហេតុទី៣ គឺលោកមានអាជីវកម្មបោះពុម្ពអាវយឺតលក់ ដែលពេលនេះកំពុងរាំងស្ទះ ដោយសារតែគ្រួសាររបស់លោកមិនអាចបន្តធ្វើបាន។
លោក គង់ រ៉ៃយ៉ា ត្រូវបានចាប់ឃុំខ្លួននៅថ្ងៃទី ១១ ខែ កក្កដា ឆ្នាំ ២០១៩ ដោយរងការចោទប្រកាន់ពីបទ «ញុះញង់ឲ្យប្រព្រឹត្តបទឧក្រិដ្ឋជាអាទិ៍» ពាក់ព័ន្ធនឹងការអំពាវនាវលក់អាវយឺតមានរូប និងទ្រឹស្តីរបស់លោក កែម ឡី នៅមុនថ្ងៃគម្រប់ខួប ៣ ឆ្នាំនៃឃាតកម្មលើលោក កែម ឡី ដែលត្រូវបានបាញ់សម្លាប់កាលពីថ្ងៃទី ១០ កក្កដា ឆ្នាំ ២០១៦។ កាលពីពាក់កណ្ដាលខែសីហា សាលាឧទ្ធរណ៍បានបដិសេធមិនឲ្យលោក រ៉ៃយ៉ា បាននៅក្រៅឃុំម្ដងរួចហើយ ដោយអវត្តមានជនជាប់ចោទ។
លោក សំ សុគង់ មេធាវីការពារក្ដីរបស់ គង់ រ៉ៃយ៉ា បានថ្លែងកាលពីម្សិលមិញ ក្រោយពេលសវនាការថា ការដាក់កូនក្ដីរបស់លោកឲ្យស្ថិតនៅក្រោមការស៊ើបសួរ បើតាមផ្លូវច្បាប់មិនមានភាពចាំបាច់ក្នុងការឃុំខ្លួនកូនក្ដីលោកបណ្ដោះអាសន្នទេ ដោយសារតែកូនក្ដីរបស់លោកជាប់ចោទបទល្មើសមជ្ឈិម។
ចំណុចមួយទៀតគឺថា ជីវភាពរបស់ គង់ រ៉ៃយ៉ា មានការលំបាក ហើយសុខភាពរបស់គាត់ផ្ទាល់ ក៏មិនល្អទៀត គឺគាត់មានជំងឺលើសឈាម និងលើសជាតិខ្លាញ់។ លោកថ្លែងយ៉ាងដូច្នេះថា៖ «ជាគោលការណ៍អន្តរជាតិ ការឃុំខ្លួនគឺក្នុងគោលបំណងធ្វើការស៊ើបសួរ ហើយក្នុងដីកាស៊ើបសួរក៏បានលើកឡើងដែរថា គឺខ្លាចជនត្រូវចោទត្រូវរ៉ូវគ្នាជាមួយជនជាប់ចោទដទៃទៀត ឬគាបសង្កត់សាក្សី។ ប៉ុន្តែក្នុងសំណុំរឿងគាត់នេះ តុលាការបានជូនដំណឹងបិទការស៊ើបសួរ និងបញ្ជូនទៅជម្រះបានន័យថា កិច្ចស៊ើបសួរ វាអត់ចាំបាច់ទៀតទេ។ អ៊ីចឹងការឃុំខ្លួនក៏លែងមានការចាំបាច់ដែរ អ៊ីចឹងយើងស្នើសុំឲ្យមានការដោះលែងគាត់នៅក្រៅឃុំបណ្ដោះអាសន្ន»។
លោក សំ សុគង់ បានរំឭកពីហេតុផលនៃការចាប់ខ្លួន គង់ រ៉ៃយ៉ា ដោយលោកថ្លែងថា ធ្វើឡើងដោយសារតែ រ៉ៃយ៉ា បានបោះពុម្ពអាវយឺតមានរូប និងសាររបស់លោក កែម ឡី។ ប៉ុន្តែលោកថា រ៉ៃយ៉ា បោះពុម្ពអាវទាំងនោះក្នុងគោលបំណងលក់យកប្រាក់ចំណេញប៉ុណ្ណោះ។
លោកបន្តថា អាវដែលមានរូប និងសារលោក កែម ឡី ត្រូវបាន គង់ រ៉ៃយ៉ា ចាប់ផ្ដើមបោះពុម្ពតាំងពីឆ្នាំ ២០១៧ ប៉ុន្តែនៅពេលនោះមិនមានបញ្ហាកើតឡើងទេ។ ប៉ុន្តែការបោះពុម្ព នៅពេលដែលលោកត្រូវបានចាប់ខ្លួនគឺស្ថិតក្នុងស្ថានភាពរសើបដែលអាជ្ញាធរយល់ថា ការបោះពុម្ពនោះអាចនាំឲ្យមានការចាប់អារម្មណ៍លើករណីលោក កែម ឡី ឡើងវិញ ហើយអាចមានអំពើហិង្សា និងប៉ះពាល់ដល់សណ្ដាប់ធ្នាប់សាធារណៈ។
លោក សំ សុគង់ បញ្ជាក់ថា តុលាការកំពូលនឹងប្រកាសសាលក្រមនៃការស្នើសុំនៅក្រៅឃុំបណ្ដោះអាសន្ននេះនៅព្រឹកថ្ងៃចន្ទទី ៤ ខែវិច្ឆិកា សប្ដាហ៍ក្រោយ។
កាលពីម្សិលមិញអង្គការសមាជិកសភាអាស៊ាន ដើម្បីសិទ្ធិមនុស្ស APHR បានចេញសេចក្ដីថ្លែងការណ៍មួយដោយអំពាវនាវឲ្យទម្លាក់បទចោទ និងដោះលែងលោក គង់ រ៉ៃយ៉ា និងបញ្ឈប់ការបង្ក្រាបលើអ្នកប្រឆាំងផ្សេងទៀត។ APHR អះអាងថាការមិនសម្រេចដោះលែង គង់ រ៉ៃយ៉ា បង្ហាញពីការប្រើប្រាស់ប្រព័ន្ធយុត្តិធម៌មិនត្រឹមត្រូវរបស់អាជ្ញាធរកម្ពុជាក្នុងការរក្សាអ្នកដែលបញ្ចេញមតិរិះគន់ក្នុងឃុំ និងការរក្សាទុកជនចាប់ចោទនៅក្នុងឃុំរយៈពេលយូរ។
លោក Charles Santiago ប្រធាន APHR បានថ្លែងថា គួរមានការស៊ើបអង្កេតដើម្បីបញ្ចប់ចម្ងល់សាធារណជនលើករណីឃាតកម្មលើលោក កែម ឡី ជាជាងចាប់អ្នករិះគន់។
លោក ជិន ម៉ាលីន អ្នកនាំពាក្យក្រសួងយុត្តិធម៌បានលើកឡើងថា គង់ រ៉ៃយ៉ា អាចស្នើសុំនៅក្រៅឃុំបានគ្រប់ពេល ហើយការសម្រេចយ៉ាងណានោះ តុលាការកំពូលមិនទាន់សម្រេចនៅឡើយ។
ចំពោះការទាមទាររបស់ក្រុមអង្គការសភាសិទ្ធិមនុស្សអាស៊ី លោក ម៉ាលីនថ្លែងថា កម្ពុជាមិនចាប់អារម្មណ៍ការលើកឡើងរបស់ក្រុមនេះទេ ដោយសារតែមិនមែនជាយន្តការសិទ្ធិមនុស្សផ្លូវការរបស់អាស៊ាន។
លោកថ្លែងថា៖ «យន្តការសិទ្ធិមនុស្សអាស៊ានផ្លូវការគឺមានតែមួយទេ គឺក្រុមអន្តររដ្ឋាភិបាលសិទ្ធិមនុស្សអាស៊ានហៅកាត់ថា AICHR។ ចំណែកក្រុម APHR ជាក្រុមចលនាប្រឆាំងដែលមានសមាជិកសភាអតីតបក្សប្រឆាំងនៅកម្ពុជា ហើយមានតែប៉ុន្មាននាក់ទេដែលតែងធ្វើសកម្មភាពប្រឆាំងរដ្ឋាភិបាល។ អ៊ីចឹងដូចជាមិនមានអ្វីចម្លែកហើយយើងក៏មិនចាប់អារម្មណ៍ក្រុមនេះដែរ»៕