ភ្នំពេញៈ ក្រសួងអប់រំ យុវជន និងកីឡា ក្រសួងការងារ និងបណ្ដុះបណ្ដាលវិជ្ជាជីវៈ និងអង្គការយូណេស្កូបន្ដសហការគ្នាលើគម្រោងកម្មវិធីសមមូលអប់រំកម្រិតមូលដ្ឋាន Basic Education Equivalency Program (BEEP) រយៈពេល ៤ ឆ្នាំ (២០២០-២០២៣) ដោយអនុវត្ដលើខេត្ដចំនួន ១៥ ក្រោយទទួលបានលទ្ធផលក្នុងជំហានដំបូងកាលពីឆ្នាំ ២០១៩ ដោយមានសិស្សដែលបោះបង់ការសិក្សា ចុះឈ្មោះចូលរៀនជាង ២០០០ នាក់ក្នុងចំណោមនេះសិស្សស្រីជិត ៣០ ភាគរយ។
លោក រស់ សុវាចា អគ្គលេខាធិការ និងអ្នកនាំពាក្យក្រសួងអប់រំ យុវជន និងកីឡា ថ្លែងថាសមិទ្ធផល និងការបន្តជំហានទី ២ លើការងារនេះគឺបង្ហាញពីកិច្ចសហការវិជ្ជមានរបស់ក្រសួងអប់រំ យុវជន និងកីឡាជាមួយគ្រប់ភាគីពាក់ព័ន្ធនឹងការលើកកម្ពស់គុណភាពអប់រំ។
លោក សុវាចា ថ្លែងថានៅឆ្នាំ ២០១៩ ក្រសួងអប់រំ យុវជន និងកីឡា និងក្រសួងការងារ និងបណ្តុះបណ្តាលវិជ្ជាជីវៈ និង UNESCO បានសហការអនុវត្តកម្មវិធី BEEP បាន ១៣ មណ្ឌលសិក្សាគឺខេត្តសៀមរាបចំនួន ៦ មណ្ឌលសិក្សា រាជធានីភ្នំពេញចំនួន ៦ មណ្ឌលសិក្សា និងខេត្តបាត់ដំបងបានចំនួន ១ មណ្ឌលសិក្សានៃកម្មវិធីសមមូលអប់រំកម្រិតមូលដ្ឋាននេះ។
លោក សុវាចា បានឲ្យដឹងទៀតថា៖ «នៅឆ្នាំ ២០២០ យើងនឹងពង្រីកចំនួន ៨ មណ្ឌលសិក្សាទៀតគឺក្រសួងអប់រំ យុវជន និងកីឡាចំនួន ៤ មណ្ឌលសិក្សា និងក្រសួងការងារ និងបណ្តុះបណ្តាល វិជ្ជាជីវៈចំនួន ៤ មណ្ឌលសិក្សា។ ចំណែកក្នុងឆ្នាំ ២០២០ ដល់ឆ្នាំ ២០២៣ យើងនឹងពង្រីកកម្មវិធី BEEP នៅតាមមជ្ឈមណ្ឌលសិក្សាសហគមន៍ (Community Learning Cemter) មួយចំនួនក្នុងរាជធានីភ្នំពេញ និងខេត្តចំនួន ១៤ (សរុប ១៥ រាជធានី-ខេត្ត)»។
លោក សុវាចា បានឲ្យដឹងថា រាជធានី-ខេត្តទាំង ១៥ ដែលត្រូវបន្ដអនុវត្ដគម្រោងកម្មវិធីសមមូលអប់រំកម្រិតមូលដ្ឋានរយៈពេល ៤ ឆ្នាំនោះរួមមាន ១- រាជធានីភ្នំពេញ ២- ខេត្តព្រះវិហារ ៣- ខេត្តរតនគិរី ៤- ខេត្តមណ្ឌលគិរី ៥- ខេត្តព្រះសីហនុ ៦- ខេត្តស្វាយរៀង ៧- ខេត្តបន្ទាយមានជ័យ ៨- ខេត្តសៀមរាប ៩- ខេត្តកំពង់ស្ពឺ ១០- ខេត្តកណ្តាល ១១- ខេត្តតាកែវ ១២- ខេត្តត្បូងឃ្មុំ ១៣- ខេត្តកំពង់ចាម ១៤- ខេត្តកំពង់ឆ្នាំង និង ១៥- ខេត្តពោធិ៍សាត់។
លោក លៀវ គឹមឡាយ មន្ត្រីកម្មវិធីអប់រំ អង្គការយូណេស្កូ (Education Programme Officer UNESCO) បានថ្លែងថាការសម្រេចពង្រីកគម្រោងកម្មវិធីសមមូលអប់រំកម្រិតមូលដ្ឋាននេះ ព្រោះក្រោយការអនុវត្ដកម្មវិធីអប់រំនេះរយៈពេល ១ ឆ្នាំកាលពីឆ្នាំមុន គឺមានតម្រូវការខ្លាំងពីសិស្ស និងយុវជនដែលបោះបង់ការសិក្សានាំគ្នាដាក់ពាក្យចូលរៀនកើនឡើងជាបន្តបន្ទាប់។
លោកថ្លែងថា៖ «សិស្សដែលពួកគាត់នៅក្រៅសាលា ឬសិស្សបោះបង់ការសិក្សាដែលពួកគាត់មិនទាន់បានរៀនចប់កម្រិតសិក្សាមូលដ្ឋានថ្នាក់ទី ៩ ពួកគាត់បាននាំគ្នាមកចុះឈ្មោះសិក្សាដើម្បីយកសញ្ញាបត្រនេះទៅចូលរៀនក្នុងប្រព័ន្ធបណ្ដុះបណ្ដាលបច្ចេកទេសវិជ្ជាជីវៈ Technical Vocational- Education and Training (TVET) របស់ក្រសួងការងារ ឬចូលរៀនបន្តនៅកម្រិតវិទ្យាល័យបច្ចេកទេសរបស់ក្រសួងអប់រំក៏បានដោយពួកគាត់អាចចូលរៀនជំនាញបន្តទាំងនេះដោយមិនគិតថ្លៃឡើយ»។
លោក លៀវ គឹមឡាយ បានឲ្យដឹងថាក្នុង ១ ឆ្នាំ ២០១៩ មានសិស្ស និងយុវជនដែលបោះបង់ការសិក្សាបានចុះឈ្មោះចូលរៀនលើកម្មវិធីសិក្សា BEEP ចំនួនជាង ២០០០ នាក់។
លោក រស់ សុវាចា បានអះអាងថា BEEP គឺជាកម្មវិធីអប់រំមូលដ្ឋានសមមូលតាមប្រព័ន្ធអ៊ីនធឺណិត។ កម្មវិធីសិក្សានេះបានផ្ដល់ឱកាសដល់សិស្សដែលរៀនចប់ថ្នាក់ទី ៦ ហើយមិនបន្ដ និងសិស្សដែលបោះបង់ការសិក្សាអាចបញ្ចប់ការសិក្សាកម្រិតមូលដ្ឋានកម្រិតថ្នាក់ទី ៩ ហើយឲ្យពួកគាត់មានឱកាសរៀនចូលទៅក្នុងប្រព័ន្ធបណ្ដុះបណ្ដាលបច្ចេកទេសវិជ្ជាជីវៈទៀតបាន។
លោក សុវាចា បានបញ្ជាក់ថា កម្មវិធីអប់រំនេះនឹងជួយឲ្យសិស្សអាចរៀនតាមប្រព័ន្ធ ២ បញ្ចូលគ្នាដែលមានភាពបត់បែន និងទន់ភ្លន់គឺមានន័យថា សិស្សអាចរៀនតាមរយៈប្រព័ន្ធអនឡាញនៅផ្ទះខ្លួនឯងក៏បាន ឬអាចរៀននៅពេលណាដែលគាត់ទំនេរក៏បាន ប៉ុន្ដែនៅមុនពេលចូលសិក្សាវគ្គនីមួយៗ សិស្សត្រូវមកជួបគណៈគ្រប់គ្រងកម្មវិធីក៏ដូចជា គ្រូណែនាំនៅវិទ្យាស្ថានបច្ចេកវិទ្យាកម្ពុជាដែលជាមជ្ឈមណ្ឌលសិក្សាកម្មវិធីអប់រំសមមូលមូលដ្ឋានទី ១ ដែលបើកដំណើរការពីថ្ងៃទី ១០ ខែ កុម្ភៈ ឆ្នាំ ២០១៩។
លោក សុវាចា អ្នកនាំពាក្យក្រសួងអប់រំ យុវជន និងកីឡាបានថ្លែងថា ការអប់រំកម្រិតមូលដ្ឋាននេះនឹងជួយយុវជនអាចរកការងារបានប្រសើរជាងមុន ឬក៏ទទួលបានការអប់រំបន្តទៀត ដើម្បីធ្វើឲ្យប្រសើរឡើងនូវផលិតភាពការងារ និងបំណិនជីវិត។
លោកថា កម្មវិធីអប់រំនេះនឹងតម្រូវឲ្យសិស្សត្រូវទៅជួបគ្រូណែនាំ ២ ដងក្នុង ១ ខែ។ តាមរយៈកម្មវិធីនេះនឹងបែងចែកជាវគ្គៗសម្រាប់ ១ វគ្គមានរយៈពេលពី ៦ ខែទៅ ៨ ខែរួចសិស្សត្រូវប្រឡងបញ្ចប់៕