.jpg)
លោក អ៊ិត សំហេង រដ្ឋមន្ត្រីក្រសួងការងារ។ រូបថត ក្រសួងការងារ
ភ្នំពេញៈ លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាល វិជ្ជាជីវៈបានជំរុញដល់ម្ចាស់រោងចក្រ សហគ្រាស គ្រឹះស្ថានទាំងអស់ត្រូវរៀបចំគិលានដ្ឋាននៅតាមទីតាំងរបស់ខ្លួនឲ្យបានត្រឹមត្រូវស្របទៅតាមច្បាប់កំណត់ហើយពួកគេប្រឈមនឹងការផាកពិន័យជាអន្តរកាលបើសិនគ្មានគិលានដ្ឋានប្រកបដោយស្តង់ដា។
ការជំរុញនេះធ្វើឡើងនៅក្នុងសិក្ខាសាលាចែករំលែកបទពិសោធស្តីពីការរៀបចំគិលានដ្ឋានសហគ្រាស គ្រឹះស្ថានកាលពីម្សិលមិញនៅសណ្ឋាគារភ្នំពេញដែលមានអ្នកចូលរួមជិត ២០០ នាក់មកពីរោងចក្រសហគ្រាស គ្រឹះស្ថាន សង្គមស៊ីវិល និងមន្ត្រីរដ្ឋាភិបាល។
លោក សំហេង បានថ្លែងថា៖ «ចំពោះនិយោជកត្រូវរៀបចំគិលានដ្ឋានសហគ្រាស គ្រឹះស្ថានឱ្យបានសមស្រប និងត្រឹមត្រូវតាមវិធាន និងបទប្បញ្ញតិ្តដែលបានកំណត់ក្នុងច្បាប់ស្តីពីការងារ និងលិខិតបទដ្ឋានពាក់ព័ន្ធ ពិសេសប្រកាសរួមលេខ ៣៣០ និង ១៣។ ធានាថាគិលានដ្ឋានសហគ្រាសគ្រឹះស្ថាន ដំណើរការបានល្អមានសម្ភារបរិក្ខារឱសថប្រើប្រាស់គ្រប់គ្រាន់ និងមានបុគ្គលិកសុខាភិបាលធ្វើការទៀងទាត់តាមការកំណត់»។
លោក អ៊ិត សំហេង បន្តថា នៅពេលដែលតាមបណ្តាសហគ្រាស គ្រឹះស្ថាន បានរៀបចំគិលានដ្ឋាន ឬបន្ទប់រុំរបួស និងប្រអប់សង្គ្រោះប្រកបដោយស្តង់ដាត្រឹមត្រូវនោះកម្មករនិយោជិតក៏ត្រូវបានធានានូវសុវត្ថិភាព សុខភាពនៅកន្លែងធ្វើការផងដែរ។ បន្ថែមពីនេះលោកថា សារៈប្រយោជន៍ទាំងនេះក៏ផ្តល់ផលដល់សហគ្រាសទាំងនោះឲ្យធានាបាននូវផលិតភាពដែលមិនបាត់បង់កម្លាំងពលកម្ម ឬយឺតយ៉ាវដល់ការសម្រេចនូវផែនការផលិតរបស់ខ្លួននៅពេលដែលកម្មករនិយោជិតទទួលបានសេវាថែទាំសុខភាពបានត្រឹមត្រូវ និងទាន់ពេល។
តាមរបាយការណ៍របស់នាយកដ្ឋានពេទ្យការងារនៃក្រសួងការងារបានឲ្យដឹងថាក្នុងឆ្នាំ ២០១៨ សហគ្រាស គ្រឹះស្ថានដែលមានគិលានដ្ឋាន បន្ទប់រុំរបួស និងប្រអប់សង្គ្រោះមានប្រមាណ ១១៥៧ កន្លែងដោយក្នុងនោះគិលានដ្ឋាន បន្ទប់រុំរបួស និងប្រអប់សង្គ្រោះដែលប្រកបដោយស្តង់ដាត្រឹមត្រូវមានជាង ៧០។
លោក ឡេង តុង ប្រធាននាយកដ្ឋានពេទ្យការងារនៃក្រសួងការងារ លើកឡើងថាតាមគោលការណ៍ច្បាប់សម្រាប់គ្រឹះស្ថាន និងសហគ្រាស ដែលមានកម្មករចាប់ពី ៥០ នាក់ឡើង គឺត្រូវតែបង្កើតនូវគិលានដ្ឋាននៅតាមទីតាំងសហគ្រាស និងគ្រឹះស្ថានរបស់ពួកគេ។
លោកបន្តថា បើមានកម្មករចាប់ពី ២០ នាក់ដល់ ៤៩ នាក់នោះគឺត្រូវបង្កើតបន្ទប់រុំរបួសសម្រាប់កម្មករ ខណៈសហគ្រាសគ្រឹះស្ថានដែលមានកម្មករចាប់ពី ២០ នាក់ចុះក្រោមគឺត្រូវបង្កើតប្រអប់សង្គ្រោះសម្រាប់កម្មកររបស់ខ្លួន។
លោក ឡេង តុង បញ្ជាក់ថាជាវិធានការសម្រាប់សហគ្រាស និងគ្រឹះស្ថានដែលមិនអនុវត្តតាមការកំណត់ទាំងនេះនឹងត្រូវទទួលរងនូវការផាកពិន័យ។
លោកបន្តថា៖ «ក្រសួងបានកំណត់ហើយយកចំណុចអាទិភាពនៅក្នុងបញ្ជីផ្ទៀងផ្ទាត់របស់មន្ត្រីអធិការកិច្ចការងារដើម្បីធ្វើការផាកពិន័យ ចំពោះរោងចក្រ សហគ្រាសណាដែលមិនគោរពតាមបញ្ញត្តិច្បាប់។ ម្យ៉ាងទៀតបើស្ថាប័នទាំងឡាយណាដែលមិនរៀបចំបន្ទប់រុំរបួស ឬប្រអប់សង្គ្រោះទេគឺយើងនឹងផាកអន្តរកាលគឺជួបពេលណាគឺយើងផាកពេលហ្នឹងតែម្តង។ ដោយឡែកសម្រាប់គិលានដ្ឋាន គឺយើងផ្តល់ដំបូន្មានសិនទើបយើងរៀបចំផាកពិន័យតាមក្រោយ»។
លោក Tum May ឧបការីតំណាងអង្គការ UNFPA បានលើកឡើងថា គិតមកដល់ពេលនេះគឺមានរយៈពេល ៣ ឆ្នាំមកហើយ ដែលភាគីពាក់ព័ន្ធជាពិសេសក្រសួងការងារបានរួមគ្នាបង្កើតឲ្យមាននូវគិលានដ្ឋាននៅតាមសហគ្រាស និងគ្រឹះស្ថាន ដើម្បីធ្វើឲ្យសុខភាពកម្មករនិយោជិតនៅតាមកន្លែងការងារមានភាពល្អប្រសើរ និងជំរុញដល់ផលិតភាព។
លោកបញ្ជាក់ថា ដោយសារតែជាង ៨០ ភាគរយ នៃកម្មករ និយោជិត គឺជាស្ត្រី ដូច្នេះចាំបាច់ណាស់ដែលតម្រូវឲ្យមានគិលានដ្ឋាន បន្ទប់រុំរបួស និងប្រអប់សង្គ្រោះនៅកន្លែងធ្វើការងាររបស់ពួកគេ ព្រោះមិនអាចព្រងើយកន្តើយចំពោះសេចក្តីត្រូវការ និងសិទ្ធិរបស់កម្មករបាននោះទេ។ លោកបន្តថា៖ «ជាការចាំបាច់ដែលត្រូវមានគោលការណ៍ណែនាំជាស្រេចដើម្បីយកទៅអនុវត្តន៍ និងពិនិត្យតាមដាននូវគិលានដ្ឋានទាំងនោះ ដើម្បីឲ្យប្រាកដថា មានស្តង់ដាត្រឹមត្រូវ»៕
