ភ្នំពេញៈ ក្រសួងការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជាបានចេញសេចក្ដីថ្លែងការណ៍កាលពីម្សិលមិញ ប្រតិកម្មទៅលើច្បាប់សកលម៉ានីតស្គី (Global Mangitsky Act) របស់សហរដ្ឋអាមេរិកដោយបានបំពានជនជាតិកម្ពុជាដែលបម្រើការងាររដ្ឋ និងក្នុងផ្នែកឯកជនជាកម្មវត្ថុនៃវិធានទណ្ឌកម្ម ដោយគ្មានមូលដ្ឋាន និងគ្មានការគោរពឯករាជភាពនៃច្បាប់ និងយុត្តិធម៌របស់កម្ពុជា។
សេចក្ដីប្រកាសព័ត៌មានដដែលនេះបានឲ្យដឹងថា៖ «បទបញ្ជាប្រតិបត្តិនេះ (ច្បាប់សកលម៉ានីតស្គី) គឺជាការវាយប្រហារប្រឆាំងនឹងកិច្ចខិតខំប្រឹងប្រែងដើម្បីស្ដារទំនុកចិត្ត និងភាពជឿជាក់រវាងកម្ពុជា និងសហរដ្ឋអាមេរិកតាមរយៈការផ្ញើសារទៅវិញទៅមកនាពេលថ្មីៗនេះរវាងសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងឯកឧត្តម ដូណាល់ ត្រាំ ប្រធានាធិបតីសហរដ្ឋអាមេរិកដែលបានបញ្ជាក់យ៉ាងច្បាស់ថា សហរដ្ឋអាមេរិកគោរពអធិបតេយ្យភាពកម្ពុជា ហើយមានបំណងដ៏មុតមាំក្នុងការលើកស្ទួយទំនាក់ទំនងទ្វេភាគី ដោយឈរលើការគោរពគ្នាទៅវិញទៅមក»។
សេចក្តីថ្លែងការណ៍ដដែលនេះបានឲ្យដឹងថា៖ «ទង្វើនេះធ្វើឲ្យមានការស្រងាកចិត្តយ៉ាងខ្លាំង នៅពេលដែលបុគ្គលសាធារណៈរបស់ប្រទេសមួយត្រូវបានក្លាយទៅជាកម្មវត្ថុនៃវិធានការទណ្ឌកម្មរបស់ប្រទេសដទៃផ្សេងទៀតដោយផ្អែកលើការចោទប្រកាន់ដោយគ្មានមូលដ្ឋាន និងគ្មានការគោរពទាល់តែសោះចំពោះភាពឯករាជ្យនៃច្បាប់ និងយុត្តិធម៌របស់ប្រទេសមួយ។ ប្រការនេះគឺជាការបំពានយ៉ាងធ្ងន់ធ្ងរលើគោលការណ៍អន្តរជាតិស្តីពីគោលការណ៍ស្មើភាពនៃអធិបតេយ្យ និងគោលការណ៍មិនជ្រៀតជ្រែកកិច្ចការផ្ទៃក្នុងរបស់ប្រទេសដទៃ ដូចមានចែងក្នុងធម្មនុញ្ញអង្គការសហប្រជាជាតិ និងច្បាប់អន្តរជាតិដទៃផ្សេងទៀត»។
យោងតាមសេចក្ដីប្រកាសព័ត៌មានក្រោមច្បាប់សកលម៉ានិតស្គីរបស់សហរដ្ឋអាមេរិកដែលបានចេញផ្សាយកាលពីថ្ងៃទី ៩ ខែធ្នូ ២០១៩ ពីទីក្រុងវ៉ាស៊ីនតោនបានឲ្យដឹងថា បទបញ្ជាប្រតិបត្តិរបស់និតិប្រតិបត្តិរបស់អាមេរិកបានដាក់ទណ្ឌកម្មផ្នែកហិរញ្ញវត្ថុ និងរឹតត្បិតទិដ្ឋាការទៅលើលោកឧកញ៉ា ទ្រី ភាព រួមទាំងលោក គន់ គីម អនុប្រធានទី ១ នៃគណៈកម្មាធិការជាតិគ្រប់គ្រងគ្រោះមហន្តរាយ និងជាឧត្តមសេនីយ៍ផ្កាយមាស ៤ នៃកងយោធពលខេមរភូមិន្ទនៃក្រសួងការពារជាតិ និងគ្រួសាររបស់លោក។
សេចក្តីប្រកាសព័ត៌មានក្រោមច្បាប់ដដែលរបស់សហរដ្ឋអាមេរិកនេះបានអះអាងថាលោកឧកញ៉ា ទ្រី ភាព បានទទួលខុសត្រូវចំពោះសកម្មភាពពុករលួយដោយផ្ទាល់ និងដោយមិនផ្ទាល់ដែលក្នុងនោះមានការគ្រប់គ្រងទ្រព្យសម្បត្តិរដ្ឋមិនត្រឹមត្រូវរឹបអូសទ្រព្យសម្បត្តិឯកជនដើម្បីផលប្រយោជន៍ផ្ទាល់ខ្លួន អំពើពុករលួយពាក់ព័ន្ធនឹងកិច្ចសន្យារដ្ឋាភិបាល ឬធ្វើអាជីវកម្មធនធានធម្មជាតិ ឬសូកប៉ាន់។
រីឯលោក គន់ គីម គឺជាមនុស្សសំខាន់ក្នុងគម្រោងអភិវឌ្ឍន៍ខេត្តកោះកុងហើយទទួលបានផលប្រយោជន៍ពីទំនាក់ទំនងជាមួយនឹងក្រុមហ៊ុនរបស់ចិន ហើយបានប្រើប្រាស់កងកម្លាំងខេមរភូមិន្ទទៅគំរាមកំហែង កម្ទេចផ្ទះ និងឈូសឆាយដីតាមការចង់បានរបស់ក្រុមហ៊ុនចិន។ លោកឧកញ៉ា ទ្រី ភាព និងលោក គន់ គីម បានប្រើប្រាស់ឥទ្ធិពល និងបណ្តាញរបស់ខ្លួនដើម្បីកេងប្រវ័ញ្ចពលរដ្ឋកម្ពុជាហើយផ្តល់ផលប្រយោជន៍ដល់ក្រុមហ៊ុនចិនដែលមករកស៊ីនៅកម្ពុជា។
លោកស្រី Emily Zeeberg អ្នកនាំពាក្យស្ថានទូតអាមេរិកប្រចាំកម្ពុជា បានថ្លែងតាមអ៊ីមែលថា ជាលទ្ធផលទ្រព្យសម្បត្តិរបស់ពួកគេ (ឧកញ៉ា ទ្រី ភាព និង លោក គន់ គីម) នៅក្នុងដែនសមត្ថកិច្ចរបស់សហរដ្ឋអាមេរិក ត្រូវបានបិទដំណើរការ ហើយជនជាតិអាមេរិកត្រូវបានហាមឃាត់ជាទូទៅមិនឲ្យចូលរួមប្រតិបត្តិការជាមួយពួកគេ និងអង្គភាពរបស់ពួកគេ។
លោកស្រីបានថ្លែងថា៖ «ការចាត់វិធានការទាំងនេះមានគោលបំណងការពារសុចរិតភាពនៃប្រព័ន្ធហិរញ្ញវត្ថុរបស់សហរដ្ឋអាមេរិក ហើយធានាថា អ្នកប្រព្រឹត្តអំពើពុករលួយ គ្រួសាររបស់ពួកគេ និងក្រុមហ៊ុនរបស់ពួកគេ មិនទទួលផលប្រយោជន៍ពីប្រព័ន្ធរបស់យើង។ ពួកគេក៏មិនអាចធ្វើដំណើរ ឬចំណាយប្រាក់ដែលបានមកមិនត្រឹមត្រូវនៅក្នុងសហរដ្ឋអាមេរិកផងដែរ។ វិធានការទាំងនេះក៏បានរួមចំណែក គាំទ្រដល់កិច្ចខិតខំប្រឆាំងអំពើពុករលួយរបស់ប្រទេសកម្ពុជាផងដែរ»។
លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជាបានថ្លែងដោយមានការសោកស្តាយចំពោះសហរដ្ឋអាមេរិកដែលបានសម្រេចដាក់ទណ្ឌកម្មទៅលើលោកឧកញ៉ា ទ្រី ភាព និងលោកនាយឧត្តមសេនីយ៍ គន់ គីម។
លោក ស៊ីផាន ថ្លែងថា៖ «នេះគឺជាលើកទីមួយជាផ្លូវការដែលប្រជាពលរដ្ឋរបស់យើងត្រូវបានដាក់ទណ្ឌកម្មបែបនេះ។ យើងសោកស្តាយចំពោះរឿងហ្នឹងហើយយើងនៅតែស្វែងរកយុត្តិធម៌ និងសុចរិតភាពតាមរយៈការងារទូតក្នុងន័យការពារប្រជាពលរដ្ឋខ្មែរ ដែលជាកាតព្វកិច្ចរបស់រាជរដ្ឋាភិបាល»។
លោក ឯម សុវណ្ណារ៉ា អ្នកវិភាគនយោបាយបានថ្លែងថា ករណីដាក់ទណ្ឌកម្មដោយសហរដ្ឋអាមេរិកមិនមែនជាករណីទី ១ នោះទេ ព្រោះកាលពីឆ្នាំ ២០១៨ ក្រសួងហិរញ្ញវត្ថុសហរដ្ឋអាមេរិកក៏បានដាក់ទណ្ឌកម្មផ្នែកហិរញ្ញវត្ថុ និងរឹតត្បិតទិដ្ឋាការទៅលើមន្ត្រីយោធាជាន់ខ្ពស់ ១ រូបផងដែរ។
លោក សុវណ្ណារ៉ា បានថ្លែងថា៖ «វិធានការរបស់ក្រសួងហិរញ្ញវត្ថុសហរដ្ឋអាមេរិកនឹងអាចធ្វើឲ្យប៉ះពាល់ដល់ទំនាក់ទំនងរវាងប្រទេសកម្ពុជា និងអាមេរិកដែលទើបតែនឹងចាប់ផ្តើមមានលក្ខណៈល្អប្រសើរនាពេលថ្មីនេះ ហើយថាសហរដ្ឋអាមេរិកគេមានគោលការណ៍គេច្បាស់លាស់ក្នុងការដាក់ទណ្ឌកម្ម ហើយបើកម្ពុជាមិនពេញចិត្តអាចប្តឹងទៅតុលាការអន្តរជាតិដើម្បីបង្ហាញថាខ្លួនស្អាតស្អំ»។
លោក គន់ គីម និងលោកឧកញ៉ា ទ្រីភាព នៅមិនទាន់អាចទាក់ទងសុំការអត្ថាធិប្បាយអំពីការចោទប្រកាន់ដោយសហរដ្ឋអាមេរិកនោះបានទេកាលពីថ្ងៃម្សិលមិញ៕
វីដេអូ៖