ភ្នំពេញៈ ក្រសួងបរិស្ថាន នឹងពិនិត្យមើលលិខិតរបស់សមាគមរោងចក្រកាត់ដេរ នៅកម្ពុជា (GMAC) ដែលស្នើសុំជួបពិភាក្សាជាមួយក្រសួងដើម្បីរកដំណោះស្រាយលើការប្រមូលកាកសំណល់ឧស្សាហកម្មនៅតាមរោងចក្រនានា។ នេះបើតាម អ្នកនាំពាក្យក្រសួងបរិស្ថាន។
ការលើកឡើងរបស់អ្នកនាំពាក្យក្រសួងបរិស្ថាន នេះ ធ្វើឡើង បន្ទាប់ពី កាលថ្ងៃទី ២៦ ខែកញ្ញាឆ្នាំនេះ សមាគមរោងចក្រកាត់ដេរកម្ពុជាបានស្នើសុំឲ្យរដ្ឋមន្ត្រីបរិស្ថានរៀបចំការជួបពិភាក្សាគ្នាត្រីភាគីរវាងក្រសួង បរិស្ថាន សមាគមរោងចក្រកាត់ដេរនៅកម្ពុជា និង ក្រុមហ៊ុនប្រមូលសំរាម Sarom Trading Co.,Ltd ដោយសមាគមរោងចក្របានអះអាងថា ក្រុមហ៊ុន Sarom Trading Co.,Ltd ប្រមូលសំរាមពុំមានប្រសិទ្ធភាពដូចការកំណត់ ដោយយឺតយ៉ាវទាំងការប្រមូលនិងប្រមូលមិនគ្រប់តាមការកំណត់ក្នុងមួយខែៗ។
លិខិតសមាគមបានបញ្ជាក់ថា ៖«ការអនុវត្តការងារផ្តល់សេវាដែលពុំទាន់មានប្រសិទ្ធភាពនេះបានបង្កើតឲ្យមានពំនូកកាកសំណល់កាន់តែធំទៅៗ ដែលបង្កឲ្យមានផលអវិជ្ជមានមួយចំនួនដល់រោងចក្រ ដូចជា បាត់បង់នូវសោភណភាព ការបង្កនូវភាពកខ្វក់ និងមានក្លិនមិនល្អក្នុងបរិវេណរោងចក្រ ដែលអាចនឹងបណ្តាលឲ្យមានផលប៉ះពាល់ដល់សុខភាពកម្មករ និយោជិតនិងបុគ្គលិកទាំងអស់របស់រោងចក្រ។
លោក នេត្រ ភក្ត្រា អ្នកនាំពាក្យក្រសួងបរិស្ថានបានថ្លែងតាមរយៈសាអេឡេចត្រូនិចថាក្រសួងបរិស្ថានបានទទួលលិខិត របស់សមាគមរោងចក្រកាត់ដេរនៅកម្ពុជានោះហើយ ដោយលោកថា ការស្នើសុំនេះជាដំណឹងដ៏រីករាយដែលក្រុមហ៊ុនឯកជន បានចូលរួមយ៉ាងសកម្មជាមួយក្រសួងបរិស្ថានក្នុង ការសម្អាតអនាម័យ បរិស្ថាន គ្រប់គ្រងសំណល់រឹង សំរាមនៅតាមទីតាំងរបស់ខ្លួនហើយក្រសួងបរិស្ថាននឹងពិនិត្យលើសំណើនេះ។
លោកបានបញ្ជាក់ថា៖«យើងបានទទួលលិខិតហើយនិងធ្វើការពិនិត្យពិភាក្សាលើសំណើក្នុងពេលវេលាសមស្រប…»។
តាមការប៉ាន់ប្រមាណនៅទូទាំងប្រទេសបរិមាណសំរាមសំណល់រឹងនៅទីប្រជុំជនក្នុងឆ្នាំ២០១៧គឺមានប្រហែលជាង៣,៦៥ លានតោន ឬប្រមាណជាង១ម៉ឺន តោនក្នុងមួយថ្ងៃ ក្នុងនោះ នៅរាជធានីភ្នំពេញ មានប្រមាណ៣ពាន់តោនក្នុងមួយថ្ងៃ ។
ជាមួយគ្នានេះ បរិមាណសំណល់ប្រហែល ៤១ ភាគរយ (១,៥ លានតោនក្នុងមួយឆ្នាំ) នៃបរិមាណសរុបត្រូវបានប្រមូលយកទៅដាក់នៅទីលាន និងប្រហែល ១១ ភាគរយ (៤០ ម៉ឺន តោនក្នុងមួយឆ្នាំ) ត្រូវបានប្រមូលទិញសម្រាប់កែច្នៃ ហើយនៅសល់ប្រមាណជា ៤៨ ភាគរយ ត្រូវបានដុតឬបោះចោលតាមទីសាធារណៈ។
បើតាមលិខិតដដែលបានលើកឡើងថា ជាញឹកញាប់សមាគមរោងចក្រកាត់ដេរនៅកម្ពុជា បានទទួលនូវការរាយការណ៍និងការត្អូញត្អែរពីសមាជិករោងចក្រកាត់ដេរមួយចំនួនទាក់ទងនឹងបញ្ហាការប្រមូលកាកសំណល់ឧស្សាហកម្មរបស់ក្រុមហ៊ុនSarom Trading Co.,Ltd។
ក្រុមហ៊ុន Sarom Trading Co.,Ltd មិនអាចទាក់ទងបានសុំការអត្ថាធិប្បាយ ជុំវិញការចោទពីភាពយឺតយ៉ាវ និង ពុំមានប្រសិទ្ធភាពក្នុងការប្រមូលសំរាមនេះទេ កាលពីថ្ងៃ ៣០ កញ្ញា៕