ភ្នំពេញៈ ក្រសួងបរិស្ថាននឹងបញ្ជាទិញនូវឧបករណ៍តាមដានភាពល្អិតនិចល PM 2.5 និង PM 10 ចំនួន ១៥ គ្រឿងបន្ថែមទៀត ដើម្បីបំពាក់បន្ថែមនៅតាមបណ្ដាខេត្ដ ខណៈដែលលទ្ធផលគុណភាពខ្យល់នៅរាជធានីភ្នំពេញ និងតាមបណ្តាខេត្តត្រូវបានរកឃើញថា បានវិលត្រឡប់មករកកម្រិតល្អប្រសើរឡើងវិញ។ នេះបើតាមមន្ត្រីក្រសួងបរិស្ថាន។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបានថ្លែងឲ្យដឹងពីភាពល្អប្រសើរនៃគុណភាពខ្យល់នេះនៅក្នុងសន្និសីទសារព័ត៌មានដែលរៀបចំដោយអង្គភាពអ្នកនាំពាក្យរាជរដ្ឋាភិបាលលើប្រធានបទ «វឌ្ឍនភាពការងារក្រសួងបរិស្ថាន និងបច្ចុប្បន្នភាពនៃស្ថានភាពគុណភាពខ្យល់នៅកម្ពុជាកាលពីម្សិលមិញនៅទីស្តីការគណៈរដ្ឋមន្ដ្រី។
លោក នេត្រ ភក្ដ្រាបញ្ជាក់ថា៖ «កាលពីសប្ដាហ៍មុន ប្រទេសកម្ពុជាយើងបានជួបប្រទះនូវបញ្ហាមួយ គឺស្ថានភាពគុណភាពខ្យល់នៅក្នុងប្រទេសមានការធ្លាក់ចុះ ដោយសារតែកំហាប់ភាពល្អិតនិចល (PM2.5) មានការកើនឡើង។ ក៏ប៉ុន្ដែនៅក្នុងពេល ១ សប្ដាហ៍កន្លងទៅនេះ គឺយើងបានឃើញហើយស្ថានភាពគុណភាពខ្យល់នៅក្នុងប្រទេស កម្ពុជា របស់យើងបានវិលមករកភាពល្អប្រសើរឡើងវិញ ដោយគុណភាពខ្យល់នៅក្នុងប្រទេសរបស់យើងស្ថិតនៅក្នុងស្ដង់ដាដែលកំណត់ដែលបង្ហាញថា ស្ថានភាពគុណភាពខ្យល់ គឺមានភាពល្អប្រសើរ លែងមានបញ្ហា»។
លោកបានស្នើឱ្យប្រជាពលរដ្ឋសូមកុំមានការព្រួយបារម្ភពីបញ្ហាខ្យល់ ព្រោះក្រសួងបរិស្ថានបាននិងបន្តតាមដានស្ថានភាពគ្រប់ពេលវេលាទាំងអស់។ បើសិនជាមានការវិវឌ្ឍយ៉ាងណា ក្រសួងបរិស្ថាននឹងធ្វើការជូនដំណឹងជាផ្លូវការតាមរយៈប្រព័ន្ធផ្សព្វផ្សាយ និងបណ្ដាញទំនាក់ទំនងសង្គម ឬតាមរយៈមន្ដ្រីនាំពាក្យក្រសួងផ្ទាល់ជាផ្លូវការ។
លោក ហេង ណារ៉េត អគ្គនាយកនៃអគ្គនាយកដ្ឋានគាំពារបរិស្ថានក្រសួងបរិស្ថានក៏បានថ្លែងក្នុងសន្និសីទពីម្សិលមិញនេះដែរដោយបានបង្ហាញពីប្រភពដែលនាំឱ្យមានការបំពុលខ្យល់គឺបណ្ដាលមកពីការបញ្ចេញផ្សែង និងឧស្ម័នពីរោងចក្រ ការបញ្ចេញផ្សែងឧស្ម័នចេញពីយានយន្តដែលបានប្រើប្រាស់ប្រេងម៉ាស៊ូត និងសាំងរួមនឹងចំហេះឥន្ធនៈផ្សេងៗទៀតដូចជាការដុតប្រេងខ្មៅ ការដុតធ្យូងថ្ម បញ្ហាភ្លើងឆេះព្រៃ ការដុតទន្ទ្រានដីយកធ្វើជាកម្មសិទ្ធិ ការដុតទីវាលស្រែ ការដុតសំរាមក៏ជាការរួមចំណែកដល់ការបំពុលខ្យល់ដែរ។
លោកបញ្ជាក់ថា ក្នុងប៉ារ៉ាម៉ែត្រនៃការបំពុលខ្យល់បានចែកចេញជាប្រភេទគឺភាពល្អិតនិចល PM 2.5 និង PM 10 និងប្រភេទឧស្ម័នដែលមានឧស្ម័នកាបោនឌីអុកស៊ីត នីត្រូហ្ស៊ែនអុកស៊ីតជាដើម។
លោកថ្លែងថា៖ «អ្វីដែលកើតឡើងក្នុង ១ សប្ដាហ៍កន្លងទៅភាគច្រើនគឺមានការកើតឡើងនូវកំហាប់ភាពល្អិតនិចល PM 2.5 និង PM 10។ ដោយឡែកប្រភពបំពុលដែលជាប្រភេទឧស្ម័នគឺមិនមានការកើនឡើងទេ»។
លោក ហេង ណារ៉េត ឱ្យដឹងថា មូលហេតុដែលក្រសួងបរិស្ថានអាចដឹងពីកម្រិតនៃការបំពុលខ្យល់នេះបាន ដោយសារក្រសួងបរិស្ថានមានឧបករណ៍ដើម្បីធ្វើការតាមដានត្រួតពិនិត្យជាប្រចាំ។ ការអនុវត្ដតាមដានកម្មវិធីត្រួតពិនិត្យខ្យល់នេះប្រទេសកម្ពុជាត្រូវបានអនុវត្ដតាំងពីឆ្នាំ ១៩៩៨ រហូតមកដល់បច្ចុប្បន្ន។
លោកបញ្ជាក់ថា៖ «ឆ្នាំជាបន្តបន្ទាប់យើងបានបំពាក់ឧបករណ៍បន្ថែម ដើម្បីឱ្យការត្រួតពិនិត្យអង្កេតតាមដានខ្យល់នេះមានភាពកាន់តែសុក្រឹតឡើង។ បច្ចុប្បន្ននេះយើងបានបំពាក់រួចរាល់បានចំនួន ៣១ ស្ថានីយ (ស្ថានីយត្រួតពិនិត្យខ្យល់) ទូទាំងប្រទេសហើយនៅពេលខាងមុខ យើងនឹងត្រៀមបញ្ជាទិញនូវឧបករណ៍តាមដានភាពល្អិតនិចល PM 2.5 ក៏ដូចជា និង PM 10 ចំនួន ១៥ គ្រឿងបន្ថែមទៀត ដើម្បីបំពាក់បន្ថែមនៅតាមបណ្ដាខេត្ដ»។
បើតាមលោក ណារ៉េត ក្រសួងបរិស្ថានបានធ្វើការតាមដានពីបញ្ហាគុណភាពខ្យល់ជាប់ជាប្រចាំ តាមរយៈឧបករណ៍ត្រួតពិនិត្យដែលបានបំពាក់នៅតាមរាជធានី-ខេត្ដ ខណៈឧបករណ៍ត្រួតពិនិត្យនេះនឹងធ្វើការបង្ហាញទិន្នន័យមានភាពសុក្រឹតបំផុត ដោយបានផ្ដល់ទិន្នន័យក្នុងរយៈពេលកន្លះម៉ោងម្ដងពីបញ្ហាខ្យល់នេះ។
លោកបញ្ជាក់ថា៖ «យើងធ្វើការតាមដានលើបញ្ហានេះក្នុងពេល ២៤ ម៉ោង លើ ២៤ ម៉ោង ដោយមិនចាំបាច់ចុះទៅយកទិន្នន័យដល់បណ្ដាខេត្ដទេ គឺយើងអាចទទួលបានទិន្នន័យពីមន្ដ្រីជំនាញពីបណ្ដាខេត្ដតាមប្រព័ន្ធអ៊ីនធឺណិត។ យើងអាចដឹងគ្រប់ពេលទាំងអស់នូវស្ថានភាពគុណភាពខ្យល់»៕