.jpg)
អគារមន្ទីរពេទ្យ វ៉ិចតូរៀ ដែលត្រូវក្រសួងសុខាភិបាលសម្រេចឲ្យបិទទ្វារកាលពីម្សិលមិញ ក្រោយពីមានរឿងបង្ខាំងអ្នកជំងឺទារលុយ។ ហុង មិនា
ភ្នំពេញ: រដ្ឋមន្ត្រីក្រសួងសុខាភិបាល លោក ម៉ម ប៊ុនហេង កាលពីថ្ងៃម្សិលមិញបានចេញសេចក្ដីសម្រេចបិទមន្ទីរពេទ្យវ៉ិចតូរៀ (Victoria International Hospital) ព្រមទាំងកំពុងបន្តសាកសួរបុគ្គលិកមន្ត្រីពេទ្យចំនួន ៨ នាក់ជុំវិញការចោទប្រកាន់ថាបានចាក់សោទ្វារបង្ខាំងអ្នកជំងឺ ៣ នាក់ម្តាយ និងកូនដែលបានមកពិនិត្យ និងព្យាបាលជំងឺ ហើយខ្វះលុយបង់ថ្លៃសេវាឲ្យមន្ទីរពេទ្យ។
តាមសេចក្ដីសម្រេចរបស់លោក ម៉ម ប៊ុនហេង បានចុះផ្សាយនៅថ្ងៃទី ១៤ មករា បានឲ្យដឹងថា៖ «បិទមន្ទីរពេទ្យឯកជនឈ្មោះ «វ៉ិចតូរៀ» ដែលមានទីតាំងនៅសង្កាត់បឹងកក់ទី ២ ខណ្ឌទួលគោក រាជធានីភ្នំពេញ ដែលជារបស់លោកស្រីវេជ្ជបណ្ឌិត សៀង សុគន្ធ អ្នកទទួលខុសត្រូវមន្ទីរពេទ្យ វ៉ិចតូរៀ ដោយមូលហេតុគ្មានការគោរពតាមលិខិតបទដ្ឋានរបស់ក្រសួងសុខាភិបាល។ ត្រូវទុកជាមោឃៈនូវសេចក្ដីសម្រចលេខ ៨០/១៥ ចុះថ្ងៃទី ៦ ខែតុលា ឆ្នាំ ២០១៥ របស់ក្រសួងសុខាភិបាល។ អគ្គនាយកបច្ចេកទេសសុខាភិបាល ប្រធាននាយកដ្ឋានមន្ទីរពេទ្យ ប្រធានមន្ទីរសុខាភិបាលរាជធានីភ្នំពេញ និងលោកស្រីវេជ្ជបណ្ឌិត សៀង សុគន្ធ ត្រូវអនុវត្តសេចក្ដីសម្រេចនេះឲ្យមានប្រសិទ្ធភាព»។
ក្រុមគ្រូពេទ្យនៅមន្ទីពេទ្យវ៉ិចតូរៀ (Victoria International Hospital) ក្នុងសង្កាត់បឹងកក់ ២ ខណ្ឌទួលគោក នៅយប់ថ្ងៃទី ១៣ ខែមករារងការចោទប្រកាន់ថា បានចាក់សោទ្វារបង្ខាំងអ្នកជំងឺ ៣ នាក់ម្តាយ និងកូនដែលបានមកពិនិត្យ និងព្យាបាលជំងឺ ហើយខ្វះលុយបង់ថ្លៃសេវា។
សាច់ញាតិអ្នកជំងឺម្នាក់សុំមិនបញ្ចេញឈ្មោះបានថ្លែងប្រាប់ក្រុមអ្នកសារព័ត៌មាននៅខាងមុខមន្ទីរពេទ្យវ៉ិចតូរៀថា ខណៈដែលមន្ទីរពេទ្យបានប្រកាសបញ្ចុះតម្លៃព្យាបាល និងការពិនិត្យជំងឺដោយមិនគិតថ្លៃ ជនរងគ្រោះដែលជាសាច់ញាតិអ្នកស្រីបាននាំកូនប្រុសស្រី ២ នាក់មកពិនិត្យជំងឺទូទៅនៅមន្ទីរពេទ្យនេះ ដោយគ្រូពេទ្យបានពិនិត្យឃើញថា ជនរងគ្រោះមានដុះគីសក្នុងដៃស្បូនត្រូវតែវះកាត់បន្ទាន់។
អ្នកស្រីបន្តថា៖ «ក្រោយពេលពិនិត្យហើយ គ្រូពេទ្យចិនម្នាក់បានប្រាប់ទៅអ្នកបកប្រែភាសាចិនថា ស្ថានភាពជំងឺនេះ ត្រូវតែវះកាត់បន្ទាន់ បើមិនវះកាត់ទេ អាចនឹងស្លាប់ ប៉ុន្ដែជនរងគ្រោះសួរតម្លៃប៉ុន្មាន ក៏គេមិនប្រាប់ដែរ គេគ្រាន់តែនិយាយថាចាំវះកាត់ហើយចាំគិត តែខាងជនរងគ្រោះមិនព្រមឲ្យវះកាត់ទេ តែគ្រូពេទ្យបានចាប់បង្ខំវះកាត់តែម្ដង ទោះបីជនរងគ្រោះប្រាប់ថា គ្មានលុយគ្រប់គ្រាន់ក៏ដោយ»។
អ្នកស្រីបន្ថែមថា បន្ទាប់ពីវះកាត់រួច គ្រូពេទ្យបានចេញវិក្កយបត្រមួយតម្រូវឲ្យជនរងគ្រោះត្រូវបង់ប្រាក់ចំនួន ២ ពាន់ដុល្លារ ប៉ុន្ដែជនរងគ្រោះមានប្រាក់ជាប់ខ្លួនតែចំនួន ៦០០ ដុល្លារ ក៏បង់ឲ្យមន្ទីរពេទ្យទាំងអស់ ហើយប្រាប់ថា សុំទៅផ្ទះរកលុយមកសង។ ទោះយ៉ាងណា ភាគីគ្រូពេទ្យមិនព្រម ក៏បានចាក់សោទ្វារខាងមុខមិនឲ្យ ៣ នាក់ម្ដាយកូនចេញពីមន្ទីរពេទ្យ ដោយបង្គាប់ឲ្យរកលុយមកបង្គ្រប់ ទើបអនុញ្ញាតឲ្យចេញទៅផ្ទះ។
សាច់ញាតិជនគ្រោះរូបនេះបញ្ជាក់ថា៖ «ស្នាមរបួសដែលគេវះកាត់ហើយហ្នឹង គឺហើមឡើងធំ ព្រោះគ្រូពេទ្យមិនបានចាក់ថ្នាំ ឬឲ្យថ្នាំលេបទេ គេថា ត្រូវសងលុយគេឲ្យគ្រប់សិនហើយជនរងគ្រោះអង្វរយ៉ាងណាក៏គេមិនព្រមដែរ រហូតដល់គាត់ខ្ចីទូរស័ព្ទគេខលមកខ្ញុំ ទើបបែកការណ៍អ៊ីចឹង ហើយគាត់យំរហូតសន្លប់»។
អ្នកជំងឺនៅក្នុងទ្វារកញ្ចក់មន្ទីរពេទ្យចាក់សោច្រវាក់។ សហការី
បុគ្គលិកម្នាក់ដែលតំណាងមន្ទីរពេទ្យវ៉ិចតូរៀសុំមិនបញ្ចេញឈ្មោះបានឲ្យដឹងថា ការលើកឡើងនេះ មិនមែនជាការពិតទេ ដោយមន្ទីរពេទ្យវ៉ិចតូរៀ ចាប់ពីម៉ោង ៧ យប់ឡើងទៅនឹងចាក់សោនៅទ្វារធំខាងមុខជារៀងរាល់ថ្ងៃ ប៉ុន្ដែមន្ទីរពេទ្យនៅមានទ្វារតូចៗចំនួន ២ ទៀតដែលមិនបិទ ដោយអ្នកជំងឺបានមកឈរខាងមុខទ្វារធំដែលបិទ ហើយស្រែកយំថា មន្ទីរពេទ្យចាក់សោបង្ខាំងទៅវិញ។
លោកបន្តថា៖ «បាទ គាត់ត្រូវចំណាយលុយបង់ប្រាក់ឲ្យខាងមន្ទីរពេទ្យចំនួន ២ ពាន់ដុល្លារមែន ព្រោះគាត់មានជំងឺ ៤ ទៅ ៥ មុខ ដែលបានពិនិត្យ និងធ្វើការវះកាត់ជំងឺក្នុងនោះគាត់បានវះកាត់គីសក្នុងដៃស្បូនផងដែរ។ អ៊ីចឹងទឹកប្រាក់ទាំងនេះ គឺសរុបថ្លៃសេវាទាំងអស់តែម្ដង»។
លោក ខាត់ ខុនទិត្យ នាយប៉ុស្ដិ៍រដ្ឋបាលសង្កាត់បឹងកក់ ២ បានថ្លែងថា លោកមិនមែនជាអ្នកសម្របសម្រួលអ្វីទេ ប៉ុន្ដែគ្រាន់តែចុះទៅការពារសណ្ដាប់ធ្នាប់ និងការពារកុំឲ្យមានអំពើហិង្សាកើតឡើងប៉ុណ្ណោះ។ ដោយលោកគ្រាន់តែបានឮក្រុមគ្រូពេទ្យនិយាយថា អ្នកជំងឺមិនមានលុយគ្រប់បង់ថ្លៃសេវាវះកាត់ឲ្យពួកគេ ខណៈដែលពួកគេបានចាក់សោទ្វារសម្រាកដូចសព្វមួយដង ប៉ុន្ដែមិនមែនក្នុងន័យបង្ខាំងទុកទេ។
លោក ខុនទិត្យ បានថ្លែងបន្តថា៖ «តាមខ្ញុំទទួលព័ត៌មានពីគ្រូពេទ្យថា ភាគីទាំង ២ ហ្នឹងព្រមព្រៀងគ្នាថ្លៃវះកាត់ហ្នឹង ២ ពាន់ដុល្លារ ក្រោយមកគ្រូពេទ្យបានវះកាត់ ក្រោយមកគាត់សម្រាកបាន ៣ ថ្ងៃក៏ដល់ថ្ងៃចេញពីពេទ្យ ប៉ុន្ដែអ្នកជំងឺហ្នឹងថា គាត់គ្មានលុយគ្រប់ទេ ហើយទៅផ្ទះទៅរកលុយមកសងវិញ ប៉ុន្ដែខ្ញុំមិនដឹងថាគាត់និយាយប្រាប់សាច់ញាតិគាត់ថាម៉េចខ្លះទេ បានមានរឿងផ្អើលឆោឡោ មានអ្នកកាសែត មានអីមកហ្នឹង»។
លោក ខុនទិត្យ បានបន្ថែមថា ក្រោយពីមានការផ្អើលឆោឡោនេះ ភាគីមន្ទីរពេទ្យបានយល់ព្រមទទួលយកលុយចំនួន ៦០០ ដុល្លារនេះ ដើម្បីបញ្ចប់រឿង ប៉ុន្ដែមិនមានបណ្ដឹងអ្វីទាំងអស់។ លោកបានបញ្ជាក់ថា៖ «ឥឡូវនេះ គេបញ្ចប់រឿងអស់ហើយ ប៉ុន្ដែខ្ញុំមិនទាន់ដឹងថា លុយដែលសេសសល់ហ្នឹង ខាងមន្ទីរពេទ្យគេឲ្យគាត់ជំពាក់សិន ឬយ៉ាងណាទេ ព្រោះអត់ឃើញមានពាក្យបណ្ដឹងអ្វីផង»។
តាមវិក្កយបត្ររបស់មន្ទីរពេទ្យវ៉ិចតូរៀ (Victoria International Hospital) ដែលសាច់ញាតិជនរងគ្រោះបានបង្ហាញក្រុមអ្នកសារព័ត៌មានថា អ្នកជំងឺត្រូវបង់ទឹកប្រាក់សរុបចំនួន ២ ពាន់ដុល្លារ ក្នុងនោះអ្នកជំងឺបានបង់រួចរាល់ ៦០០ ដុល្លារ ដោយនៅសល់ចំនួន ១៤០០ ដុល្លារទៀត៕
