កណ្ដាល: ក្រសួងរៀបចំដែនដីនៅមិនទាន់បានបញ្ចេញឲ្យដឹងពីចំណាត់ការរបស់ក្រសួងនេះចំពោះមន្ត្រីមន្ទីររៀបចំដែនដីខេត្តកណ្តាលម្នាក់ ដែលរងការចោទថា សមគំនិតលួចលក់ដីពលរដ្ឋចំនួន ៨៣ ហិកតាទៅតាមការជូនដំណឹងរបស់ក្រសួងយុត្តិធម៌តាមសំណើរបស់សាលាដំបូងរាជធានីភ្នំពេញនៅឡើយទេ។
ព្រះរាជអាជ្ញារង សាលាដំបូងរាជធានីភ្នំពេញលោក ងិន ពេជ បានរាយការណ៍អំពីការឃុបឃិតគ្នា ក្លែងឯកសាររបស់មន្ត្រីមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកណ្តាលដែលបានលក់ដីពលរដ្ឋចំនួន ៨៣ ហិកតាដាក់ជូនលោក អង្គវង្ស វឌ្ឍានា រដ្ឋមន្ត្រីក្រសួងយុត្តិធម៌ ដើម្បីរាយការណ៍បន្តទៅលោក ជា សុផារ៉ា រដ្ឋមន្ត្រីក្រសួងរៀបចំដែនដី ដើម្បីចាត់វិធានការបន្តទៅតាមផ្លូវច្បាប់។
តាមលិខិតរបស់លោក ងិន ពេជ ផ្ញើជូនលោក អង្គវង្ស វឌ្ឍានា កាលពីថ្ងៃទី ១៩ ខែកក្កដាដែលភ្នំពេញប៉ុស្ដិ៍ទើបបានទទួលពីម្សិលមិញឲ្យដឹងថា ក្រោយពីទទួលពាក្យបណ្តឹងរបស់ជនរងគ្រោះចំនួន ៤ នាក់ដែលប្ដឹងលោក នៅ សាត អតីតប្រធានភូមិបាលស្រុកកណ្តាលស្ទឹង និងបច្ចុប្បន្នជាមន្ត្រីមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកណ្តាលហើយបានពិនិត្យចាត់ការសំណុំរឿងព្រហ្មទណ្ឌចុះថ្ងៃទី ១០ ខែមេសា ឆ្នាំ ២០១៩ រួចមកហើយ។
លោក ងិន ពេជ បន្តថា តំណាងអយ្យការបានស្រាវជ្រាវអង្កេតបឋមរកឃើញថាឈ្មោះ នៅ សាត មានតម្រុយសន្មតថា ជាប់ពាក់ព័ន្ធបទល្មើសសមគំនិតក្នុងអំពើក្លែងបន្លំប្រើប្រាស់លិខិតក្លែង និងលួចលក់អចលនវត្ថុដែលមិនមែនជារបស់ខ្លួនប្រព្រឹត្តកាលពីអំឡុងឆ្នាំ ២០១៥ នៅចំណុចក្នុងភូមិជើងព្រៃ និងភូមិតាដោល ឃុំអំពៅព្រៃ ស្រុកកណ្ដាលស្ទឹង។
លោកបញ្ជាក់ថា៖ «ហេតុដូច្នេះអយ្យការអមសាលាដំបូងរាជធានីភ្នំពេញសម្រេចបើកការស៊ើបសួរលើឈ្មោះ នៅ សាត ពីបទក្លែងបន្លំតាមមាត្រា ៦២៦ និងមាត្រា ៦២៧ នៃក្រមព្រហ្មទណ្ឌតាមដីកាសន្និដ្ឋានបញ្ជូនរឿងឲ្យស៊ើបសួរលេខ ៣១៤០ ចុះថ្ងៃទី ១៩ ខែកក្កដា ឆ្នាំ ២០១៩ បញ្ជូនទៅសាលាដំបូងរាជធានីដើម្បីចាត់ការបន្តតាមនីតិវិធី»។
លោក ជិន ម៉ាលីន អ្នកនាំពាក្យក្រសួងយុត្តិធម៌ថ្លែងពីម្សិលមិញថា នីតិវិធីច្បាប់ គឺការសម្រេចនៅលើតុលាការបើមានការចោទប្រកាន់គឺគេបញ្ជូនបន្តទៅចៅក្រមស៊ើបសួរបន្ថែមទៀត ប៉ុន្ដែមិនទាន់កំណត់ថា បុគ្គលម្នាក់នោះមានទោសនៅឡើយទេ គឺគ្រាន់តែមានការចោទប្រកាន់ និងបើកការស៊ើបសួរនៅឡើយ។
លោកបន្តថា ជាគោលការណ៍ បើពាក់ព័ន្ធទៅនឹងមន្ត្រីរាជការ គឺព្រះរាជអាជ្ញាត្រូវជូនដំណឹងមកក្រសួងយុត្តិធម៌ហើយក្រសួងយុត្តិធម៌ជូនដំណឹងបន្តទៅក្រសួងសាមី។ បើគាត់ជាមន្ត្រីក្រោមឱវាទក្រសួងរៀបចំដែនដី ទើបព្រះរាជអាជ្ញាមិនអាចធ្វើលិខិតដាក់ទៅក្រសួងដែនដីផ្ទាល់ទេគឺគាត់ត្រូវរាយការណ៍មកក្រសួងយុត្តិធម៌សិន ហើយក្រសួងយុត្តិធម៌បន្តជូនដំណឹងនេះទៅសាមីក្រសួងរបស់ជនសង្ស័យ។
លោក ម៉ាលីន បន្តថា៖ «ចំណែកដំណើរការនីតិវិធីគឺដំណើរការទៅមុខជានិច្ចហើយគាត់មានទោស ឬមិនមានទោសគឺស្ថិតនៅលើតុលាការជាអ្នកសម្រេច បើរកមិនឃើញមានទោសទេគឺគាត់រួចផុតពីការចោទប្រកាន់ទៅ»។
លោក សេង ឡូត អ្នកនាំពាក្យក្រសួងរៀបចំដែនដី និងលោក លឹម ចាន់សូភី ប្រធានមន្ទីររៀបចំដែនដី នគរូបនីយកម្មខេត្តកណ្ដាល មិនទាន់អាចទាក់ទងសុំអធិប្បាយបានទេកាលពីម្សិលមិញ។
ពលរដ្ឋជាដើមបណ្ដឹងចំនួន ៤ នាក់រួមមាន ឈ្មោះ អៀ ម៉េងឃីម អាយុ ៤៤ ឆ្នាំ រស់នៅខណ្ឌដូនពេញ ប្រាក់ លីម អាយុ ៤៩ ឆ្នាំរស់នៅខណ្ឌទួលគោក ថេង គឹមសាយ អាយុ ៥០ ឆ្នាំរស់នៅស្រុកល្វាឯម និងឈ្មោះ កុល ច័ន្ទសុវត្ថា អាយុ ៥០ ឆ្នាំ រស់នៅខណ្ឌចំការមន។
ពួកគាត់ទាំង ៤ នាក់សរសេរលិខិតរួមគ្នារាយការណ៍ជូនទៅសាលាដំបូងរាជធានីចុះថ្ងៃទី ១០ ខែមិថុនាឆ្នាំ ២០១៩ ដោយរៀបរាប់ថា កាលពីអំឡុងឆ្នាំ ២០០៧-២០០៨ ពួកគាត់បានរួមគ្នាទិញដីស្រែប្រាំងពីពលរដ្ឋសរុប ៨៣ ហិកតាដែលស្ថិតនៅភូមិជើងព្រៃ និងភូមិតាដោល ឃុំអំពៅព្រៃ ស្រុកកណ្ដាលស្ទឹងក្នុងតម្លៃ ០,៧ ដុល្លារក្នុង ១ ម៉ែត្រការ៉េដោយពួកគាត់មានលិខិតផ្ទេរសិទ្ធិកាន់កាប់ដីធ្លី និងលិខិតប្រគល់ប្រាក់ថ្លៃដីព្រមទាំងមានការទទួលស្គាល់ពីអាជ្ញាធរភូមិឃុំត្រឹមត្រូវតាមច្បាប់។ លិខិតបន្តថាលុះដល់ថ្ងៃ ១០ ខែវិច្ឆិកាឆ្នាំ ២០១៥ ឈ្មោះ នៅ ភារម្យ និងមានបក្ខពួក ៩ នាក់ផ្សេងទៀតបានឃុបឃិតគ្នាក្លែងបន្លំស្នាមមេដៃពួកគាត់នៅក្នុងកិច្ចសន្យាផ្ទេរសិទ្ធិកាន់កាប់ដីស្រែនេះ។
ដោយមានការសម្របសម្រួលឯកសារពីលោក នៅ សាត អតីតប្រធានភូមិបាលស្រុកកណ្តាលស្ទឹង និងបច្ចុប្បន្នជាមន្ត្រីមន្ទីររៀបចំដែនដី នគរូបនីយកម្ម និងសំណង់ខេត្ត ហើយប្រើប្រាស់លិខិតក្លែងខាងលើដើម្បីយកដីរបស់ពួកគាត់ទៅលក់ឲ្យឈ្មោះ យ៉ែម រចនា រហូតឈានដល់ការចេញបណ្ណកម្មសិទ្ធិ (ប្លង់រឹង) នៅទីតាំងដីខាងលើនេះបើទោះបីជាមានការប្ដឹងជំទាស់នឹងការចេញបណ្ណកម្មសិទ្ធិពីសំណាក់ពួកគាត់ដែលជាម្ចាស់ដីក្តី។
«បច្ចុប្បន្នតុលាការរាជធានីបាននិងកំពុងចេញដីកាបញ្ជាឲ្យតាមចាប់ខ្លួននៅ ភារម្យ មកផ្តន្ទាទោសតាមផ្លូវច្បាប់ពាក់ព័ន្ធនឹងអំពើក្លែងឯកសារខាងលើនេះ។ អាស្រ័យហេតុនេះសូមលោកព្រះរាជអាជ្ញាជួយពិនិត្យ និងសម្រេចចោទប្រកាន់ជនល្មើសខាងលើទៅតាមផ្លូវច្បាប់ ហើយយើងខ្ញុំសុំទាមទារដីទាំងអស់មកវិញ និងសុំទាមទារសំណងការខូចខាតពេលវេលាជំងឺចិត្តជាប្រាក់ចំនួន ៤០ ម៉ឺនដុល្លារអាមេរិក»។
មិនអាចស្វែងរកប្រភពទាក់ទងលោក នៅ សាត ដើម្បីសុំការបញ្ជាក់ជុំវិញការចោទប្រកាន់របស់ប្រជាពលរដ្ឋនេះបានទេកាលពីម្សិលមិញ។
គួរបញ្ជាក់ថាលោក នៅ សាត កាលពីថ្ងៃទី ៣ ខែមិថុនា ឆ្នាំ ២០១៩ បានចូលទៅបំភ្លឺទៅតាមការកោះហៅរបស់លោក ងិន ពេជ ម្តងរួចហើយ ពាក់ព័ន្ធសំណុំរឿង «សមគំនិតក្នុងអំពើក្លែងបន្លំប្រើប្រាស់លិខិត និងលួចលក់អចលនវត្ថុដែលមិនមែនជារបស់ខ្លួន»នេះ៕