ភ្នំពេញៈ ក្រសួងការបរទេស កម្ពុជានឹងធ្វើមោឃភាពលិខិតឆ្លងដែនការទូតដែលបានចេញឲ្យជនបរទេសដែលគ្មានសញ្ជាតិខ្មែរពីកំណើត ឯក្រុមអ្នកវិភាគជឿជាក់ថា វាអាចមានអ្វីមួយជាប់ទាក់ទងទៅនឹងសេចក្តីរាយការណ៍ដែលលើកឡើងថាលោកស្រីយីងឡាក់ កំពុងប្រើប្រាស់លិខិតឆ្លងដែនកម្ពុជា។
កាលពីចុងសប្តាហ៍នេះរដ្ឋាភិបាលបានចេញសារាចរណែនាំមួយស្តីពីការផ្តល់លិខិតឆ្លងដែនការទូតដល់ជនបរទេសដែលត្រូវបានតែងតាំងធ្វើជាទីប្រឹក្សាឬជំនួយការសម្រាប់ឥស្សរជននយោបាយ និងស្ថាប័ននានា។
សារាចរណែនាំ ២ ទំព័រដែលបានចេញផ្សាយកាលពីថ្ងៃទី៩ ខែមករា ដោយលោកនាយករដ្ឋមន្ត្រីហ៊ុនសែន ដែលភ្នំពេញប៉ុស្តិ៍ទើបទទួលកាលពីថ្ងៃសៅរ៍ បញ្ជាក់ថាកន្លងមករាជរដ្ឋាភិបាលសង្កេតឃើញថា ឥស្សរជន និងក្រសួង ស្ថាប័នមួយចំនួនបានតែងតាំងបុគ្គលដែលជាពលរដ្ឋបរទេស ឲ្យធ្វើជាទីប្រឹក្សា និងជំនួយការ ហើយក្នុងចំណោមបុគ្គលទាំងនោះមានខ្លះបានចូលសញ្ជាតិខ្មែរ និងបានដាក់ពាក្យសុំប្រើប្រាស់លិខិតឆ្លងដែនការទូតនៃព្រះរាជាណាចក្រកម្ពុជា។
សារាចរណែនាំនោះរៀបរាប់ថា ដើម្បីបង្ការទប់ស្កាត់ការប្រើប្រាស់លិខិតឆ្លងដែនការទូតមិនត្រឹមត្រូវទៅតាមបេសកកម្មស្របតាមអនុក្រឹត្យចុះថ្ងៃទី ៣ ខែធ្នូ ឆ្នាំ ២០០៨ នោះ រដ្ឋាភិបាលកម្ពុជាបានណែនាំថា លិខិតឆ្លងដែនការទូតនៃព្រះរាជាណាចក្រកម្ពុជាមិនត្រូវផ្តល់ជូនទីប្រឹក្សាឬជំនួយការដែលគ្មានសញ្ជាតិខ្មែរពីកំណើតនោះទេ លើកលែងតែក្នុងករណីដែលរាជរដ្ឋាភិបាលយល់ថា ចាំបាច់បំផុត។
សារាចរណែនាំបញ្ជាក់ថា៖ «រាល់ក្រសួងស្ថាប័នមានភារកិច្ចប្រមូលលិខិតឆ្លងដែនការទូតដែលក្រសួងស្ថាប័ននោះបានស្នើសុំជូនទីប្រឹក្សា និងជំនួយការរបស់ខ្លួនដែលពុំមានសញ្ជាតិខ្មែរពីកំណើត ហើយប្រគល់លិខិតឆ្លងដែនការទូតទាំងនោះជូនក្រសួងការបរទេសនិងសហប្រតិបត្ដិការអន្តរជាតិ មិនឲ្យហួសរយៈពេល ១ ខែគិតចាប់ពីថ្ងៃចុះហត្ថលេខាលើសារាចរនេះ»។
លិខិតដដែលបន្ថែមថា៖ «ក្រសួងការបរទេស និងសហប្រតិបត្ដិការអន្ដរជាតិមានភារកិច្ចពិនិត្យនិងធ្វើមោឃភាពលិខិតឆ្លងដែនការទូតទាំងនោះ ដែលកន្លងមកត្រូវបានផ្តល់ជូនបុគ្គលដែលគ្មានសញ្ជាតិខ្មែរពីកំណើត»។
សារាចរណែនាំក៏បានបង្គាប់ឲ្យក្រសួងមហាផ្ទៃទប់ស្កាត់ការប្រើប្រាស់លិខិតឆ្លងដែនការទូតទាំងនោះសម្រាប់ការចេញចូលនៅតាមច្រកទ្វារព្រំដែននានានៃព្រះរាជាណាចក្រកម្ពុជាដែរ។
លោកកេត សុផាន់ អ្នកនាំពាក្យក្រសួងការបរទេស ប្រាប់ភ្នំពេញប៉ុស្តិ៍ ពីម្សិលមិញថា ក្រសួងការបរទេសបានស្នើសុំទៅលោកនាយករដ្ឋមន្ត្រីហ៊ុន សែន ឲ្យចេញសារាចរណែនាំនេះ។
លោកបន្តថា៖ «យើងស្នើក្រសួងមហាផ្ទៃនិងក្រសួងពាក់ព័ន្ធនានាឲ្យប្រមូលលិខិតឆ្លងដែនការទូតសម្រាប់ទីប្រឹក្សាដែលគ្មានសញ្ជាតិខ្មែរពីកំណើត ហើយប្រមូលទៅក្រសួងការបរទេសឲ្យអស់ក្នុងរយៈពេល ១ ខែ»។
ប៉ុន្តែលោកបានបដិសេធអត្ថាធិប្បាយថា តើនឹងមានចំណាត់ការអ្វីបន្ទាប់ប្រសិនបើជនបរទេសដែលគ្មានសញ្ជាតិខ្មែរពីកំណើតទាំងនោះនៅតែបន្តប្រើប្រាស់លិខិតឆ្លងដែនបែបនេះនោះ។
សារាចរណែនាំរបស់រដ្ឋាភិបាលនេះត្រូវបានធ្វើឡើង ក្រោយពេលកាសែតជាភាសារអង់គ្លេស South China Morning Post ដែលមានមូលដ្ឋាននៅទីក្រុងហុងកុងកាលពីសប្ដាហ៍មុនបានរាយការណ៍ថា លោកស្រីយីងឡាក់ ស៊ីណាវ៉ាត្រាដែលជាអតីតនាយករដ្ឋមន្ត្រីថៃកំពុងប្រើប្រាស់លិខិតឆ្លងដែនកម្ពុជាដើម្បីចុះឈ្មោះជាប្រធានក្រុមហ៊ុនមួយនៅទីក្រុងហុងកុងកាលពីខែសីហា។
ប៉ុន្តែការលើកឡើងនេះត្រូវបានមន្ត្រីរដ្ឋាភិបាលច្រានចោលកាលពីសប្តាហ៍មុនដោយបាននិយាយថា កម្ពុជាមិនធ្លាប់បានចេញលិខិតឆ្លងដែនឲ្យលោកស្រីយីងឡាក់ ទេ។
ទាក់ទងទៅនឹងសេចក្តីរាយការណ៍ថា តើលោកស្រីយីងឡាក់ប្រើប្រាស់លិខិតឆ្លងដែនកម្ពុជាដែរឬទេនោះ លោកសុផាន់ ថ្លែងថា ព័ត៌មានដែលចេញផ្សាយដោយកាសែត South China Morning Post គឺមានលក្ខណៈស្រដៀងគ្នាទៅនឹងកាសែត Asia Times ដែរដែលធ្លាប់រាយការណ៍ថា មានមូលដ្ឋានកងទ័ពជើងទឹកចិននៅខេត្តកោះកុង។
លោកថា៖ «ខ្ញុំអាចនិយាយបានថា ពួកគេចេញផ្សាយព័ត៌មានដោយមានចេតនា ពីមុនកាសែត Asia Times ឥឡូវកាសែត South China Morning Post»។
លោកផាត សុផានិត អ្នកនាំពាក្យក្រសួងមហាផ្ទៃបានថ្លែងម្សិលមិញថា ក្រសួងមហាផ្ទៃមិនបានពិនិត្យលិខិតឆ្លងដែនការទូតហើយមិនមានតួលេខថា តើលិខិតឆ្លងដែនបែបនោះត្រូវបានផ្តល់ជូនឲ្យប៉ុន្មាននាក់ហើយនោះទេ។ ក្រសួងមហាផ្ទៃគ្រប់គ្រងតែលិខិតឆ្លងដែនធម្មតាប៉ុណ្ណោះ។
លោកបញ្ជាក់ថា៖ «ទោះជាយ៉ាងណាក៏ដោយយើងកំពុងព្យាយាមអនុវត្តតាមសារាចរណែនាំរបស់សម្តេចតេជោនាយករដ្ឋមន្ត្រីនេះឱ្យបានជោគជ័យ»។
លោកគិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាថ្លែងថាសារាចរនេះអាចជាប់ទាក់ទងនឹងព័ត៌មានដែលរាយការណ៍ថាលោកស្រីយីងឡាក់ កំពុងប្រើលិខិតឆ្លងដែនកម្ពុជា។
លោកថា៖ «វាមិនចាំបាច់ឲ្យក្រសួងធ្វើការស៊ើបអង្កេតទេ។ ប្រសិនបើសារព័ត៌មានផ្សព្វផ្សាយហើយយើងធ្វើការស៊ើបអង្កេតលើរឿងនេះរឿងនោះ សួរថា តើក្រសួងនឹងរវល់ជាមួយនឹងព័ត៌មានដែលគ្មានមូលដ្ឋានទាំងនោះយ៉ាងណាទៅ? ដូច្នេះហើយ ខ្ញុំគិតថា ការបដិសេធរបស់ក្រសួងនេះគឺគ្រប់គ្រាន់ហើយ។ មិនចាំបាច់ធ្វើការស៊ើបអង្កេតអ្វីទេប្រសិនបើវាមិនប៉ះពាល់ដល់ទំនាក់ទំនងរវាងកម្ពុជានិងថៃនោះ»៕NS