ភ្នំពេញៈ មន្ត្រីនាំពាក្យក្រសួងយុត្តិធម៌លើកទឹកចិត្តឲ្យអ្នកដែលត្រូវបានចាប់ខ្លួនក្នុងករណីជាប់ចោទបទ «រួមគំនិតក្បត់» សារភាពកំហុសដើម្បីទទួលបានការអនុគ្រោះ ក្រោយពីជនដែលពាក់ព័ន្ធជិត ១៥០ នាក់បានចេញមុខសារភាពមុនពេលចាប់ខ្លួន។
លោក ជិន ម៉ាលីន អ្នកនាំពាក្យក្រសួងយុត្តិធម៌បានថ្លែងថា អ្នកដែលត្រូវបានចាប់ខ្លួនហើយនៅតែអាចមានឱកាសចេញក្រៅឃុំដោយការដោះលែង ប្រសិនបើពួកគេសារភាពកំហុសនៅដំណាក់កាលចៅក្រមស៊ើបសួរ។
លោក ម៉ាលីន ថ្លែងថា៖ «ច្បាប់លើកទឹកចិត្តឲ្យអ្នកជាប់ពាក់ព័ន្ធទាំងអស់ចូលសារភាព ហើយសហការជាមួយសមត្ថកិច្ចគ្រប់ដំណាក់កាលទាំងអស់នៃនីតិវិធីបានន័យថាដំណាក់កាលទី ១ គឺមុនពេលព្រះរាជអាជ្ញាធ្វើការចោទប្រកាន់។ តាមមាត្រា ៤៥៤ នៃក្រមព្រហ្មទណ្ឌ អ្នកដែលចូលសារភាពអាចរួចផុតពីការចោទប្រកាន់គឺមិនទទួលរងការចោទប្រកាន់ ឬផ្ដន្ទាទោស»។
លោកបន្តថា៖ «ដំណាក់កាល ១ ទៀតគឺដំណាក់កាលចៅក្រមស៊ើបសួរគឺអ្នកដែលរងការចោទប្រកាន់ ហើយកំពុងស្ថិតនៅក្នុងដំណាក់កាលចៅក្រមស៊ើបសួរច្បាប់ក៏លើកទឹកចិត្តឲ្យមានការសហការជាមួយសមត្ថកិច្ចដែរ ដើម្បីទទួលបានការអនុគ្រោះ។ ក្នុងពេលនោះចៅក្រមស៊ើបសួរអាចអនុគ្រោះដោយឲ្យនៅក្រៅឃុំជាដើម។ យើងឃើញថាអ្នកដែលចូលសារភាពកន្លងមកមានចំនួនច្រើនអ្នកខ្លះសារភាពមុនទទួលរងការចោទប្រកាន់។ ចំណែកខ្លះទៀតបានសារភាពក្រោយពេលចោទប្រកាន់ហើយត្រូវបានចៅក្រមស៊ើបសួរអនុញ្ញាតឲ្យនៅក្រៅឃុំ»។
គិតត្រឹមថ្ងៃទី ២៧ ខែតុលា សមត្ថកិច្ចបានចាប់ខ្លួនមនុស្ស ៤៥ នាក់ ដែលជាប់ចោទបទ «រួមគំនិតក្បត់» ខណៈដែលមនុស្ស ៥៥ នាក់ទៀត កំពុងស្ថិតក្រោមការតាមចាប់ខ្លួនតាមដីការបស់តុលាការ។ ជាមួយគ្នានេះមនុស្សចំនួន ១៤៣ នាក់ បានចេញមុខសារភាពទោសកំហុសរបស់ខ្លួន។ នេះបើយោងតាមលោក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិប្រាប់ភ្នំពេញប៉ុស្តិ៍កាលពីថ្ងៃម្សិលមិញ។
តួលេខនេះគឺគិតចាប់តាំងពីពាក់កណ្ដាលខែកញ្ញាមក បន្ទាប់ពីរដ្ឋាភិបាលបានចាត់ទុកការវិលត្រឡប់របស់លោក សម រង្ស៊ី ថាជាផែនការធ្វើរដ្ឋប្រហារផ្ដួលរំលំរាជរដ្ឋាភិបាល និងរាជបល្ល័ង្ក។ ដោយសារតែលោកត្រូវបានចោទប្រកាន់ពីបទប្រមាថចំពោះអង្គព្រះមហាក្សត្រ លោកប្រកាសផ្ដល់ថវិកាដល់កងទ័ពផ្ដាច់ខ្លួនក៏ដូចជាការអំពាវនាវពលរដ្ឋឲ្យងើបឡើងចាប់លោកនាយករដ្ឋមន្ត្រី ហ៊ុន សែន។
ប៉ុន្តែបើតាមតួលេខពីសកម្មជនអតីតគណបក្សប្រឆាំងគិតចាប់ពីដើមឆ្នាំ ២០១៩ នេះមកសកម្មជន និងអតីតសមាជិកអតីតគណបក្សសង្គ្រោះជាតិសរុប ៥៧ នាក់ ត្រូវបានចាប់ខ្លួនដោយជាប់ចោទពីបទ «រួមគំនិតក្បត់» និងបទញុះញង់។
កាលពីថ្ងៃទី ២៨ តុលា មនុស្សម្នាក់ដែលធ្លាប់ជាប់ពន្ធនាគារក្នុងសំណុំរឿងកុបកម្មនៅអតីតទីលានប្រជាធិបតេយ្យកាលពីឆ្នាំ ២០១៤ គឺលោក សំ វុទ្ធី បានចេញសារភាពនៅស្នងការដ្ឋាននគរបាលរាជធានីភ្នំពេញបន្ទាប់ពីលោកត្រូវបានចោទប្រកាន់ពីបទរួមគំនិតក្បត់ដោយតុលាការក្រុងភ្នំពេញ។ នេះបើយោងតាមនាយកដ្ឋានព័ត៌មាននៃអគ្គនាយកដ្ឋានយោធាសេវាក្រសួងការពារជាតិ។
លោក សំ វុទ្ធី ថ្លែងថាលោកបានទៅព្យាបាលជំងឺនៅប្រទេស ថៃ ពេលនោះបានជួបលោក ម៉ន ផល្លា ហើយលោក ផល្លា ដែលជាប់ចោទពីបទ «រួមគំនិតក្បត់» ដែរនោះបានឲ្យលោកកៀរគរកម្លាំងមកស្វាគមន៍លោក សម រង្ស៊ី នៅថ្ងៃទី ៩ វិច្ឆិកា។ ប៉ុន្តែលោកមិនធ្វើតាមទេ ព្រោះខ្លាចមានទោសម្ដងទៀត។
លោក វុទ្ធី បានប្រាប់សមត្ថកិច្ចថា៖ «ខ្ញុំយល់ឃើញថា ទណ្ឌិត សម រង្ស៊ី និងបុគ្គលមួយចំនួនត្រូវបានតុលាការកាត់ទោសពីបទក្បត់ជាតិ។ ដូច្នេះខ្ញុំមិនធ្វើតាម ខ្ញុំខ្លាចមានរឿងម្តងទៀត ព្រោះខ្ញុំមានរឿងរួចហើយជាប់គុក ២ ដងមិនមានអ្នកទៅមើលទេ ចេញមកវិញត្រូវរើសអើង»។
លោកមេធាវី សំ សុគង់ បានប្រាប់ឲ្យដឹងពីម្សិលមិញថា លោកទទួលការពារក្ដីអ្នកដែលត្រូវបានចាប់ខ្លួនពីបទរួមគំនិតក្បត់ប្រមាណ ៣០ នាក់ ខណៈដែលមេធាវីផ្សេងទៀតរួមមាន លោក ជូង ជូងី លោក កែត ឃី និងលោក ហែម សុជាតិ ត្រូវបានពឹងពាក់ការពារក្ដីអ្នកដែលត្រូវបានចាប់ខ្លួនផ្សេងទៀត។ លោកថាជនត្រូវចោទដែលលោកការពារនឹងចាប់ផ្ដើមនាំទៅតុលាការជាបន្តបន្ទាប់ចាប់ពីថ្ងៃទី ៣១ តុលាតទៅ ដើម្បីសាកសួរបន្តនៅដំណាក់កាលចៅក្រមស៊ើបដែលលោកនឹងអមពួកគេនៅពេលស្ដាប់ចម្លើយ។
ស្របពេលជាមួយគ្នានេះលោក គង់ គាំ អតីតប្រធានគណបក្ស សម រង្ស៊ី បានឲ្យពលរដ្ឋពិចារណាជ្រើសរើសយករវាង «អំបុក» ឬ «អំបែង» នៅថ្ងៃទី ៩ វិច្ឆិកា ខាងមុខនេះ។
លោកសរសេរនៅលើហ្វេសប៊ុកកាលពីថ្ងៃចន្ទថា ផែនការរបស់លោក សម រង្ស៊ី ដែលប្រកាសថា «អន្តរជាតិអម ខ្មែរក្រៅជូន ខ្មែរក្នុងទទួលប្រៀបដូចទឹកបាក់ទំនប់មិនអាចទប់បាន» គឺគ្រាន់តែជាខ្យល់ប៉ុណ្ណោះ។ នៅថ្ងៃទី ៩ ខែវិច្ឆិកា គ្មានបរទេស ពិសេសគ្មានខ្មែរណាដែលឆោតទៅស៊ីអំបែងជំនួសអំបុកឡើយ។
លោកបន្តថា មានតែការបោះឆ្នោតពីប្រជាពលរដ្ឋទាំងអស់គ្នាតែមួយគត់ និងការបោះឆ្នោតជាទៀងទាត់រៀងរាល់ ៥ ឆ្នាំម្តងតែប៉ុណ្ណោះ ទើបអាចមានរបបប្រជាធិបតេយ្យ ការគោរពសិទ្ធិមនុស្ស និងការអភិវឌ្ឍចីរភាពសម្រាប់ប្រទេសជាតិបាន៕
វីដេអូ៖