.jpg)
សំណង់អគារសាងសង់កាស៊ីណូមួយ នៅខេត្តព្រះសីហនុ។ ហេង ជីវ័ន
ព្រះសីហនុ: ក្រសួងរៀបចំដែនដីនគរូបនីយកម្ម និងសំណង់បានរកឃើញសំណង់មួយចំនួននៅខេត្តព្រះសីហនុបាននិងកំពុងសាងសង់ និងខ្លះសង់រួចទាំងពុំមានលិខិតអនុញ្ញាត និងស្នើសុំបញ្ឈប់ ខណៈសកម្មភាពនេះមានត្រឹមតែគោលការណ៍ឱ្យដំណើរការជាអ្វីដែលមន្ត្រីអាជ្ញាធរអះអាងថា ដើម្បីសម្រួលពេលវេលាជូនវិនិយោគិន។
តាមលិខិត ១ ចុះថ្ងៃទី ៣ តុលា លោក ឆាន់ សាផាន រដ្ឋលេខាធិការក្រសួងរៀបចំដែនដីនគរូបនីយកម្ម និងសំណង់ជម្រាបជូនលោក យន្ត មីន អភិបាលខេត្តព្រះសីហនុក្នុងកម្មវត្ថុថា «ការបញ្ឈប់ផ្តល់គោលការណ៍ឱ្យដំណើរការសាងសង់មុនទទួលបានលិខិតអនុញ្ញាតសាងសង់ពីស្ថាប័នមានសមត្ថកិច្ច»។
លិខិតបន្តថាការដ្ឋានជាច្រើនក្នុងខេត្តនេះបាននិងកំពុងសាងសង់ ខ្លះជិតរួចរាល់ទាំងស្រុងដោយពុំមានលិខិតអនុញ្ញាតសាងសង់ មានតែគោលការណ៍ឱ្យដំណើរការសាងសង់ចេញដោយរដ្ឋបាលខេត្តព្រះសីហនុដែលផ្ទុយពីអនុក្រឹត្យលេខ ៨៦ អនក្រ.បក ចុះថ្ងៃទី ១៩ ខែធ្នូ ឆ្នាំ ១៩៩៧ ស្តីពីលិខិតអនុញ្ញាតសាងសង់បណ្តាលឱ្យមានបទល្មើសសំណង់ប៉ះពាល់សណ្ដាប់ធ្នាប់សាធារណៈ សោភណភាព និងគុណភាពសំណង់។
ក្នុងលិខិតនោះលោក ឆាន់ សាផាន បានស្នើរដ្ឋបាលខេត្តព្រះសីហនុបញ្ឈប់ការចេញលិខិតជាគោលការណ៍នេះមុនទទួលបានលិខិតអនុញ្ញាតពីស្ថាប័នមានសមត្ថកិច្ច និងត្រូវពង្រឹងការគ្រប់គ្រងការដ្ឋានសំណង់ឱ្យគោរពតាមបទដ្ឋានគតិយុត្ត និងបច្ចេកទេសជាធរមាន។
លោក យន្ត មីន អភិបាលខេត្តព្រះសីហនុបានថ្លែងថា លោកនឹងអនុវត្តតាមការណែនាំនេះ និងសុំអនុសាសន៍បន្ថែមប្រសិនបើមានកិច្ចការចាំបាច់។ លោកថាខ្វះចន្លោះកន្លងមកគឺដើម្បីសម្រួលពេលដល់វិនិយោគិនព្រោះបើចាំច្បាប់ពេញលេញនឹងត្រូវចំណាយពេលយូរ។
លោកបន្តថាការរកឃើញនេះគឺត្រឹមត្រូវហើយ ព្រោះកន្លងមកអាជ្ញាធរខេត្តុធ្លាប់បានចុះហាមឃាត់ការដ្ឋានច្រើនកន្លែងដែរ ខណៈពួកគេផ្ដើមសាងសង់ដោយមិនបានជូនដំណឹង។ ប៉ុន្តែលោកបានបដិសេធចំពោះការចោទថា លោកប្រព្រឹត្តអំពើពុករលួយ។
លោក យន្ត មីន បញ្ជាក់ថា៖ «បញ្ហាគេចោទខ្ញុំថា ប្រព្រឹត្តអំពើពុករលួយដែលអនុញ្ញាតឲ្យគេសាងសង់ខុសច្បាប់បែបនេះគឺថាគេចេះតែថាទៅ ខ្ញុំមិនអាចទៅបិទមាត់ពួកគេបានទេ ខ្ញុំគ្មានបានប្រព្រឹត្តអំពើពុករលួយអ្វីទេ។ កន្លងមកយើងចេះតែយោគយល់ដល់ភ្ញៀវគេមកវិនិយោគប្រទេសយើង អ៊ីចឹងយើងចេះតែជួយសម្រួលទៅ ប៉ុន្ដែបើមានការណែនាំអ៊ីចឹង ខ្ញុំគ្រាន់តែអនុវត្តតាមហ្នឹងទៅ»។
លោក សុខ គីន ប្រធានសហព័ន្ធសហជីពកម្មករសំណង់ និងព្រៃឈើកម្ពុជាបានយល់ឃើញថា មិនថាតែច្បាប់សាងសង់នៅខេត្តព្រះសីហនុទេ សូម្បីសំណង់នៅភ្នំពេញក៏ការអនុវត្តច្បាប់នៅមានកម្រិតដែរ។ ការអនុវត្តច្បាប់សាងសង់មួយចំនួននៅកម្ពុជាអនុវត្តមិនស្មើភាព និងនៅមានកម្រិតច្រើន។
លោកបន្តថាករណីនៅខេត្តព្រះសីហនុនេះលោកសង្កេតឃើញថា មួយរយៈចុងក្រោយហាក់មានការសាងសង់អនាធិបតេយ្យ ហើយអាចនឹងមានការលំបាកច្រើនក្នុងការទប់ស្កាត់ដោយត្រូវអនុវត្តច្បាប់ឲ្យបានតឹងរ៉ឹងបំផុតចៀសវាងបង្កភាពអនាធិបតេយ្យ។
លោកថា៖ «ខ្ញុំមិនអាចវាយតម្លៃអ្វីឲ្យស៊ីជម្រៅទេ ប៉ុន្ដែកន្លងមកការអនុវត្តច្បាប់ធូររលុងគឺវាតែងតែអមជាមួយនឹងអំពើពុករលួយជាក់ជាមិនខានទេ ហើយបើចង់អនុវត្តច្បាប់ឲ្យមានប្រសិទ្ធភាព វាទាល់តែយើងកុំលូកលាន់នឹងអំពើពុករលួយ»។
យ៉ាងណាក្ដីក្រោយចេញលិខិតនេះផ្ញើទៅអាជ្ញាធរខេត្តព្រះសីហនុ ក្រសួងរៀបចំដែនដីកាលពីម្សិលមិញបានបង្កើតក្រុមការងារចម្រុះ ៦ ក្រុមឲ្យចុះតាមដាន និងត្រួតពិនិត្យការដ្ឋានសំណង់ក្នុងខេត្តព្រះសីហនុ។
តាមសេចក្តីសម្រេច «ក្រុមការងារត្រូវមានភារកិច្ចចុះតាមដាន និងត្រួតពិនិត្យការដ្ឋានសំណង់ស្ថិតក្នុងភូមិសាស្ត្រខេត្តព្រះសីហនុឲ្យអនុវត្តស្របតាមលិខិតអនុញ្ញាតសាងសង់ច្បាប់ និងលិខិតបទដ្ឋានគតិយុត្ត និងបច្ចេកទេស និងធ្វើរបាយការណ៍ផ្ញើជូនអគ្គនាយកដ្ឋានរៀបចំដែនដីដើម្បីជូនថ្នាក់ដឹកនាំក្រសួងពិនិត្យ និងសម្រេច»៕
