ព្រះសីហនុៈ ក្នុងជំនួបទ្វេភាគីរវាងអភិបាលខេត្ដព្រះសីហនុ និងគណៈប្រតិភូក្រសួងសន្តិសុខចិនកាលពីថ្ងៃសុក្រសប្ដាហ៍មុនភាគីចិនបានប្ដេជ្ញាធ្វើការអប់រំផ្សព្វផ្សាយដល់ជនជាតិចិនដែលបានមកវិនិយោគ និងស្នាក់នៅប្រកបអាជីវកម្មនៅខេត្ដព្រះសីហនុឲ្យគោរពច្បាប់កម្ពុជាឲ្យបានតឹងរ៉ឹងបំផុត។
លោក ឃាង ភារម្យ អ្នកនាំពាក្យរដ្ឋបាលសាលាខេត្ដព្រះសីហនុថ្លែងពីម្សិលមិញថា ក្នុងជំនួបទ្វេភាគីនេះរដ្ឋបាលខេត្ដព្រះសីហនុបានបង្ហាញពីសម្ទុះនៃការអភិវឌ្ឍយ៉ាងគំហុករបស់ខេត្ដនាពេលបច្ចុប្បន្ន និងបញ្ហាប្រឈមមួយចំនួនដែលកំពុងកើតមានឡើង។ លោកថ្លែងថា៖ «ក្នុងនោះភាគីចិនបានប្ដេជ្ញានឹងបន្តការអប់រំ ផ្សព្វផ្សាយ ដល់វិនិយោគិនជនជាតិចិនរបស់ខ្លួនដែលមករកស៊ីនៅខេត្តព្រះសីហនុត្រូវតែអនុវត្ដច្បាប់ឲ្យបានតឹងរ៉ឹងបំផុត»។
លោក គួច ចំរើន អភិបាលខេត្ដព្រះសីហនុបានថ្លែងក្នុងជំនួបទ្វេភាគីនេះថា ក្រោមការដឹកនាំរបស់ប្រធានាធិបតីចិនដោយអនុវត្តគោលនយោបាយ «ផ្លូវមួយខ្សែក្រវាត់មួយ» និងការដឹកនាំរបស់លោក ហ៊ុន សែន នាយករដ្ឋមន្ត្រីកម្ពុជាដោយអនុវត្តនូវ «គោលនយោបាយចតុកោណ» ធ្វើឲ្យប្រទេសទាំង ២ មានទំនាក់ទំនងល្អទំហំពាណិជ្ជកម្មវិនិយោគមានការកើនឡើង ហើយលំហូរចូលនៃវិនិយោគិនចិនធ្វើឲ្យសេដ្ឋកិច្ចកម្ពុជាមានការកើនឡើងយ៉ាងខ្ពស់ក្នុងរយៈពេល ២ ឆ្នាំចុងក្រោយនេះ ពិសេសសេដ្ឋកិច្ចខេត្តព្រះសីហនុមានការរីកលូតលាស់យ៉ាងឆាប់រហ័ស។ លោកថាខេត្តព្រះសីហនុប្រែក្លាយការអភិវឌ្ឍជាទីក្រុងសេដ្ឋកិច្ចពិសេសពហុមុខងារ ដែលមានសំណង់អគារខ្ពស់ៗ ការដឹកជញ្ជូន សម្ភារសំណង់ និងទំនិញផ្សេងៗទៀតតាមកំពង់ផែទឹកជ្រៅរបស់កម្ពុជាមានការកើនឡើង។ តែក៏មានបញ្ហាប្រឈមធ្វើឲ្យមានការខូចខាតផ្លូវថ្នល់ ហើយសំរាម ទឹកកខ្វក់ ក៏មានការកើនឡើងដែរ។
លោក ចំរើន ថ្លែងថា៖ «ចំណុចដែលរដ្ឋបាលខេត្តត្រូវដោះស្រាយគឺបញ្ហាទឹកកខ្វក់ ទឹកស្អាត ភ្លើងដើម្បីឆ្លើយតបតាមតម្រូវការបំពេញបន្ថែមនៃកំណើនវិនិយោគយ៉ាងគំហុកនេះ។ លំហូរចូលនៃវិនិយោគិន ពិតជាបានចូលរួមចំណែកធ្វើឲ្យយើងមានលទ្ធភាពក្នុងការកសាងតាមរយៈចំណូល ពន្ធដារ ចំណូលថវិកាជាតិ និងថ្នាក់ក្រោមជាតិមានការកើនឡើង»។ «ទន្ទឹមនោះការងារសន្តិសុខទាមទារឲ្យកងកម្លាំងរបស់យើងមានសមត្ថភាព និងមានកម្លាំងគ្រប់គ្រាន់ក្នុងការអនុវត្តច្បាប់កាន់តែមានប្រសិទ្ធភាព»។
លោក LIAO JINRONG អគ្គនាយកនៃអគ្គនាយកដ្ឋានសហប្រតិបត្តិការអន្តរជាតិនៃក្រសួងសន្តិសុខសាធារណរដ្ឋចិនថ្លែងក្នុងជំនួបនេះថា ប្រទេសចិន និងកម្ពុជាមានកិច្ចសហប្រតិបត្តិការគ្នាល្អយូរអង្វែង និងរហូតមកដល់បច្ចុប្បន្នចំណងមិត្តភាព សាមគ្គីភាព និងកិច្ចសហប្រតិបត្តិការគ្រប់ជ្រុងជ្រោយ គឺល្អជាងគេនៅលើពិភពលោក។ លោកថ្លែងថាប្រធានាធិបតីចិន លោក ស៊ី ជីនភីង បានជួបពិភាក្សាជាមួយលោកនាយករដ្ឋមន្ដ្រី ហ៊ុន សែន នៅខែកុម្ភៈជារៀងរាល់ឆ្នាំ។ លោក ហ៊ុន សែន បានទៅទស្សនកិច្ចនៅប្រទេសចិន និងបានពិភាក្សាក្នុងការអនុវត្តច្បាប់សម្រាប់ឆ្នាំ ២០១៩ រវាងចិននិងកម្ពុជា។ ការកសាងមិត្តភាពប្រទេសទាំង ២ បង្កលក្ខណៈល្អលើវិស័យទេសចរណ៍សេដ្ឋកិច្ច។
លោកបញ្ជាក់ថា៖ «ភាគីចិននឹងបន្តការអប់រំផ្សព្វផ្សាយដល់ជនជាតិចិនមកវិនិយោគនៅខេត្ដព្រះសីហនុ ត្រូវតែអនុវត្តច្បាប់យ៉ាងតឹងរ៉ឹងបំផុត។ យើងសង្ឃឹមថា សេដ្ឋកិច្ចខេត្តព្រះសីហនុមានការអភិវឌ្ឍកើនឡើង ប្រជាពលរដ្ឋមានជីវភាពកាន់តែល្អថែមទៀតនៅពេលខាងមុខ»។
លោក សុខ សុខុម ប្រធានអង្គការស្រាវជ្រាវជាតិកម្ពុជា (CNRO) បានសាទរ ចំពោះការប្តេជ្ញាចិត្ដរបស់គណៈប្រតិភូក្រសួងសន្តិសុខចិននេះ ដោយបញ្ជាក់ថាបើសិនជាការសហការរវាងប្រទេសទាំង ២ បានល្អអំពីសន្ដិសុខ សុវត្ថិភាពនោះនឹងជួយជំរុញឲ្យការអភិវឌ្ឍកាន់តែមានល្បឿនលឿនជាងមុន។ ប៉ុន្តែលោកថា៖ «បើសិនការអនុវត្ដច្បាប់មានការធូររលុងធ្វើឲ្យអ្នកវិនិយោគបរទេសដែលមកវិនិយោគអាចផ្គើននឹងច្បាប់បណ្ដាលឲ្យមានផលប៉ះពាល់កើតមានឡើង។ ជាក់ស្ដែងដូចពេលកន្លងមកមានករណីបទល្មើសគ្រឿងញៀន និងបទល្មើសឆបោកជំរិតទារប្រាក់តាមបណ្ដាញអ៊ីនធឺណិត»។
ក្នុងឆ្នាំ ២០១៩ នេះកម្ពុជាបានចាប់បញ្ជូនជនសង្ស័យជនជាតិចិនជាង ៥០០ នាក់ត្រឡប់ទៅចិនវិញ ហើយកាលពីថ្ងៃទី ១៥ សីហា សមត្ថកិច្ចខេត្ដព្រះសីហនុបានចាប់ជនជាតិចិន ១២៧ នាក់ទៀតពាក់ព័ន្ធបទល្មើសឆបោកជំរិតទារប្រាក់តាមអ៊ីនធឺណិត៕