.jpg)
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា។ រូបថត ហ៊ាន រង្សី
ភ្នំពេញៈ ក្រសួងអប់រំ យុវជន និងកីឡាបានចេញសេចក្ដីប្រកាសព័ត៌មានមួយដោយច្រានចោលចំពោះព័ត៌មានពាក់ព័ន្ធនឹងការចោទប្រកាន់ដែលថា មានការរត់ការ ដើម្បីដំឡើងតួនាទីឋានន្តរស័ក្តិ និងកាំប្រាក់ដោយក្រសួងចាត់ទុកថា សកម្មភាពទាំងនេះធ្វើឲ្យប៉ះពាល់ដល់សេចក្ដីថ្លៃថ្នូរ និងក្រមសីលធម៌វិជ្ជាជីវៈបុគ្គលិកអប់រំព្រមទាំងកិត្ដិយសស្ថាប័នយ៉ាងធ្ងន់ធ្ងរ។
សេចក្ដីប្រកាសព័ត៌មានរបស់ក្រសួងអប់រំដែលចេញកាលពីម្សិលមិញបានបញ្ជាក់ថា៖ «សូមជម្រាបជូនបុគ្គលិកអប់រំ និងសាធារណជនមេត្ដាជ្រាបថា ថ្មីៗនេះមានព័ត៌មានមិនប្រក្រតីពាក់ព័ន្ធនឹងការរត់ការដើម្បីដំឡើងតួនាទី ឋានន្តរស័ក្តិ និងកាំប្រាក់ជាដើម។ អំពើ និងសកម្មភាពទាំងនេះធ្វើឲ្យប៉ះពាល់ដល់សេចក្ដីថ្លៃថ្នូរ និងក្រមសីលធម៌វិជ្ជាជីវៈបុគ្គលិកអប់រំ ព្រមទាំងកិត្ដិយសស្ថាប័នយ៉ាងធ្ងន់ធ្ងរ»។
ក្រសួងបញ្ជាក់ថា ដើម្បីជាមូលដ្ឋានក្នុងការបំភ្លឺចំពោះព័ត៌មានខាងលើចំពោះការដំឡើងឋានៈតួនាទីសម្រាប់មន្ដ្រីគ្រប់គ្រង គ្រប់លំដាប់ថ្នាក់ និងឋានានុក្រមក្រសួងបានអនុវត្ដតាមលិខិតបទដ្ឋានដែលនៅជាធរមានតាមរយៈគណកម្មការវាយតម្លៃការងារបុគ្គលិកដោយផ្អែកលើ «ឧបនិស្ស័យ» នៃមុខតំណែងតាមប្រភេទក្របខ័ណ្ឌ និងលក្ខណវិនិច្ឆ័យដែលបានកំណត់ដោយច្បាប់។
ក្រសួងបញ្ជាក់ទៀតថា ការផ្លាស់ប្ដូរក្របខ័ណ្ឌរបស់មន្ដ្រីរាជការស៊ីវិលអាចធ្វើទៅបាន តែតាមរយៈការប្រឡងជ្រើសរើសរបស់ក្រសួង/ស្ថាប័ននីមួយៗដែលបានកំណត់ដោយរាជរដ្ឋាភិបាលប៉ុណ្ណោះ។ ការផ្លាស់ប្ដូរឋានន្តរស័ក្តិ និងថ្នាក់របស់មន្ដ្រីរាជការស៊ីវិល ត្រូវធ្វើឡើងតាមវេនជ្រើសរើស និងអតីតភាព។
ក្រសួងបញ្ជាក់ថា៖ «រយៈពេលកំណត់អប្បបរមា សម្រាប់ការដំឡើងថ្នាក់គឺ ២ ឆ្នាំ និងត្រូវមានការស្នើសុំត្រឹមត្រូវតាមច្បាប់ពីឋានានុក្រមនៃសាមីជននៅក្រោមបង្គាប់។ ការផ្ដល់សេវាលើការងារទាំងនេះមិនមានកំណត់ការបង់ថ្លៃសេវាសម្រាប់ដំណើរការជូនសាមីជនទេ»។
ក្រសួងអប់រំបានជំរុញឲ្យបុគ្គលិកអប់រំគ្រប់លំដាប់ថ្នាក់ ផ្សព្វផ្សាយឲ្យបានទូលំទូលាយ ចំពោះសេចក្ដីប្រកាសនេះ សំដៅចូលរួមលុបបំបាត់បាតុភាពមិនប្រក្រតីនានា និងជំរុញទឹកចិត្ដបុគ្គលិកតាមអង្គភាពឲ្យបំពេញការងារក្នុងទិសដៅកំណែទម្រង់ការគ្រប់គ្រងបុគ្គលិក និងពង្រឹងគុណភាពអប់រំប្រកបដោយប្រសិទ្ធភាព។
លោក រស់ សុវាចា អ្នកនាំពាក្យក្រសួងអប់រំបានបដិសេធធ្វើអត្ថាធិប្បាយបន្ថែមលើរឿងនេះដោយស្នើឲ្យយកតាមសេចក្ដីប្រកាសព័ត៌មានរបស់ក្រសួងអប់រំនេះ។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនឯករាជ្យកម្ពុជា (CITA) បានសង្កេតឃើញថា រាល់សកម្មភាពរបស់មន្ដ្រីតូចធំដែលចង់ឡើងតួនាទី ឋានន្តរស័ក្តិ កាំប្រាក់តែងតែមានការរត់ការសូកប៉ាន់ពីកន្លែងផ្សេងៗ។ លោកស្រីបានថ្លែងថា៖ «នេះជាទម្លាប់ទៅហើយ ដែលប្រទេសកម្ពុជាយើងតែងតែប្រព្រឹត្ដ។ នេះជាអំពើពុករលួយដែលសមាគមគ្រូបង្រៀនឯករាជ្យយើង តែងតែចោទសួរឲ្យរាជរដ្ឋាភិបាលមានកំណែទម្រង់ឲ្យបានច្បាស់លាស់»។
លោកស្រី ឆាយ៉ាវី បានលើកឡើងថា សមាគមគ្រូបង្រៀនកម្ពុជាឯករាជ្យ តែងតែដាក់លិខិតទៅនៅរៀងរាល់ថ្ងៃទី ៥ ខែតុលាជារៀងរាល់ឆ្នាំ ដើម្បីស្នើទៅក្រសួងកុំឲ្យមានការស៊ីសំណូក អំពើពុករលួយនៅក្នុងវិស័យអប់រំ។
លោកស្រីបញ្ជាក់ថា៖ «ការចង្អុលបង្ហាញរបស់យើងគឺចង់ឲ្យមានតម្លាភាព ដើម្បីឲ្យសិស្សានុសិស្សដែលបញ្ចប់ការសិក្សាបានចូលធ្វើការងារមានថ្វីដៃ អាចទទួលបាននូវអ្វីដែលជាតួនាទីរបស់ពួកគាត់។ យើងឃើញហើយថា សព្វថ្ងៃនេះ សូម្បីតែគ្រូបង្រៀនដែលធ្វើការច្រើនឆ្នាំក៏គាត់បានតួនាទីចាញ់ក្មេងៗជំនាន់ក្រោយជាពិសេសកំណែទម្រង់ថ្មីៗធ្វើឲ្យមនុស្សចាស់ហាក់បីដូចជាអស់សង្ឃឹមក្នុងការធ្វើការងារព្រោះក្មេងដែលទើបតែចូលមានប្រាក់បៀវត្សរ៍ស្មើ ឬលើសគ្រូដែលមានអតីតភាពច្រើនឆ្នាំមកហើយ»៕
វីដេអូ៖
