ភ្នំពេញៈ មន្ត្រីបានឲ្យដឹងកាលពីម្សិលមិញថា ក្រសួងអប់រំ យុវជន និងកីឡា បានសម្រេចទុកពេលវេលា ៣០ ថ្ងៃដល់សិស្សដើម្បីដាក់ពាក្យបណ្ដឹងព្រោះតែផ្ទុះការតវ៉ា ដោយសារពួកគេមិនពេញចិត្តនឹងលទ្ធផលប្រឡងបាក់ឌុបដោយគិតថា មានភាពមិនប្រក្រតីលើមុខវិជ្ជាគណិតវិទ្យា។
លោក ឌី ខាំបូលី អ្នកនាំពាក្យក្រសួងអប់រំ យុវជន និងកីឡាកាលពីម្សិលមិញបានថ្លែងថា៖ «ក្រសួងអប់រំ យុវជន និងកីឡាកំពុងបង្កើតគណៈកម្មការកោសល្យវិច័យ ដើម្បីត្រួតពិនិត្យបណ្ដឹងចំពោះវិញ្ញាសាប្រឡងរបស់សិស្ស ហើយបេក្ខជនមណ្ឌលភ្នំពេញ និងកណ្ដាលដែលមិនសុខចិត្ដ និងចង់ដាក់ពាក្យបណ្ដឹងតវ៉ាលទ្ធផលប្រឡងអាចដាក់ពាក្យនៅនាយកដ្ឋានរដ្ឋបាលក្រសួងអប់រំចាប់ពីថ្ងៃទី ៩ ខែកញ្ញា។ ចំណែកសិស្សនៅតាមបណ្ដាខេត្ដផ្សេងអាចដាក់ពាក្យនៅមន្ទីរអប់រំខេត្ដ ឬមកដាក់ពាក្យនៅនាយកដ្ឋានរដ្ឋបាលក្រសួងក៏បានចាប់ពីថ្ងៃទី ១០ ខែកញ្ញាដោយមានរយៈពេល ៣០ ថ្ងៃ»។
ទោះយ៉ាងណាក៏ដោយលោក ខាំ បូលី ថ្លែងអះអាងថាមិនទាន់មានគោលការណ៍សម្រេច។ ប៉ុន្ដែក្រសួងកំពុងតែបង្កើតគណៈកម្មការកោសល្យវិច័យ ដើម្បីពិនិត្យមើលទៅលើបណ្ដឹងរបស់សិស្ស ហើយគណៈកម្មការកោសល្យវិច័យនេះនឹងដឹកនាំដោយឯកឧត្ដមរដ្ឋមន្ដ្រីក្រសួងអប់រំដោយផ្ទាល់ដែលគណៈកម្មការនេះនឹងធ្វើការសម្រេច។ តែមកដល់ពេលនេះមិនទាន់ចេញជាគោលការណ៍ណាមួយនៅឡើយទេ គឺកំពុងស្ថិតក្នុងដំណាក់កាលទទួលពាក្យបណ្ដឹង ហើយក្រសួងនឹងអនុវត្ដទៅតាមគោលការណ៍ច្បាប់ ដើម្បីដោះស្រាយនូវបញ្ហាដែលកើតមាន។
លោក ខាំ បូលី ថ្លែងថា៖ «ក្រសួងស្វាគមន៍រាល់ការតវ៉ាទាំងអស់ព្រោះក្រសួងអប់រំ គោរពគោលការណ៍ច្បាប់ យុត្ដិធម៌ តម្លាភាព និងលទ្ធផលទទួលយកបាន។ ពាក្យថាលទ្ធផលទទួលយកបាននេះហើយ ដែលក្រសួងបើកឱកាសឲ្យសិស្សធ្វើការតវ៉ា»។
លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡាបានប្រាប់កាលពីថ្ងៃទី ១០ ខែកញ្ញា ២០១៨ ថាក្រសួងនឹងពិនិត្យសន្លឹកកិច្ចការសិស្សដោយធ្វើកោសល្យវិច័យលើសន្លឹកកិច្ចការគណិតវិទ្យារបស់បេក្ខជនតវ៉ាមួយចំនួន។
បេក្ខជនមួយក្រុមជិត ១០០ នាក់កាលពីល្ងាចថ្ងៃចន្ទបានប្រមូលផ្តុំគ្នានៅមុខក្រសួងអប់រំ ដើម្បីស្នើសុំឲ្យក្រសួងបើកសន្លឹកកិច្ចការរបស់ពួកគេរៀងៗខ្លួនដើម្បីធ្វើការផ្ទៀងផ្ទាត់ពិន្ទុ។ ក្នុងនោះក៏មានលោកគ្រូ អ្នកគ្រូ ដែលបង្ហាត់បង្រៀនមុខវិទ្យាគណិតវិទ្យាបាននាំគ្នាសរសេរប្រតិកម្មទៅក្រសួងអប់រំ នៅលើគេហទំព័រក្រសួងអប់រំ ព្រោះកើតទុក្ខមិនសុខចិត្តចំពោះលទ្ធផលពិន្ទុមុខវិជ្ជាគណិតផងដែរ។
យុវតីម្នាក់តំណាងក្រុមបេក្ខជនតវ៉ាប្រហែល ៣០ នាក់សុំមិនបញ្ចេញឈ្មោះបានថ្លែងថា៖ «ពួកខ្ញុំពិតជាមិនពេញចិត្ដចំពោះលទ្ធផលប្រឡងបាក់ឌុបលើមុខវិជ្ជាគណិតវិទ្យាជាខ្លាំង ព្រោះសិស្សភាគច្រើនគឺធ្លាក់មុខវិជ្ជាគណិតទាំងអស់។ ពួកខ្ញុំជឿជាក់ចំពោះសមត្ថភាពខ្លួនឯងថា សមត្ថភាពរបស់ពួកខ្ញុំអាចទទួលបានលទ្ធផលប្រសើរជាងនេះ»។
យុវតីរូបនេះថ្លែងថា៖ «អ្វីដែលសំខាន់នោះគឺ សាកលវិទ្យាល័យនានាដូចជាសាកលវិទ្យាល័យតិចណូភាគច្រើនបើធ្លាក់មុខវិជ្ជាគណិតវិទ្យាគឺមិនអាចចូលរៀននៅទីនោះបានទេ ចំណែកអាហារូបករណ៍ជាច្រើនទៀតក៏ពួកខ្ញុំមិនអាចដាក់ពាក្យប្រឡងបានដែរ»។
ការប្រឡងសញ្ញាបត្រមធ្យមសិក្សាទុតិយភូមិឆ្នាំនេះក៏មានសិស្សម្នាក់នៅខេត្ដកំពង់ធំមិនបានប្រឡង ដោយសារសាលាលុបឈ្មោះច្រឡំ។ ដោយយុវជន សុំ រស្មី ជាសិស្សនៃវិទ្យាល័យស្ទឹងសែនក្នុងខេត្ដកំពង់ធំបាត់ឈ្មោះនៅថ្ងៃប្រឡង។
លោក សឿង ភា ជានាយប៉ុស្តិ៍រដ្ឋបាល ឃុំ ប្រាសាទ ស្រុកសន្ទុក ដែលត្រូវជាឪពុក យុវជនរូបនេះបានថ្លែងប្រាប់ភ្នំពេញប៉ុស្ដិ៍កាលពីម្សិលមិញថា គ្រូ និងនាយកសាលាបានទទួលស្គាល់ ព្រោះតែបច្ចេកទេសរបស់សាលាដែលបានលុបឈ្មោះសិស្សខុសធ្វើឲ្យគាត់អត់មានឈ្មោះប្រឡងនឹងគេ។ ដូច្នេះក្រសួងអប់រំ និងនាយកសាលាបានស្វែងរកដំណោះស្រាយដោយលើកពេលទៅរៀននៅឆ្នាំក្រោយ។
លោក សឿង ភា បន្ថែមថា៖ «បន្ទាប់ពីពិភាក្សាជាមួយក្រុមគ្រួសារ និងកូនប្រុសខ្ញុំក៏យល់ព្រមទទួលយកការដោះស្រាយដោយក្រសួងសុំសំណូមពរឲ្យយើងរៀន ១ ឆ្នាំទៀត ហើយក្រសួងនឹងជួយអាហារូបករណ៍ដល់កូនខ្ញុំ និងមួយទៀតលោកគ្រូអ្នកគ្រូ គាត់បានសារភាពកំហុសរបស់គាត់រៀងៗខ្លួន ហើយគាត់សុខចិត្ដថា រាល់សម្ភារសិក្សា និងថវិកាចំពោះការសិក្សា ១ ឆ្នាំទៀតនេះ ពួកគាត់ជាអ្នកចំណាយ»។
អ្នកជាប់បាក់ឌុបឆ្នាំនេះមាន ៦៦,២១ ភាគរយស្មើនឹង ៧៥ ០៥៩ នាក់។ យោងតាមសេចក្ដីប្រកាសក្រសួងអប់រំ៕