.jpg)
សកម្មភាពលក់ផ្កាក្នុងថ្ងៃនៃក្តីស្រឡាញ់កាលពីឆ្នាំមុន។ ហុង មិនា
ភ្នំពេញៈ ក្រសួងអប់រំយុវជន និងកីឡាគ្រោងយកថ្ងៃទី ១៤ កុម្ភៈ ឆ្នាំនេះរៀបចំបាឋកថាតាមលំនាំព្រះពុទ្ធសាសនាដើម្បីទាក់ទាញក្រុមយុវជនជាសិស្សានុសិស្សឲ្យយកថ្ងៃនេះទៅធ្វើការងារសង្គមផ្សេងៗ បន្ទាប់ពីបានចេញលិខិតឲ្យសាលានានាយកចិត្តទុកដាក់លើសកម្មភាពមិនត្រឹមត្រូវមួយចំនួន ខណៈនៅមានសិស្សខ្លះយកថ្ងៃនេះទៅប្រព្រឹត្តរឿងមិនមានប្រយោជន៍។
លោក រស់ សុវាចា រដ្ឋលេខាធិការ និងជាអ្នកនាំពាក្យក្រសួងអប់រំ យុវជន និងកីឡាបានប្រាប់ភ្នំពេញប៉ុស្ដិ៍កាលពីម្សិលមិញថា ពិធីនេះត្រូវធ្វើឡើងនៅវិទ្យាស្ថានជាតិអប់រំ និងផ្សាយផ្ទាល់តាមហ្វេសប៊ុកផ្លូវការរបស់ក្រសួងអប់រំផងដែរដោយផ្ដោតលើបាឋកថាស្ដីពី «ការរក្សាផ្លូវចិត្ដតាមលំនាំព្រះពុទ្ធសាសនា» ដោយមានព្រះវត្តមានព្រះភិក្ខុ គូ សុភាព ព្រះគ្រូសូត្រស្ដាំនៅវត្ដនិគ្រោធវ័ន និងក្រោមអធិបតីភាពលោក ហង់ ជួនណារ៉ុន រដ្ឋមន្ដ្រីក្រសួងអប់រំ យុវជន និងកីឡា។ ក៏ប៉ុន្តែនៅតាមសាលានានាសិស្សានុសិស្សនៅរៀនជាធម្មតា។
លោកបានបញ្ជាក់ថា៖ «កន្លងមកក្រសួងអប់រំសង្កេតឃើញថាសិស្សានុសិស្សភាគច្រើនបានយល់ច្បាស់ពីអត្ថន័យថ្ងៃ ១៤ កុម្ភៈ ថា ពុំមែនជាពិធីបុណ្យប្រពៃណីរបស់ជនជាតិខ្មែរយើងទេ។ ជាទូទៅយុវជនបានប្រែក្លាយការចូលរួមថ្ងៃ ១៤ កុម្ភៈតាមរយ:ការងារសង្គមផ្សេងៗដូចជា បរិច្ចាគឈាមកិច្ចការសប្បុរសធម៌ និងការរក្សាសុខភាពផ្លូវចិត្តតាមលំនាំព្រះពុទ្ធសាសនាជាដើម»។
ទោះជាយ៉ាងណានៅមុនពេលកំណត់យកថ្ងៃ ១៤ កុម្ភៈ រៀបចំពិធីនេះកាលពីថ្ងៃទី ៧ ខែកុម្ភៈ ក្រសួងអប់រំ យុវជន និងកីឡាធ្លាប់បានចេញសេចក្ដីណែនាំដល់គ្រឹះស្ថានសិក្សាសាធាណៈ និងឯកជនឲ្យមានវិធានការទប់ស្កាត់សកម្មភាពមិនប្រក្រតីក្នុងទិវាបុណ្យនៃក្ដីស្រឡាញ់ (Valentine’s Day) ខណៈសិស្សានុសិស្សមួយចំនួននៅយល់ច្រឡំថា បុណ្យនេះជាបុណ្យសង្សារ ឬជាថ្ងៃណាត់ជួបគូស្នេហ៍ ដើម្បីប្រព្រឹត្តអំពើមិនគប្បីផ្សេងៗ។
នៅក្នុងសេចក្ដីណែនាំនោះក្រសួងបានបញ្ជាក់ថា៖ «ទិវានេះពុំមែនជាពិធីបុណ្យរបស់ជនជាតិខ្មែរយើងទេ ហើយនៅអំឡុងប៉ុន្មានឆ្នាំចុងក្រោយនេះ ទិវាបុណ្យនៃក្ដីស្រឡាញ់កាន់តែមានឥទ្ធិពលធំឡើងៗធ្វើឲ្យយុវវ័យភ្លើតភ្លើនភ្លេចការសិក្សាបាត់បង់សេចក្ដីថ្លៃថ្នូររបស់ខ្លួន និងក្រុមគ្រួសារប្រាសចាកវប្បធម៌ និងប្រពៃណីជាតិដ៏ផូរផង់របស់ខ្មែរទៀតផង»។
បើតាមលិខិតក្រសួងអប់រំវិធានការទប់ស្កាត់សកម្មភាពមិនប្រក្រតីក្នុងទីវាបុណ្យនៃក្ដីស្រឡាញ់ដែលតាមសាលាត្រូវធ្វើនេះ មានដូចជា ត្រូវផ្សព្វផ្សាយដល់សិស្សានុសិស្សតាមគ្រប់មធ្យោបាយ ដូចជា តាមរយៈការប្រជុំនៅពេលគោរពទង់ជាតិកុំឲ្យមានការយល់ខុសអំពីអត្ថន័យនៃទិវាបុណ្យនៃក្ដីស្រឡាញ់។ ត្រូវពង្រឹងការអនុវត្ដបទបញ្ជាផ្ទៃក្នុងរបស់គ្រឹះស្ថានសិក្សាសាធារណៈឲ្យបានម៉ឺងម៉ាត់ ជាពិសេសលើការគ្រប់គ្រងសីលធម៌ និងវិន័យដោយតាមដានអវត្ដមានរបស់សិស្សានុសិស្សជាប្រចាំ។
ជាមួយគ្នានេះក្រសួងអប់រំក៏បានណែនាំដល់គ្រឹះស្ថានសិក្សាសាធារណៈ និងឯកជនទូទៅត្រូវជំរុញដំណើរការរបស់ក្រុមប្រឹក្សាយុវជន ក្រុមប្រឹក្សាកុមារប្រចាំសាលាដោយអនុវត្ដវគ្គសកម្មភាព «មិត្ដអប់រំមិត្ត» និងត្រូវធ្វើទំនាក់ទំនងជិតស្និទ្ធជាមួយមាតាបិតា អ្នកអាណាព្យាបាលសិស្ស សហគមន៍ផងដែរ ដើម្បីផ្ដល់ និងទទួលព័ត៌មានពាក់ព័ន្ធនឹងសកម្មភាពមិនប្រក្រតីរបស់សិស្សានុសិស្ស ដើម្បីសហការគ្នាអប់រំណែនាំកែលម្អឲ្យបានទាន់ពេលវេលា។
លោក ដេត សុខឧត្ដម សាកលវិទ្យាធិការនៃសាកលវិទ្យាល័យអន្តរជាតិ ផារ៉ាហ្គន (Paragon International University) បានថ្លែងឲ្យដឹងកាលពីម្សិលមិញថា សម្រាប់សាកលវិទ្យាល័យរបស់លោកមិនមានការណែនាំជាផ្លូវការដល់និស្សិតសម្រាប់ថ្ងៃ ១៤ កុម្ភៈទេ ហើយជាទូទៅក៏មិនធ្លាប់ឃើញមានអ្វីប្លែកក្នុងបរិវេណសាកលវិទ្យាល័យនៅថ្ងៃនេះដែរ ពោលគឺបន្តការបង្រៀន និងសិក្សាជាធម្មតា។
លោកបានបញ្ជាក់ថា៖ «គ្រាន់តែជាការសង្កេតមិនផ្លូវការរបស់ខ្ញុំ និងមិនមានលក្ខណៈស្រាវជ្រាវស៊ីជម្រៅនោះខ្ញុំហាក់ដូចជាឃើញថាសម្ទុះនៃការលក់ និងទិញផ្កាជូនសង្សារក្នុងចំណោមយុវជនឥឡូវហាក់ដូចជា មិនសូវខ្លាំងក្លាទេបើប្រៀបធៀបជាមួយកាលពីប៉ុន្មានឆ្នាំមុន»។
លោក ឃឹម ផុន ប្រធាននាយកប្រតិបត្តិស្ថាប័នអប់រំ NTC Group ដែលមានសាលារៀន សុវណ្ណភូមិ សាលា ប្រ៊ីជតុន សាលា ញូវតុនធីឡាយ សាលាអន្ដរជាតិអាមេរិកាំងប៉ាស៊ីហ្វិក និងសាលាអន្ដរជាតិអ៊ីសវ៉េសជាដើមបានប្រាប់ភ្នំពេញប៉ុស្ដិ៍ថា សាលារៀនរបស់លោកទាំងអស់តែងអប់រំផ្សព្វផ្សាយដល់សិស្សពីទិវាបុណ្យនៃក្ដីស្រឡាញ់នេះថា ជាថ្ងៃបុណ្យរបស់បរទេស មិនមែនវប្បធម៌របស់កម្ពុជានោះទេ។
លោកថ្លែងថា៖ «ប៉ុន្ដែការទទួលយកនូវវប្បធម៌របស់បរទេសវាជាសិទ្ធិរបស់បុគ្គលម្នាក់ៗយើងមិនមានសិទ្ធិហាមឃាត់ទេ ប៉ុន្ដែសំខាន់ឲ្យគាត់យល់ច្បាស់ថា គាត់ជាខ្មែរ វប្បធម៌ខ្មែរយើងមានបែបណាខ្លះ ឲ្យគាត់យល់ច្បាស់ក្នុងចំណុចទាំងអស់នេះ។ ជាក់ស្ដែងសាលារៀនរបស់យើងបានយកថ្ងៃ ១៤ កុម្ភៈ នេះអប់រំដល់សិស្សានុសិស្សកុំឲ្យពួកគាត់ភ្លើតភ្លើន កុំឲ្យគាត់ធ្វើនូវអ្វីទៅតាមតែពួកគាត់ចង់ធ្វើ»៕
វីដេអូ៖
